ഡല്ഹി: ഡല്ഹിയില് കനത്ത മൂടല്മഞ്ഞ് തുടരുന്നതിനാല് വിമാന സര്വീസുകള്ക്ക് തടസ്സം നേരിടാന് സാധ്യതയുണ്ടെന്ന് വിമാനത്താവള അധികൃതര് മുന്നറിയിപ്പ് നല്കി. ദൃശ്യപരിധി ഗണ്യമായി കുറഞ്ഞ സാഹചര്യത്തില് കാറ്റഗറി മൂന്ന് അനുസരിച്ചാണ് ഡല്ഹി അന്താരാഷ്ട്ര വിമാനത്താവളത്തിന്റെ പ്രവര്ത്തനം നടക്കുന്നത്. യാത്രയ്ക്കായി വിമാനത്താവളങ്ങളിലേക്ക് പുറപ്പെടുന്നതിന് മുന്പ് ഫ്ളൈറ്റ് സ്റ്റാറ്റസ് പരിശോധിക്കണമെന്ന് ഇന്ഡിഗോയും എയര് ഇന്ത്യയും യാത്രക്കാര്ക്ക് നിര്ദേശം നല്കി.
അതേസമയം, ഡല്ഹിയില് വായു മലിനീകരണം ഗുരുതരമായി തുടരുകയാണ്. മൂടല്മഞ്ഞ് മൂലം ഡല്ഹിയില് നിന്നുള്ള നിരവധി വിമാന സര്വീസുകള് വൈകി. വായു മലിനീകരണ നിയന്ത്രണ നടപടികളുടെ ഭാഗമായി ആദ്യ ദിവസം സംസ്ഥാനത്ത് 3,746 വാഹനങ്ങള്ക്ക് പിഴ ചുമത്തിയതായി അധികൃതര് അറിയിച്ചു. പൊല്യൂഷന് സര്ട്ടിഫിക്കറ്റ് ഇല്ലാത്ത വാഹനങ്ങള്ക്കെതിരെയാണ് നടപടി.
ഡല്ഹി അതിര്ത്തികളില് പരിശോധനകള് ശക്തമാക്കിയിട്ടുണ്ട്. മാനദണ്ഡങ്ങള് പാലിക്കാത്ത 568 വാഹനങ്ങളെ ഇന്നലെ തന്നെ തിരിച്ചയച്ചു. കഴിഞ്ഞ രണ്ട് ദിവസത്തിനിടെ 61,912 വാഹനങ്ങള് പൊല്യൂഷന് സര്ട്ടിഫിക്കറ്റ് എടുത്തതായും, നിയന്ത്രണ നടപടികള് ഫലപ്രദമാണെന്നും ഡല്ഹി സര്ക്കാര് വ്യക്തമാക്കി.