മഹാരാഷ്ട്രയിലെ സോലാപൂര് ജില്ലയില് ഗില്ലന്ബാ സിന്ഡ്രോം ബാധിച്ചതായി സംശയിക്കുന്നയാള് മരിച്ചു. അതേസമയം, പൂണെയില് 101 ജി.ബി.എസ് കേസുകള് റിപ്പോര്ട്ട് ചെയ്തതായി ആരോഗ്യ പ്രവര്ത്തകര് അറിയിച്ചു. സോളാപൂര് സ്വദേശിയായ രോഗി പൂണെ സന്ദര്ശിച്ചിരുന്നു. ഇതിലൂടെയാണ് രോഗം ബാധിച്ചതെന്ന് സംശയിക്കുന്നു. പുണെയില് രോഗം ബാധിച്ചവരില് 68 പുരുഷന്മാരും 33 സ്ത്രീകളും ഉള്പ്പെടുന്നു. ഇതില് 16 രോഗികള്ക്ക് വെന്റലേറ്ററിന്റെ സഹായം ആവശ്യമാണ്.
മഹാരാഷ്ട്രയില് ജി.ബി.എസ് ബാധിച്ചതായി സംശയിക്കുന്ന ആദ്യ മരണമാണിത്. കഴിഞ്ഞയാഴ്ചയാണ് പുണെയില് അമ്പതോളംപേരെ ബാധിച്ച അജ്ഞാത രോഗം അപൂര്വങ്ങളില് അപൂര്വമായ ഗില്ലന്ബാ സിന്ഡ്രോം ആണെന്ന് സ്ഥിരീകരിച്ചത്. മനുഷ്യരുടെ രോഗപ്രതിരോധശക്തി സ്വന്തം നാഡീവ്യൂഹത്തെ തന്നെ ‘അബദ്ധവശാല്’ ആക്രമിക്കുന്ന ഗുരുതര അവസ്ഥയാണിത്.
നാഡീവ്യവസ്ഥയെ ബാധിക്കുന്നതായതിനാല് ശ്രദ്ധിച്ചില്ലെങ്കില് അപകടസാധ്യത കൂടുതലാണ്. വൈറസോ ബാക്ടീരിയയോ കാരണമുണ്ടാകുന്ന അണുബാധയ്ക്ക് പിന്നാലെയാണ് പൊതുവേ ഈ രോഗമുണ്ടാകുന്നത്. ആദ്യം കാലുകളിലെയും പിന്നീട് ഉടലിലെയും പേശികളെ രോഗം തളര്ത്തുന്നു. മുഖത്തെ പേശികള് ചലിപ്പിക്കാന് കഴിയാത്ത സാഹചര്യവും ഉണ്ടാകാം.