തിരുവനന്തപുരം: തിരുവനന്തപുരത്ത് കാറിടിച്ച് നിര്‍ത്താതെ പോയ കേസില്‍ നടന്‍ മണിയന്‍പിള്ള രാജു അറസ്റ്റില്‍. തിരുവനന്തപുരം മ്യൂസിയം പൊലീസ് ജാമ്യം ലഭിക്കാവുന്ന വകുപ്പുകളോടെയാണ് കേസെടുത്തിരിക്കുന്നത്. ഇന്നലെ രാത്രിയാണ് ട്രിവാന്‍ഡ്രം ക്ലബ്ബിന് സമീപമുണ്ടായ അപകടത്തില്‍ ഇരുചക്ര വാഹനയാത്രക്കാരായ നിവേദിത് കൃഷ്ണ,സൂരജ് എന്നിവര്‍ക്കാണ് പരിക്കേറ്റത്. അപകടത്തിന് ശേഷം മണിയന്‍പിള്ള രാജുവിന്റെ വാഹനം നിര്‍ത്താതെ പോയെന്നാണ് പരാതി.

എന്നാല്‍ ബൈക്ക് തന്റെ കാറില്‍ വന്നിടിക്കുകയായിരുന്നുവെന്ന് മണിയന്‍പിള്ള രാജു പറഞ്ഞു. ‘ കാറോടിച്ചത് ഞാന്‍ തന്നെയാണ്. സിസിടിവിയില്‍ എല്ലാമുണ്ടാകും. താനൊരു കാന്‍സര്‍ രോഗിയാണ്. കൂടാതെ ചിക്കന്‍ഗുനിയയും ബാധിച്ചിട്ടുണ്ട്. പെട്ടന്ന് പാനിക് ആയിപ്പോയതുകൊണ്ടാണ് കാറില്‍ നിന്ന് പുറത്തിറങ്ങാതിരുന്നത്. പതുക്കെയാണ് റോഡ് ക്രോസ് ചെയ്തത്. എന്തോ ശബ്ദം കേട്ട് തിരിഞ്ഞുനോക്കിയപ്പോഴാണ് ബൈക്ക് വീണുകിടക്കുന്നത് കണ്ടത്. ഉടന്‍ തന്നെ സുഹൃത്തുക്കളെ വിളിച്ച് അപകടം നടന്നിട്ടുണ്ടെന്നും ആംബുലന്‍സ് ഏര്‍പ്പാടാക്കണമെന്നും പറഞ്ഞു. രാവിലെ പൊലീസില്‍ വിളിച്ച് അറിയിക്കുകയും ചെയ്തു’. മണിയന്‍ പിള്ള രാജു പറഞ്ഞു.

അപകടത്തിന് പിന്നാലെ റോഡില്‍ നിന്ന് തെറിച്ചുവീണ യുവാക്കളുടെ കാലിനും കഴുത്തിനുമടക്കം ഗുരുതരമായി പരിക്കേറ്റിട്ടുണ്ട്. ഇവര്‍ ആശുപത്രിയില്‍ ചികിത്സയിലാണ്. അപകടം നടന്നിട്ടും മണിയന്‍ പിള്ള രാജു യുവാക്കള്‍ക്ക് പ്രഥമ ശുശ്രൂഷ നല്‍കാനോ രക്ഷിക്കാനോ ശ്രമിച്ചില്ലെന്നും വാഹനം നിര്‍ത്താതെ ഓടിച്ചുപോയെന്നും പരാതിയില്‍ പറയുന്നു. പരാതിയുടെ അടിസ്ഥാനത്തിലാണ് നടനെതിരെ പൊലീസ് കേസെടുത്തത്. അറസ്റ്റ് രേഖപ്പെടുത്തിയതിന് പിന്നാലെ നടനെ വൈദ്യപരിശോധനയ്ക്ക് ഹാജരാക്കി.

കൊച്ചി: സംസ്ഥാനത്ത് സ്വര്‍ണവില വീണ്ടും കുറഞ്ഞു. ഓള്‍ കേരള ഗോള്‍ഡ് ആന്‍ഡ് സില്‍വര്‍ മെര്‍ച്ചന്റ്‌സ് അസോസിയേഷന്‍ പുറത്തുവിട്ട കണക്കുകള്‍ പ്രകാരം 22 കാരറ്റ് സ്വര്‍ണത്തിന്റെ വില ഗ്രാമിന് 190 രൂപ കുറഞ്ഞ് 13,965 രൂപയായി.

ഇതോടെ ഒരു പവന്‍ 22 കാരറ്റ് സ്വര്‍ണത്തിന് 1,520 രൂപയുടെ കുറവാണ് രേഖപ്പെടുത്തിയത്. ഒരു പവന്‍ സ്വര്‍ണത്തിന്റെ ഇന്നത്തെ വില 1,11,720 രൂപയായി. സ്വര്‍ണാഭരണം വാങ്ങാന്‍ ഉദ്ദേശിക്കുന്നവര്‍ ജിഎസ്ടിയും പണിക്കൂലിയും ചേര്‍ത്ത് ആഭരണശാലകള്‍ ഈടാക്കുന്ന അന്തിമ വില പ്രത്യേകം ശ്രദ്ധിക്കണമെന്ന് വ്യാപാരികള്‍ അറിയിച്ചു.

