മണിപ്പൂരില് സ്ത്രീകളെ ബലാത്സംഗം ചെയ്ത് നഗ്നരാക്കി നടത്തിയ കേസ് സിബിഐക്ക് വിട്ടു. സമഗ്ര അന്വേഷണത്തിനാണ് കേസ് ആഭ്യന്തര മന്ത്രാലയം സിബിഐക്ക് വിട്ടത്. കേസിലെ വിചാരണ മണിപ്പൂരിന് പുറത്ത് നടത്തണമെന്ന് ആവശ്യപ്പെട്ട് സത്യവാങ്മൂലവും നല്കും. ഈ കേസുമായി ബന്ധപ്പെട്ട് രണ്ട് ദിവസം മുമ്പ് ഒരാളെ കൂടി അറസ്റ്റ് ചെയ്തിരുന്നു. ഇതോടെ ഈ കേസില് അറസ്റ്റിലായവരുടെ എണ്ണം ഏഴായി.
സംഭവത്തില് രാജ്യവ്യാപകമായി പ്രതിഷേധമുയരുകയും പ്രതിപക്ഷ സഖ്യം കേന്ദ്ര സര്ക്കാരിനെ സമ്മര്ദത്തിലാക്കുകയും ചെയ്തതിനു പിന്നാലെയാണ് കേന്ദ്ര ആഭ്യന്തര മന്ത്രാലയം കേസ് അന്വേഷണം സിബിഐക്കു വിടാന് തീരുമാനമായത്. എഫ്.ഐ.ആര് രജിസ്റ്റര് ചെയ്ത് രണ്ട് മാസം പിന്നിട്ട ശേഷമാണ് കേസ് ആഭ്യന്തര മന്ത്രാലയം സിബിഐക്ക് വിടുന്നത്. കേസില് പ്രതികളുടെ അറസ്റ്റ് വൈകിയത് മതിയായ തെളിവുകളുടെ അഭാവത്താല് ആണെന്നായിരുന്നു മണിപ്പൂര് പൊലീസിന്റെ വിശദീകരണം.