മലപ്പുറം: ക്ഷേമ പെന്ഷന് തട്ടിപ്പില് പൊതുഭരണ വകുപ്പിലെ ജീവനക്കാരായ 6 പാര്ട്ട് ടൈം സ്വീപ്പര്മാരെ പിരിച്ചു വിടണമെന്ന് പൊതു ഭരണ അഡി. സെക്രട്ടറി നിര്ദേശം നല്കി. 18% പലിശ നിരക്കില് പണം തിരികെ പിടിക്കാനും നിര്ദേശം. സംഭവത്തില് സര്ക്കാര് ഉദ്യോഗസ്ഥര്ക്കെതിരെ കഴിഞ്ഞ ദിവസം വകുപ്പ്തല നടപടി ആരംഭിച്ചിരുന്നു. ഇതിന്റെ ഭാഗമായി മണ്ണ് സംരക്ഷണ വകുപ്പിലെ ആറ് ഉദ്യോഗസ്ഥരെ സസ്പെന്ഡ് ചെയ്തിരുന്നു.
1458 സര്ക്കാര് ജീവനക്കാര് അനര്ഹമായി ക്ഷേമ പെന്ഷന് കൈപറ്റുന്നുണ്ടെന്ന് ധനവകുപ്പ് കണ്ടെത്തിയിരുന്നു. ഇവരുടെ പട്ടിക അതാത് വകുപ്പുകള്ക്ക് കൈമാറി വകുപ്പുതല അച്ചടക്ക നടപടി സ്വീകരിക്കാന് ധനവകുപ്പ് നിര്ദേശിക്കുകയും ചെയ്തു. ഇതിന്റെ അടിസ്ഥാനത്തില് മണ്ണ് സംരക്ഷണ വകുപ്പ് വിജിലന്സ് സെല്ലിലെ ആറ് ഉദ്യോഗസ്ഥരെ സസ്പെന്ഡ് ചെയ്തു കൊണ്ട് ഡയറക്ടര് ഉത്തരവ് ഇറക്കിയത്.
ഇതില് നാല് പേര് പാര്ട്ട് ടൈം സ്വീപ്പര്മാരാണ്. ഒരാള് വര്ക്ക് സുപ്രണ്ടും മറ്റൊരാള് അറ്റന്ഡറുമാണ്. ഇവര് കൈപറ്റിയ തുക 18 ശതമാനം പിഴ പലിശയോടെ തിരികെ പിടിക്കും. നിലവില് അന്വേഷണ വിധേയമായാണ് സസ്പെന്ഷന്. ഇവരുടെ വിശദീകരണം കൂടി കേട്ട ശേഷം തുടര്നടപടികളിലേക്ക് കടക്കും. വരും ദിവസങ്ങളില് മറ്റ് വകുപ്പുകളും സമാന നടപടികളിലേക്ക് നീങ്ങും.