സംസ്ഥാനത്ത് ഇന്നും ചൂട് ഉയരുമെന്ന് കാലാവസ്ഥാ വകുപ്പ് മുന്നറിയിപ്പ് നല്കി. ഇന്ന് ഏഴ് ജില്ലകളില് യെല്ലോ അലര്ട്ട് പ്രഖ്യാപിച്ചു. തൃശ്ശൂര്, പാലക്കാട് , കോഴിക്കോട്, കണ്ണൂര്, കാസര്ഗോഡ്, മലപ്പുറം, എറണാകുളം ജില്ലകളിലാണ് യെല്ലോ അലര്ട്ട്. ഉയര്ന്ന താപനിലയും ഈര്പ്പമുള്ള വായുവും കാരണം ചൂടും അസ്വസ്ഥതയുമുള്ള കാലാവസ്ഥയ്ക്ക് സാധ്യതയുണ്ട്.
കൊടും ചൂട് തുടരുന്നതിനിടെ സൂര്യരശ്മികളില് നിന്നുള്ള അള്ട്രാവലയറ്റ് കിരണങ്ങളുടെ തോതും ഉയരുകയാണ്. ഈ സാഹചര്യത്തില് പൊതു ജനങ്ങള് ജാഗ്രത പാലിക്കണമെന്നും രാവിലെ 11 മുതല് വൈകുന്നേരം 3 വരെയുള്ള വെയില് നേരിട്ട് ഏല്ക്കരുതെന്നും കാലാവസ്ഥാ വകുപ്പ് മുന്നറിയിപ്പില് പറയുന്നു. അതേസമയം, കിഴക്കന് കാറ്റിന്റെ സ്വാധീന ഫലമായി മലപ്പുറം, വയനാട് ജില്ലകളില് മഴയ്ക്ക് സാധ്യതയുണ്ടെന്നും കാലാവസ്ഥ വകുപ്പ് അറിയിപ്പില് പറയുന്നു.