നടിയെ ആക്രമിച്ച കേസിലെ കോടതി വിധിയില് പ്രതികരണവുമായി അതിജീവിത രംഗത്തെത്തി. വിചാരണക്കോടതിയില് വിശ്വാസമില്ലെന്നും വിധിയില് തനിക്ക് അത്ഭുതമൊന്നുമില്ലെന്നും സാമൂഹമാധ്യമ അക്കൗണ്ടില് പങ്കുവച്ച കുറിപ്പില് അതിജീവിത വ്യക്തമാക്കി. വിധി പ്രസ്താവിച്ച ശേഷം ആദ്യമായാണ് അതിജീവിത പ്രതികരിക്കുന്നത്.
ഒന്നാം പ്രതി തന്റെ ഡ്രൈവറാണെന്ന വാദം ശുദ്ധ നുണയാണെന്ന് അതിജീവിത കുറിപ്പില് പറഞ്ഞു. 2020-ന്റെ അവസാനത്തോടെ തന്നെ കേസില് ചില അന്യായമായ നീക്കങ്ങള് നടക്കുന്നതായി തനിക്ക് ബോധ്യപ്പെട്ടിരുന്നുവെന്നും അവര് വ്യക്തമാക്കി. കുറ്റാരോപിതരില് ഒരാളുടെ കാര്യത്തിലേക്ക് കേസ് അടുക്കുമ്പോള് മാത്രം, അതുവരെ കൈകാര്യം ചെയ്തിരുന്ന രീതിയില് നിന്ന് അന്വേഷണം വഴിമാറുന്നതായി പ്രോസിക്യൂഷനും മനസ്സിലായിരുന്നുവെന്നും കുറിപ്പില് ചൂണ്ടിക്കാട്ടുന്നു.