ഉയര്ന്ന അളവില് എഥനോള് ചേര്ത്ത പെട്രോള് വാഹനങ്ങളുടെ പ്രവര്ത്തനത്തെ ബാധിക്കുമെന്ന ആശങ്കകള്ക്കിടെ, ഇന്ധനത്തില് എഥനോളിന്റെ അളവ് വര്ധിക്കുമ്പോള് വാഹനങ്ങളുടെ മൈലേജില് നേരിയ കുറവുണ്ടാകാമെന്ന് കേന്ദ്ര റോഡ് ഗതാഗത-ഹൈവേ മന്ത്രി നിതിന് ഗഡ്കരി സമ്മതിച്ചു. പെട്രോളിനെ അപേക്ഷിച്ച് എഥനോളിന്റെ കലോറി മൂല്യം കുറവായതിനാലാണ് ഈ വ്യത്യാസമെന്നാണ് അദ്ദേഹം ‘ദി ഇന്ത്യന് എക്സ്പ്രസിന്’ നല്കിയ അഭിമുഖത്തില് വ്യക്തമാക്കിയത്.
എന്നാല്, എഥനോള് മിശ്രിതം വാഹനങ്ങള്ക്ക് കേടുപാടുകള് ഉണ്ടാക്കുന്നുവെന്ന രീതിയില് സമൂഹമാധ്യമങ്ങളില് ഉയരുന്ന ആരോപണങ്ങള് അതിശയോക്തി കലര്ന്നതും ബോധപൂര്വം പ്രചരിപ്പിക്കുന്ന വ്യാജപ്രചാരണമാണെന്നും മന്ത്രി അവകാശപ്പെട്ടു. അതേസമയം, പഴയ വാഹനങ്ങളിലെ ചില റബര്, പ്ലാസ്റ്റിക് ഘടകങ്ങളെ E20 പെട്രോള് ബാധിക്കാന് സാധ്യതയുള്ളതിനാല് സര്വീസിനിടെ അവ സൗജന്യമായി മാറ്റിനല്കാന് വാഹന നിര്മാതാക്കള്ക്ക് നിര്ദേശം നല്കിയിട്ടുണ്ടെന്ന അദ്ദേഹത്തിന്റെ വിശദീകരണം, വിമര്ശകര് ഉയര്ത്തുന്ന ആശങ്കകള്ക്ക് കൂടുതല് ബലം നല്കുന്നതാണെന്ന വിലയിരുത്തലും ഉയരുന്നുണ്ട്.
പൂനെ ആസ്ഥാനമായുള്ള ഓട്ടോമോട്ടീവ് റിസര്ച് അസോസിയേഷന് ഓഫ് ഇന്ത്യ (ARAI) ഉള്പ്പെടെയുള്ള സ്ഥാപനങ്ങളുടെ പരീക്ഷണങ്ങള്ക്ക് ശേഷമാണ് രാജ്യവ്യാപകമായി E20 പെട്രോള് നടപ്പാക്കിയതെന്നാണ് കേന്ദ്ര സര്ക്കാര് പറയുന്നത്. എന്നാല്, മൈലേജ് കുറയില്ലെന്നും വാഹനങ്ങള്ക്ക് യാതൊരു പ്രശ്നവുമുണ്ടാകില്ലെന്നും നേരത്തെ വ്യാപകമായി പ്രചരിപ്പിച്ച അവകാശവാദങ്ങളില് നിന്ന് വ്യത്യസ്തമായ നിലപാടാണ് ഇപ്പോള് മന്ത്രിയുടെ വിശദീകരണത്തിലൂടെ പുറത്തുവന്നിരിക്കുന്നതെന്ന് വിമര്ശകര് ചൂണ്ടിക്കാട്ടുന്നു.
പശ്ചിമേഷ്യയിലെ രാഷ്ട്രീയ അസ്ഥിരതയും ഫോസില് ഇന്ധന ഇറക്കുമതിയിലുള്ള ആശ്രയത്വവും കുറയ്ക്കാനാണ് എഥനോള്, മെഥനോള് തുടങ്ങിയ പകരം ഇന്ധനങ്ങളിലേക്ക് രാജ്യം നീങ്ങുന്നതെന്ന് ഗഡ്കരി പറഞ്ഞു. കര്ണാടകയില് 15 ശതമാനം മെഥനോള്-ഡീസല് മിശ്രിതത്തില് ബസുകള് പരീക്ഷിച്ചതായും, അസം പെട്രോ-കെമിക്കല്സ് കുറഞ്ഞ ചെലവില് മെഥനോള് ഉല്പ്പാദിപ്പിക്കുന്നതായും അദ്ദേഹം അറിയിച്ചു.
പ്രതിവര്ഷം ഏകദേശം രണ്ട് ലക്ഷം കോടി രൂപയുടെ ഫോസില് ഇന്ധനമാണ് ഇന്ത്യ ഇറക്കുമതി ചെയ്യുന്നതെന്നും, തദ്ദേശീയ ഇന്ധനങ്ങളിലേക്ക് മാറുന്നതിലൂടെ ഇറക്കുമതി ചെലവ് കുറയ്ക്കുകയും മലിനീകരണം നിയന്ത്രിക്കുകയും ചെയ്യുകയാണ് ലക്ഷ്യമെന്നും കേന്ദ്ര സര്ക്കാര് വിശദീകരിക്കുന്നു.
അതേസമയം, ജനങ്ങളുടെ വാഹനച്ചെലവും മൈലേജും നേരിട്ട് ബാധിക്കുന്ന വിഷയത്തില് സമഗ്രമായ പൊതുപഠന റിപ്പോര്ട്ടുകള് പുറത്തുവിടാതെ നയങ്ങള് നടപ്പാക്കുകയും, പിന്നീട് മൈലേജ് കുറയാമെന്ന് കേന്ദ്രമന്ത്രി തന്നെ സമ്മതിക്കുകയും ചെയ്യുന്നത് ബിജെപി സര്ക്കാരിന്റെ ഇന്ധനനയത്തിലെ സുതാര്യതയെ ചോദ്യം ചെയ്യുന്നതാണെന്ന് പ്രതിപക്ഷവും വാഹന ഉപഭോക്തൃ സംഘടനകളും വിമര്ശിക്കുന്നു.