ഷൊര്ണ്ണൂര്: സൗദിയില് മര്ച്ചന്റ് നേവിയില് ജോലി ലഭ്യമാക്കാമെന്ന് പറഞ്ഞ് വന്തുക തട്ടിയ കേസില് 27കാരനായ ആദര്ശിനെ ഷൊര്ണ്ണൂര് പൊലീസ് അറസ്റ്റ് ചെയ്തു. കൊല്ലം വടമണ് തെക്കേക്കര സ്വദേശിയാണ് പ്രതി. മേയ്, സെപ്റ്റംബര് മാസങ്ങളിലായി വടനക്കുറിശ്ശി സ്വദേശിയില് നിന്നു 3,85,000 രൂപയാണ് തട്ടിയെടുത്തത്.
ജോലി ലഭിക്കാതെയും പണം തിരികെ നല്കാതെയും വന്നതിനെ തുടര്ന്ന് പരാതിക്കാരി പൊലീസിനെ സമീപിക്കുകയായിരുന്നു. ഇതേ സ്വഭാവത്തിലുള്ള മറ്റൊരു കേസില് കണ്ണൂര് ആറളം പൊലീസ് സ്റ്റേഷനിലും ആദര്ശിനെതിരെ കേസ് നിലവിലുണ്ട്. കൂടുതല് പരാതികളും ലഭിച്ചുവരുന്നുവെന്ന് പൊലീസ് അറിയിച്ചു. പ്രതിയെ കോടതിയില് ഹാജരാക്കി റിമാന്ഡ് ചെയ്തു.