ചെന്നൈ: ചെന്നൈ മെട്രോയില് സാങ്കേതിക തകരാര് കാരണം ട്രെയിന് തുരങ്കത്തിനുള്ളില് നിലച്ചതിനെ തുടര്ന്ന് യാത്രക്കാര് റെയില് പാതയിലൂടെ നടന്ന് സുരക്ഷിതമായി സ്റ്റേഷനിലെത്തേണ്ടി വന്ന സംഭവമാണ് ഇന്ന് പുലര്ച്ചെ ഉണ്ടായത്. ചൊവ്വാഴ്ച പുലര്ച്ചെയാണ് സെന്ട്രല് മെട്രോ സ്റ്റേഷനും ഹൈക്കോടതി സ്റ്റേഷനും ഇടയിലുള്ള തുരങ്കപാതയില് ട്രെയിന് അപ്രതീക്ഷിതമായി നിശ്ചലമായത്. ട്രെയിനിനുള്ളിലെ വൈദ്യുതി പെട്ടെന്ന് നിലച്ചതോടെ ഏകദേശം പത്ത് മിനിറ്റോളം യാത്രക്കാര് കുടുങ്ങിയ നിലയിലായിരുന്നു. തുടര്ന്ന് അധികൃതരുടെ നിര്ദ്ദേശപ്രകാരം യാത്രക്കാരെ ട്രെയിനില്നിന്നിറക്കി തുരങ്കത്തിലൂടെ 500 മീറ്റര് അകലെയുള്ള ഹൈക്കോടതി മെട്രോ സ്റ്റേഷനിലേക്കാണ് നടന്ന് കൊണ്ടുപോയത്. സംഭവത്തിന്റെ വീഡിയോ ദൃശ്യങ്ങളും പിന്നീട് പുറത്ത് വന്നിരുന്നു. വിംകോ നഗറിനും ചെന്നൈ വിമാനത്താവളത്തിനും ഇടയിലുള്ള ചെന്നൈ മെട്രോയുടെ ബ്ലുലൈന് ഭാഗത്താണ് തകരാര് ഉണ്ടായത് എന്നു മെട്രോ റെയില് അധികൃതര് അറിയിച്ചു. തകരാറിലായ ട്രെയിന് ഉടന് ലൈനില്നിന്ന് മാറ്റിനിര്ത്തുകയും രാവിലെ 6.20 ഓടെ സര്വീസ് പൂര്ണ്ണമായും സാധാരണ നിലയിലാക്കുകയും ചെയ്തു. യാത്രക്കാര്ക്ക് ഉണ്ടായ അസൗകര്യത്തില് ഖേദം രേഖപ്പെടുത്തിയതായി ചെന്നൈ മെട്രോ റെയില് അറിയിച്ചു