നെന്മാറ ഇരട്ടക്കൊലക്കേസ് പ്രതി ചെന്താമരയുമായി പൊലീസ് ഇന്ന് തെളിവെടുപ്പ് നടത്തും. കൊലപാതകം നടന്ന പോത്തുണ്ടിയിലും ചെന്താമരയുടെ വീട്ടിലുമെത്തിച്ചുമാണ് തെളിവെടുപ്പ് നടത്തുന്നത്. അതേസമയം ജനരോഷം കണക്കിലെടുത്ത് കനത്ത സുരക്ഷ പ്രദേശത്ത് ഒരുക്കുന്നുണ്ട്. പോത്തുണ്ടിയില് മാത്രം നൂറോളം പൊലീസ് ഉദ്യോഗസ്ഥരെ വിന്യസിച്ചിട്ടുണ്ടെന്നാണ് സൂചന.
നേരത്തെ സഹ തടവുകാരുടെ ആശങ്ക കണക്കിലെടുത്ത് ആലത്തൂരിലെ ജയിലില് നിന്ന് വീയൂരിലെ അതീവ സുരക്ഷ ജയിലിലേക്ക് മാറ്റിയിരുന്നു. ജനുവരി 27നാണ് അയല്വാസികളായ സുധാകരനെയും അമ്മ ലക്ഷ്മിയെയും ചെന്താമര വെട്ടികൊലപ്പെടുത്തുന്നത്. നേരത്തെ സുധാകരന്റെ ഭാര്യ സജിതയെ കൊന്ന കേസില് ജയിലില് നിന്ന് ഇടക്കാല ജാമ്യത്തില് പുറത്തിറങ്ങിയതായിരുന്നു.
അതേസമയം രണ്ട് ദിവസത്തേക്കാണ് പൊലീസ് പ്രതിയെ കസ്റ്റഡിയില് ആവശ്യപ്പെടിരിക്കുന്നത്. ഇന്നും നാളെയുമായി തെളിവെടുപ്പ് പൂര്ത്തിയാക്കാനാണ് പൊലീസ് തീരുമാനം. പദ്ധതി കൃത്യമായി നടപ്പാക്കിയതിന്റെ സന്തോഷത്തിലാണ് പ്രതി. ദിവസങ്ങള്ക്ക് മുമ്പ് തന്നെ കൊലപ്പെടുത്തുന്നതിനു വേണ്ടി പുതിയ കൊടുവാള് വാങ്ങിയിരുന്നു. പ്രതി ചെന്താമര പുറത്തിറങ്ങിയാല് ഒരു പ്രദേശത്തിന് മുഴുവന് ഭീഷണിയാണെന്നും റിമാന്ഡ് റിപ്പോര്ട്ടിലുണ്ട്.