ന്യൂഡല്ഹി: അശ്ലീലവും ലൈംഗികച്ചുവയുള്ളതുമായ ഉള്ളടക്കങ്ങള് സംപ്രേഷണം ചെയ്തതായി കണ്ടെത്തിയ അഞ്ച് ഒടിടി പ്ലാറ്റ്ഫോമുകള്ക്ക് കേന്ദ്ര സര്ക്കാര് വിലക്കേര്പ്പെടുത്തി. വാര്ത്താ വിതരണ പ്രക്ഷേപണ മന്ത്രാലയമാണ് നടപടി സ്വീകരിച്ചത്. മൂഡ് എക്സ് വിഐപി, കോയല് പ്ലേ പ്രോ, ഡിജി മൂവിപ്ലെക്സ്, ഫീല്, ജുഗ്നു എന്നീ പ്ലാറ്റ്ഫോമുകളാണ് നിരോധനത്തിന് വിധേയമായത്. വിവിധ മന്ത്രാലയങ്ങളുമായി ആലോചിച്ച ശേഷമാണ് നടപടി. ആഭ്യന്തര മന്ത്രാലയം, വനിതാ-ശിശു വികസന മന്ത്രാലയം, ഇലക്ട്രോണിക്സ്, വിവരസാങ്കേതികവിദ്യ മന്ത്രാലയം എന്നിവരും ചര്ച്ചയില് പങ്കെടുത്തു.
കൂടാതെ ഫെഡറേഷന് ഓഫ് ഇന്ത്യന് ചേംബേഴ്സ് ഓഫ് കൊമേഴ്സ് & ഇന്ഡസ്ട്രി, കോണ്ഫെഡറേഷന് ഓഫ് ഇന്ത്യന് ഇന്ഡസ്ട്രി എന്നിവയുടെ സഹകരണത്തോടെയാണ് ആപ്പുകളുടെ ഉള്ളടക്കം വിലയിരുത്തിയത്. 2021 ലെ ഐടി നിയമങ്ങളിലെ ഇന്റര്മീഡിയറി മാര്ഗനിര്ദേശങ്ങളും ഡിജിറ്റല് മീഡിയ എത്തിക്സ് കോഡും (Rule 3(1)(b)) പ്രകാരമാണ് നടപടി. അശ്ലീലമോ, ലൈംഗികച്ചുവയുള്ളതോ, സ്വകാര്യത ലംഘിക്കുന്നതോ, ലിംഗാടിസ്ഥാനത്തില് അപമാനിക്കുന്നതോ, വംശീയമായി വെറുപ്പ് പ്രചരിപ്പിക്കുന്നതോ ആയ ഉള്ളടക്കം പ്രസിദ്ധീകരിക്കുന്നത് ചട്ടവിരുദ്ധമാണെന്ന് നിയമം വ്യക്തമാക്കുന്നു.
ഇതിന് മുമ്പ് 2025 ജൂലൈയില് സമാനമായ കുറ്റങ്ങള് ചുമത്തി 25 ഒടിടി പ്ലാറ്റ്ഫോമുകളുമായി ബന്ധപ്പെട്ട ആപ്പുകള്ക്കെതിരെയും സര്ക്കാര് നടപടി സ്വീകരിച്ചിരുന്നു. നിയമപരമായ ബാധ്യതകള് പാലിക്കാത്ത പക്ഷം ഐടി ആക്ട് സെക്ഷന് 79 പ്രകാരമുള്ള സംരക്ഷണം നഷ്ടമാകുമെന്നും, തുടര്നടപടികള്ക്കും പ്രോസിക്യൂഷനും വിധേയരാകേണ്ടിവരുമെന്നും കേന്ദ്രം മുന്നറിയിപ്പ് നല്കി. ഒടിടി പ്ലാറ്റ്ഫോമുകളിലെ ഉള്ളടക്കങ്ങള്ക്ക് മേല് നിരീക്ഷണം ശക്തമാക്കിയിരിക്കുന്നതിന്റെ ഭാഗമായാണ് പുതിയ നടപടി.