ന്യൂഡല്ഹി: ഇന്ഡിഗോ വിമാനസര്വീസുകളില് കൂട്ടത്തേടെയുള്ള റദ്ദാക്കലുകള് തുടരുന്നതിനിടെ, ഉപഭോക്താക്കളും ജീവനക്കാരും നേരിടുന്ന ബുദ്ധിമുട്ടില് ക്ഷമ ചോദിച്ച് ഇന്ഡിഗോ സി.ഇ.ഒ പീറ്റര് എല്ബേസ്. ജീവനക്കാരോട് അയച്ച കത്തില് കഴിഞ്ഞ ദിവസങ്ങളിലുണ്ടായ അവ്യവസ്ഥയെ കുറിച്ച് അദ്ദേഹം ആശങ്ക പ്രകടിപ്പിച്ചു.
പ്രതിദിനം ഏകദേശം 3.8 ലക്ഷം യാത്രക്കാരാണ് ഇന്ഡിഗോയുടെ സേവനം ഉപയോഗിക്കുന്നത്. ഇവര്ക്കെല്ലാം മികച്ച യാത്രാനുഭവം നല്കണമെന്ന് കമ്പനി ആഗ്രഹിക്കുന്നുവെങ്കിലും, അത് സാധ്യമാക്കുന്നതില് കഴിഞ്ഞ ദിവസങ്ങളില് കമ്പനി പരാജയപ്പെട്ടുവെന്ന് എല്ബേസ് കത്തില് വ്യക്തമാക്കി. യാത്രക്കാര്ക്കും ജീവനക്കാര്ക്കും ഉണ്ടായ അസൗകര്യങ്ങള്ക്ക് അദ്ദേഹം ക്ഷമ ആവശ്യപ്പെട്ടു.
ഇതിനിടെ, സര്വീസ് റദ്ദാക്കലുകള് വിവാദമായി മാറിയതോടെ, ഡയറക്ടര് ജനറല് ഓഫ് സിവില് ഏവിയേഷന് (ഡി.ജി.സി.എ) അന്വേഷണം പ്രഖ്യാപിച്ചു. വിമാനക്കമ്പനിയില് നിന്ന് വിശദാംശങ്ങള് ആവശ്യപ്പെട്ട ഡി.ജി.സി.എ, പ്രതിസന്ധി ഒഴിവാക്കാന് അടിയന്തിര പദ്ധതി തയ്യാറാക്കാനും നിര്ദേശം നല്കിയിട്ടുണ്ട്.
വ്യാഴാഴ്ച മാത്രം 300ഓളം സര്വീസുകളും അതിന് മുന്പുള്ള ബുധനാഴ്ച 200 സര്വീസുകളും ഇന്ഡിഗോ റദ്ദാക്കിയിരുന്നു. നിലവിലെ സാഹചര്യം വിലയിരുത്തി പ്രതിസന്ധി പരിഹരിക്കാന് വിമാനക്കമ്പനിയുമായി ചേര്ന്ന് പ്രവര്ത്തിച്ചുകൊണ്ടിരിക്കുകയാണെന്ന് ഡി.ജി.സി.എ അറിയിച്ചു.