മണിപ്പൂരില് ഇന്റര്നെറ്റ് നിരോധനം നീട്ടി. ഒമ്പത് ജില്ലകളില് രണ്ട് ദിവസത്തേക്ക് പ്രഖ്യാപിച്ച ഇന്റര്നെറ്റ് നിരോധനം നവംബര് 27 വരെ നീട്ടിയതായി ആഭ്യന്തരവകുപ്പ് പുറത്തിറക്കിയ പ്രസ്താവനയില് പറയുന്നു. നവംബര് 16ന് സംസ്ഥാനത്ത് അക്രമം രൂക്ഷമായിരുന്നു. ഇതിനെ തുടര്ന്ന് ഭരണകൂടം ഇന്റര്നെറ്റ് സേവനങ്ങള് നിര്ത്തിവച്ചിരുന്നു.
ഇംഫാല് വെസ്റ്റ്, ഇംഫാല് ഈസ്റ്റ്, കാക്ചിങ്, ബിഷ്ണുപൂര്, തൗബല്, ചുരാചന്ദ്പൂര്, കാങ്പോക്പി, ഫെര്സാള്, ജിരിബാം എന്നിവിടങ്ങളില് ഇന്റര്നെറ്റ് സേവനങ്ങള് താല്ക്കാലികമായി നിര്ത്തിവെക്കാന് സംസ്ഥാന സര്ക്കാര് തീരുമാനിച്ചതായി ഉത്തരവില് പറഞ്ഞു.
നവംബര് 27ന് വൈകിട്ട് 5.15 വരെ മൊബൈല് ഇന്റര്നെറ്റ്, മൊബൈല് ഡാറ്റ സേവനങ്ങളുടെ സസ്പെന്ഷന് തുടരുമെന്നും ഉത്തരവില് പറയുന്നു.
നവംബര് 16ന് ഏഴ് ജില്ലകളിലാണ് ഇന്റര്നെറ്റ് നിരോധനം നടപ്പാക്കിയത്. പിന്നീടത് ജിരിബാം, ഫെര്സാള് ജില്ലകളിലേക്ക് വ്യാപിപ്പിക്കുകയായിരുന്നു.