ബ്രസീല് സൂപ്പര് താരം നെയ്മര് ജൂനിയര് വീണ്ടും ശസ്ത്രക്രിയയ്ക്ക് വിധേയനായി. ബ്രസീല് ഫുട്ബോള് ലീഗില് സാന്റോസിനായി കളിക്കുന്ന 33കാരനായ താരത്തിന്റെ ഇടത് കാല്മുട്ടിലാണ് ഇത്തവണ ശസ്ത്രക്രിയ നടത്തിയത്. ഇടത് കാല്മുട്ടിലെ മീഡിയല് മെനിസ്കസുമായുള്ള പ്രശ്നം പരിഹരിക്കുന്നതിനായി ആര്ത്രോസ്കോപ്പിക് ശസ്ത്രക്രിയയാണ് നടത്തിയത്. നോവ ലിമയിലെ മാറ്റര് ഡി ആശുപത്രിയില് നടന്ന ശസ്ത്രക്രിയ വിജയകരമായിരുന്നുവെന്ന് ശസ്ത്രക്രിയയ്ക്ക് നേതൃത്വം നല്കിയ ഡോ. റോഡ്രിഗോ ലാസ്മാര് വ്യക്തമാക്കി.
ബ്രസീല് ദേശീയ ഫുട്ബോള് ടീമിന്റെ ഡോക്ടറാണ് ലാസ്മര്. ശസ്ത്രക്രിയ പൂര്ത്തിയായതോടെ നെയ്മര് ഇപ്പോള് വിശ്രമത്തിലാണെന്നും അടുത്ത ദിവസങ്ങളില് ഫിസിയോതെറാപ്പി ആരംഭിക്കുമെന്നും മെഡിക്കല് ബുള്ളറ്റിനില് പറയുന്നു. രണ്ട് വര്ഷം മുമ്പ് നെയ്മറിന്റെ കണംങ്കാലിന് ഗുരുതരമായ പരിക്ക് സംഭവിച്ചപ്പോഴും ശസ്ത്രക്രിയ നടത്തിയത് ഡോ. ലാസ്മറായിരുന്നു. പരിക്ക് പൂര്ണമായും ഭേദമാകാതെയാണ് നെയ്മര് വീണ്ടും കളത്തിലിറങ്ങി തന്റെ ക്ലബ്ബായ സാന്റോസിനെ തരംതാഴ്ത്തല് ഭീഷണിയില് നിന്ന് രക്ഷിച്ചത്. ബ്രസീല് ഫുട്ബോള് ലീഗില് സാന്റോസിന്റെ നിലനില്പ്പിന് നിര്ണായകമായ പ്രകടനമാണ് താരം കാഴ്ചവച്ചത്.
ആരോഗ്യം വീണ്ടെടുത്ത് 2026ല് നടക്കാനിരിക്കുന്ന ലോകകപ്പില് ബ്രസീലിന് വേണ്ടി കളിക്കണമെന്ന ആഗ്രഹത്തിലാണ് നെയ്മര്. രണ്ട് വര്ഷം മുമ്പാണ് താരം അവസാനമായി ബ്രസീല് ദേശീയ ടീമിനായി മത്സരിച്ചത്. ബ്രസീലിന്റെ എക്കാലത്തെയും മികച്ച ഗോള്വേട്ടക്കാരില് ഒരാളായ നെയ്മര് 128 അന്താരാഷ്ട്ര മത്സരങ്ങളില് നിന്ന് 79 ഗോളുകള് നേടിയിട്ടുണ്ട്. ചികിത്സ പൂര്ത്തിയാക്കി നെയ്മര് എപ്പോള് മൈതാനത്തേക്ക് മടങ്ങുമെന്ന് ഇതുവരെ ഔദ്യോഗികമായി വ്യക്തമാക്കിയിട്ടില്ല. എന്നാല് പൂര്ണ വിശ്രമവും തുടര്ച്ചയായ ഫിസിയോതെറാപ്പിയും അനിവാര്യമാണ്. പരിക്ക് ഭേദമായി ലോകകപ്പ് സ്ക്വാഡില് ഇടം നേടുക എന്നതാണ് നിലവില് നെയ്മറിന്റെ പ്രധാന ലക്ഷ്യം.