പ്രായപൂര്ത്തിയാവാത്ത പെണ്കുട്ടിയെ ലൈംഗികാതിക്രമത്തിനിരയാക്കിയ കേസില് കര്ണാടക മുന്മുഖ്യമന്ത്രിയും ബിജെപി നേതാവുമായ ബി.എസ് യെദ്യൂരപ്പക്ക് സമന്സ് അയച്ച് പ്രത്യേക കോടതി. ഡിസംബര് രണ്ടിന് കേസ് പരിഗണിക്കുമ്പോള് പ്രതികള് ഹാജരാവണമെന്നാണ് സമന്സ്. കേസില് യെദ്യൂരപ്പയെ കൂടാതെ അരുണ് വൈ.എം, രുദ്രേഷ് മരുളസിദ്ധയ്യ, ജി. മാരിസ്വാമി എന്നിവരാണ് മറ്റ് പ്രതികള്.
ബംഗളൂരു സദാശിവനഗര് പൊലീസാണ് അതിജീവിതയുടെ അമ്മ നല്കിയ പരാതിയില് യെദ്യൂരപ്പയുടെ പേരില് പോക്സോ വകുപ്പ് ചുമത്തി കേസെടുത്തത്. 17 വയസുള്ള തന്റെ മകളെ യെദ്യൂരപ്പ വീട്ടില് വെച്ച് ലൈംഗികമായി ഉപദ്രവിച്ചു എന്നാണ് പെണ്കുട്ടിയുടെ അമ്മയുടെ പരാതി. അന്വേഷണം പിന്നീട് സര്ക്കാര് സിഐഡിക്ക് കൈമാറി. കേസ് പരിഗണിക്കുന്ന ബംഗളൂരുവിലെ ജനപ്രതിനിധികളുടെ പ്രത്യേക കോടതി യെദ്യൂരപ്പയോട് ഹാജരാകാന് ആവശ്യപ്പെട്ട് സമന്സ് അയച്ചത് ചോദ്യം ചെയ്ത് യെദ്യൂരപ്പ ഹൈക്കോടതിയെ സമീപിച്ചു. എന്നാല്, കേസ് റദ്ദാക്കണമെന്ന യെദ്യൂരപ്പയുടെ ആവശ്യം ഹൈക്കോടതി തള്ളിയിരുന്നു.
കേസില് യെദ്യൂരപ്പ വിചാരണ നേരിടണമെന്നും ഹൈക്കോടതി വിധിച്ചിരുന്നു. കേസിന്റെ വിചാരണയില് അത്യാവശ്യമല്ലെങ്കില് നേരിട്ട് ഹാജരാകാന് യെദ്യൂരപ്പയെ നിര്ബന്ധിക്കരുതെന്ന് കോടതി ഉത്തരവിട്ടു. ജസ്റ്റിസ് എം.ഐ അരുണിന്റെ സിംഗിള് ബെഞ്ചിന്റെയായിരുന്നു വിധി. ഹൈക്കോടതി വിധിക്ക് പിന്നാലെ സ്പെഷ്യല് പബ്ലിക്ക് പ്രോസിക്യൂട്ടര് അശോക് നായിക് അതിവേഗ കോടതിയെ സമീപിക്കുകയായിരുന്നു.