തിരുവനന്തപുരം: സ്വന്തം അഭിപ്രായം തുറന്നുപറഞ്ഞതിന്റെ പേരിലാണ് തന്നെ ചലച്ചിത്ര അക്കാദമി ചെയര്മാന് സ്ഥാനത്തുനിന്ന് നീക്കിയതെന്ന് നടന് പ്രേംകുമാര്. ഇത് തന്റെ ആത്മാഭിമാനത്തിന് വലിയ മുറിവേല്പ്പിച്ചെന്നും പ്രേംകുമാര് പറഞ്ഞു. തന്നെ പുറത്താക്കിയ വിവരം ഔദ്യോഗികമായി അറിയിച്ചില്ലെന്നും പത്രമാധ്യമങ്ങളിലൂടെയാണ് അറിഞ്ഞതെന്നും അദ്ദേഹം പറഞ്ഞു. ഒരു കലാകാരന് അഭിപ്രായസ്വാതന്ത്ര്യം പോലുമില്ലേ എന്നും അദ്ദേഹം ചോദിച്ചു.
ആശാ വര്ക്കര്മാരുടെ സമരവുമായി ബന്ധപ്പെട്ട് ഒരു അനൗദ്യോഗിക യോഗത്തില് താന് നടത്തിയ പരാമര്ശമാണ് നടപടിക്ക് കാരണമായതെന്നും പ്രേംകുമാര് പറഞ്ഞു.
‘ആശാ വര്ക്കര്മാരുടെ പ്രശ്നം പെട്ടെന്ന് പരിഹരിക്കണമെന്നും സമരം നീണ്ടുപോകുന്നത് ഉചിതമല്ലെന്നുമാണ് ഞാന് പറഞ്ഞത്. എന്നാല് കൂടെയുണ്ടായിരുന്നവര് തന്നെ ഇത് ചോര്ത്തി നല്കി സര്ക്കാരിനെതിരെ വ്യാഖ്യാനിക്കുകയായിരുന്നു,’ പ്രേംകുമാര് വിശദീകരിച്ചു.
സംസ്ഥാന ചലച്ചിത്ര അവാര്ഡ് പ്രഖ്യാപനത്തിന്റെ തലേന്നാണ് മാറ്റിയതെന്നും ഒരു വിശദീകരണം പോലും ചോദിച്ചില്ലെന്നും പ്രേംകുമാര് പറഞ്ഞു. ഒരു സാധാരണ ജോലിക്കാരനെ മാറ്റുമ്പോള് പോലും കാണിക്കുന്ന മിനിമം മാന്യത സര്ക്കാര് കാട്ടിയില്ലെന്നും അദ്ദേഹം വിമര്ശിച്ചു.
നിലവില് താന് രാഷ്ട്രീയമായി സ്വതന്ത്രനാണെന്നും എന്നാല് വര്ഗീയതയെ ചെറുക്കാന് കോണ്ഗ്രസ് നിലനില്ക്കണമെന്ന് ആഗ്രഹിക്കുന്ന ആളാണെന്നും പ്രേംകുമാര് വ്യക്തമാക്കി.