തിരുവല്ല: തദ്ദേശ തെരഞ്ഞെടുപ്പ് വോട്ടെടുപ്പില് തിരുവല്ലയില് യന്ത്രതകരാറുകളും അക്രമവും റിപ്പോര്ട്ട് ചെയ്തു. നിരണം പഞ്ചായത്തിലെ ഇരതോട് 28-ാം നമ്പര് ബൂത്തില് വോട്ടിംഗ് മെഷീന് തകരാറിനെ തുടര്ന്ന് വോട്ടെടുപ്പ് ഏറെ നേരം വൈകി. വോട്ട് ചെയ്യാന് എത്തിയ നിരവധി പേര് തിരിച്ചുപോയി.
പെരിങ്ങര പഞ്ചായത്തിലെ ആലംതുരുത്തി സ്കൂളിലെ മൂന്നാം വാര്ഡ് ബൂത്തിലുമായിരുന്നു സമാന സാഹചര്യം. യന്ത്രത്തിലെ തകരാര് പരിഹരിച്ചതിന് ശേഷം മാത്രമാണ് വോട്ടെടുപ്പ് പുനരാരംഭിച്ചത്.
ഇതിനിടെ, തിരുവല്ല നഗരസഭയുടെ ഇരുവെള്ളിപ്പറ 17-ാം വാര്ഡില് എന്.ഡി.എ സ്ഥാനാര്ഥി മണിക്കുട്ടനും പ്രവര്ത്തകരായ പുളിക്കത്തറ സുനീഷ്, അനീഷ് തേവര്മല എന്നിവര്ക്കും എല്.ഡി.എഫ് പ്രവര്ത്തകരില് നിന്ന് മര്ദനമേറ്റതായി പരാതി. രാത്രി 11 മണിയോടെ സെന്റ് തോമസ് സ്കൂളിന് സമീപം ബൂത്ത് നിര്മ്മാണ പ്രവര്ത്തനത്തിനിടെ വാക്കേറ്റം സംഘര്ഷത്തിലേക്ക് നീങ്ങുകയായിരുന്നു.