പത്താന്കോട്: ഇന്ത്യയില് നിന്നുള്ള രഹസ്യവിവരങ്ങള് പാക്കിസ്ഥാനിലേക്ക് കൈമാറുന്നതിനായി 15 വയസ്സുള്ള ബാലനെ പാക്കിസ്ഥാന് രഹസ്യാന്വേഷണ ഏജന്സിയായ ഐഎസ്ഐ ചാരനാക്കിയതായി പഞ്ചാബ് പൊലീസ് കണ്ടെത്തി. ചാരപ്രവര്ത്തനവുമായി ബന്ധപ്പെട്ട അന്വേഷണത്തില് ബാലനെ കഴിഞ്ഞ ദിവസം പൊലീസ് അറസ്റ്റ് ചെയ്തു.
ജമ്മുവിലെ സാംബ ജില്ലയില് താമസിക്കുന്ന ഈ 15കാരന് കഴിഞ്ഞ ഒരു വര്ഷമായി മൊബൈല് ഫോണ് വഴി പാക്കിസ്ഥാനിലേക്ക് രഹസ്യവിവരങ്ങള് കൈമാറിയിരുന്നുവെന്ന് പൊലീസ് കണ്ടെത്തി. പ്രായപൂര്ത്തിയാകാത്തവരെ ചാരപ്രവര്ത്തനത്തിനായി ഉപയോഗിക്കുന്നുവെന്ന് ഈ അറസ്റ്റിലൂടെ പുറത്തുവന്നതെന്ന് പൊലീസ് വ്യക്തമാക്കി.
പോലീസ് ചോദ്യം ചെയ്യലില്, തനിക്കൊപ്പം കൂടുതല് പേര് ഈ ചാരസംഘത്തിലുണ്ടെന്ന വിവരം കുട്ടി മൊഴി നല്കിയിട്ടുണ്ട്. ഇതോടെ കൂടുതല് പ്രായപൂര്ത്തിയാകാത്ത കുട്ടികളെ ഐഎസ്ഐ ചാരപ്രവര്ത്തനത്തിന് ഇരയാക്കിയിട്ടുണ്ടോയെന്ന സംശയവും ശക്തമായിട്ടുണ്ട്. സംഭവത്തില് വിശദമായ അന്വേഷണം ആരംഭിച്ചതായി പത്താന്കോട് പൊലീസ് സൂപ്രണ്ട് ദല്ജീന്ദര് സിങ് ദിലന് അറിയിച്ചു.
അതേസമയം, പാക്കിസ്ഥാനിലേക്ക് രഹസ്യവിവരങ്ങള് കൈമാറിയ കേസില് സുനില്കുമാര് എന്നയാളെയും പൊലീസ് പിടികൂടി. അമ്പാല വ്യോമസേനാ കേന്ദ്രത്തില് അറ്റകുറ്റപ്പണി നടത്തിയിരുന്ന കരാറുകാരനായിരുന്നു ഇയാള്. പാക്കിസ്ഥാനിലെ ഒരു സ്ത്രീയുമായി സുനില്കുമാര് ബന്ധത്തിലായിരുന്നുവെന്നും, വ്യോമതാവളത്തിലെ ചിത്രങ്ങള് ഇയാള് കൈമാറിയതായും അന്വേഷണത്തില് കണ്ടെത്തി. ഈ കേസില് അമ്പാല പൊലീസ് അന്വേഷണം നടത്തിവരികയാണ്.