ഇന്നത്തെ 18 കാരറ്റ് സ്വര്‍ണവില ഗ്രാമിന് 11,475 രൂപയാണ്. ഇതേ വിഭാഗത്തില്‍ ഒരു പവന്‍ സ്വര്‍ണത്തിന്റെ വില 91,800 രൂപയായി. 14 കാരറ്റ് സ്വര്‍ണം ഗ്രാമിന് 8,935 രൂപയും പവന് 71,480 രൂപയുമാണ്. വെള്ളി വില ഗ്രാമിന് 275 രൂപയായി തുടരുന്നു.

കഴിഞ്ഞ കുറച്ച് ദിവസങ്ങളായി സംസ്ഥാനത്ത് സ്വര്‍ണവില ഉയര്‍ന്നും കുറഞ്ഞുമാണ് നിലകൊള്ളുന്നത്. ജനുവരി 29-ന് 22 കാരറ്റ് സ്വര്‍ണം ഗ്രാമിന് 16,395 രൂപയിലെത്തിയിരുന്നു. അന്ന് ഒരു പവന്‍ സ്വര്‍ണത്തിന് 1.31 ലക്ഷം രൂപയായിരുന്നു വില. ഇത് ചരിത്രത്തിലെ ഏറ്റവും ഉയര്‍ന്ന നിരക്കായിരുന്നു.

തുടര്‍ന്ന് ലാഭമെടുക്കുന്നതിനായി നിക്ഷേപകര്‍ വന്‍തോതില്‍ സ്വര്‍ണം വിറ്റഴിച്ചതോടെ അന്താരാഷ്ട്ര വിപണിയില്‍ വില ഇടിയുകയായിരുന്നു. പിന്നീട് വില കുറഞ്ഞപ്പോള്‍ വീണ്ടും വാങ്ങലും വില്‍പ്പനയും നടന്നതോടെയാണ് വിലയില്‍ ആവര്‍ത്തിച്ച മാറ്റങ്ങള്‍ ഉണ്ടായത്. നിലവിലെ വിലക്കുറവ് സാധാരണക്കാര്‍ക്കും വിവാഹത്തിനായി സ്വര്‍ണം വാങ്ങാന്‍ തയ്യാറെടുക്കുന്നവര്‍ക്കും നിക്ഷേപകര്‍ക്കും ആശ്വാസകരമാണെന്നാണ് വിലയിരുത്തല്‍.

കോഴിക്കോട്: സ്‌കൂള്‍വിദ്യാര്‍ത്ഥികളെ ലക്ഷ്യം വെച്ച് കഞ്ചാവ് വില്‍പ്പന നടത്താന്‍ ശ്രമിച്ച യുവാവ് കോഴിക്കോട് അറസ്റ്റില്‍. മുണ്ടിക്കല്‍ താഴം പട്ടാള മുക്ക് ഭാഗത്ത് നിന്നാണ് 12 കിലോ കഞ്ചാവുമായി ഓമശ്ശേരി സ്വദേശി പുറയില്‍ ജംഷീര്‍ (42) ഡാന്‍സാഫിന്റെ പിടിയിലായത്.

ഒഡിഷയില്‍ നിന്നു വില്പനയ്ക്കായി എത്തിച്ച കഞ്ചാവാണ് പിടികൂടിയത്. ഇയാള്‍ സഞ്ചരിച്ചിരുന്ന കാര്‍ പൊലീസ് കസ്റ്റഡിയിലെടുത്തു. ഇന്നലെ രാത്രി നടത്തിയ പരിശോധനയ്ക്കിടെയാണ് ഇയാളെ പിടികൂടിയത്. കാറിന്റെ ഡിക്കിയില്‍ ഒളിപ്പിച്ച നിലയിലായിരുന്നു കഞ്ചാവ്.

നേരത്തെ നാല് കിലോ കഞ്ചാവ് പിടികൂടിയ കേസില്‍ ജംഷീര്‍ അറസ്റ്റിലായിരുന്നുവെന്നും, ആ കേസില്‍ ജാമ്യത്തിലിറങ്ങിയതിന് പിന്നാലെയാണ് വീണ്ടും കഞ്ചാവുമായി പിടിയിലായതെന്നും പൊലീസ് അറിയിച്ചു. വിദ്യാര്‍ഥികളെ ലക്ഷ്യം വെച്ചാണ് കഞ്ചാവ് എത്തിച്ചതെന്നാണ് പ്രതി മൊഴി നല്‍കിയിരിക്കുന്നത്.