വയനാട്ടിലെ വവ്വാലുകളില് നിപ വൈറസ് സാന്നിധ്യം കണ്ടെത്തിയതായി ഇന്ത്യന് മെഡിക്കല് ഗവേഷണ കൗണ്സില് (ഐസിഎംആര്) അറിയിച്ചു. ഈ പശ്ചാത്തലത്തില് ജാഗ്രത പാലിക്കാന് ആരോഗ്യ പ്രവര്ത്തകര്ക്കു നിര്ദേശം നല്കിയതായി ആരോഗ്യമന്ത്രി വീണാ ജോര്ജ്.
ജാഗ്രത പാലിക്കണമെന്നും മുന്നറിയിപ്പുകള് പാലിക്കണമെന്നും ആരോഗ്യപ്രവര്ത്തകര്ക്ക് ആരോഗ്യമന്ത്രി മുന്നറിയിപ്പ് നല്കി. പ്രത്യേക പ്രദേശം എന്നതിനപ്പുറം പൊതു ജാഗ്രതയില് ഊന്നിയാണ് പ്രവര്ത്തനം. രോഗ ലക്ഷണങ്ങളില് ജാഗ്രത പാലിക്കണമെന്ന് നിര്ദ്ദേശിച്ചതായും മന്ത്രി അറിയിച്ചു.
പക്ഷികളും മറ്റും കടിച്ച പഴങ്ങള് കഴിക്കുന്നത് ഒഴിവാക്കണെന്നും മറ്റു ജില്ലകളിലും നിപ്പയുടെ സാന്നിധ്യത്തെക്കുറിച്ചു നിരീക്ഷണങ്ങളും പഠനങ്ങളും നടത്തുകയാണെന്നും മന്ത്രി പറഞ്ഞു. വവ്വാലുകളെ തുടര്ച്ചയായി നിരീക്ഷിക്കുന്നതു കൊണ്ടും, പ്രതിരോധ പ്രവര്ത്തനങ്ങള് കാര്യക്ഷമായി നടക്കുന്നതുകൊണ്ടുമാണ് കേരളത്തില് നിപ്പ വൈറസിന്റെ സാന്നിധ്യം കണ്ടെത്തുന്നതെന്നു മന്ത്രി കൂട്ടിച്ചേര്ത്തു.