തിരൂര്: ദക്ഷിണ റെയില്വേ ഇന്ത്യയിലെ പാഴ്സല് ഗതാഗത രംഗത്ത് ഒരു പുതുമയ്ക്കാണ് തുടക്കമിടുന്നത്. രാജ്യത്ത് ആദ്യമായി അവതരിപ്പിക്കുന്ന ഇന്ട്രാസോണല് കോസ്റ്റ്-ടു-കോസ്റ്റ് പാഴ്സല് എക്സ്പ്രസ് എന്ന പുതിയ ട്രെയിന് സേവനം തമിഴ്നാടിനെയും കേരളത്തെയും ബന്ധിപ്പിച്ചു ഒരു പുതിയ വാണിജ്യപാത തുറക്കുകയാണ്. വര്ഷങ്ങളായി റോഡ്മാര്ഗം ചെലവേറെയായി സാധനങ്ങള് അയയ്ക്കേണ്ടി വന്ന വ്യാപാരികള്ക്കും ചെറുകിട വ്യവസായങ്ങള്ക്കും ഈ പുതിയ സംരംഭം ആശ്വാസമാകുമെന്ന് റെയില്വേ വകുപ്പ് ഉറപ്പുനല്കുന്നു.
മംഗളൂരുവില് നിന്നാരംഭിച്ച് റോയാപുരം വരെ സര്വീസ് നടത്തുന്ന ഈ ട്രെയിന് കേരളത്തിലെ ഏഴ് പ്രധാന സ്റ്റേഷനുകളില് നിര്ത്തും. തിരൂര്, ഷോരണൂര്, പാലക്കാട്, കോയമ്പത്തൂര്, തിരുപ്പൂര്, ഈറോഡ്, സേലം തുടങ്ങിയ കേന്ദ്രങ്ങളെ ബന്ധിപ്പിക്കുന്ന ഈ ശൃംഖല പാഴ്സല് ഗതാഗതത്തിന് സ്ഥിരതയും വേഗതയും നല്കുന്നു. കേരളത്തിനുള്ളില് പ്രത്യേകിച്ച് തിരൂര് വെറ്റില കയറ്റുമതിയ്ക്ക് ഈ സര്വീസ് വലിയ മാറ്റമുണ്ടാക്കും. ഇതുവരെ വെറ്റിലയും മറ്റു പല സാധനങ്ങളും യാത്രാ ട്രെയിനുകളിലെ ഭാഗങ്ങളില് ആശ്രയിച്ചാണ് അയച്ചിരുന്നത്. പുതിയ പാഴ്സല് എക്സ്പ്രസ് ആരംഭിക്കുന്നത് സമയത്തും ചെലവിലും കാര്യമായ ലാഭം നല്കും. കൂടാതെ വ്യാവസായിക വസ്തുക്കള്, വൈറ്റ് ഗുഡ്സ്, ഉപഭോക്തൃ ഉല്പ്പന്നങ്ങള്, പെട്ടെന്ന് കേടാകുന്ന സാധനങ്ങള് തുടങ്ങി പലതും ഈ ട്രെയിനിലൂടെ സുരക്ഷിതമായി എത്തിക്കാനാകും. ഇതിനെ സഹായിക്കുന്ന വിധത്തില് 10 ഹൈ കപ്പാസിറ്റി വാനുകളും 2 ലഗേജ് കം ബ്രേക്ക് വാനുകളും ഉള്പ്പെടുത്തി റെയില്വേ പ്രത്യേക സംവിധാനങ്ങളും ഒരുക്കി.
സര്വീസ് സമയക്രമവും വ്യാപാരികള്ക്ക് അനുയോജ്യമായ രീതിയിലാണ് ക്രമീകരിച്ചിരിക്കുന്നത്. എല്ലാ വെള്ളിയാഴ്ചയും മംഗളൂരുവില് നിന്ന് പുറപ്പെട്ട് രാത്രി കോഴിക്കോട്, തിരൂര് തുടങ്ങിയ സ്റ്റേഷനുകളിലൂടെ യാത്ര തുടരുന്ന ട്രെയിന് അടുത്ത ദിവസം ഉച്ചയോടെ റോയാപുരത്തെത്തും. തിരിച്ചുള്ള സര്വീസ് ചൊവ്വാഴ്ചകളിലാണ്. ഇതിലൂടെ കേരളവും തമിഴ്നാടും തമ്മിലുള്ള ലജിസ്റ്റിക് ശൃംഖല കൂടുതല് ക്രമബദ്ധവും വിശ്വസനീയവുമായിരിക്കും. സ്റ്റേഷനുകളില് പാഴ്സല് കൈകാര്യം ചെയ്യാന് പ്രത്യേക സൗകര്യങ്ങളും റെയില്വേ ഒരുക്കിയിട്ടുണ്ട്.
പുതിയ പാഴ്സല് എക്സ്പ്രസ് ഇന്ത്യയിലെ ചരക്ക് ഗതാഗതരംഗത്ത് ഒരു നിലപാടുമാറ്റമാണ്. ചെലവു കുറഞ്ഞതും സമയം കൃത്യമായതുമായ സേവനം ലഭ്യമാകുന്നതോടെ വ്യാപാരികളും കയറ്റുമതി മേഖലയും കൂടുതല് കരുത്താര്ജിക്കും. ലജിസ്റ്റിക് രംഗത്തെ നിലവിലുള്ള തടസ്സങ്ങളും വൈകല്യങ്ങളും പരിഹരിക്കുന്നതില് ഈ സര്വീസിന് വലിയ പങ്ക് വഹിക്കാനാകും. കേരളത്തിന്റെ വാണിജ്യ രംഗത്ത് പുതിയ സാധ്യതകള് തുറന്നുകൊടുക്കുന്ന ഈ സംരംഭം, റെയില്വേയുടെ മുന്നേറ്റ ചിന്തകളുടെ തെളിവായും മാറുന്നു.