തൃശൂര്: പ്രശസ്ത റാപ്പറും ഗാനരചയിതാവുമായ വേടന് (ഹിരണ്ദാസ് മുരളി) വിവാഹിതനായി. സുഹൃത്തും എഴുത്തുകാരിയുമായ നവമി ലതയാണ് വധു. ചൊവ്വാഴ്ച വൈകിട്ട് 5:30-ഓടെ തൃശൂര് മുളങ്കുന്നത്തുകാവിലെ വേടന്റെ വീട്ടില് വെച്ചായിരുന്നു വിവാഹ ചടങ്ങുകള് നടന്നത്. സബ് രജിസ്ട്രാര് ഓഫീസിലെ തിരക്ക് പരിഗണിച്ച് ഉദ്യോഗസ്ഥര് വേടന്റെ വീട്ടിലെത്തി വിവാഹ രജിസ്ട്രേഷന് നടപടികള് പൂര്ത്തിയാക്കുകയായിരുന്നു.
തികച്ചും ലളിതമായി നടന്ന ചടങ്ങില് അടുത്ത ബന്ധുക്കളും സുഹൃത്തുക്കളും മാത്രമാണ് പങ്കെടുത്തത്. ഇന്ത്യന് ഭരണഘടനയെ സാക്ഷിയാക്കി വിവാഹിതരാകുന്നു എന്ന വേടന്റെ നേരത്തെയുള്ള പ്രഖ്യാപനം സമൂഹ മാധ്യമത്തില് വലിയ ശ്രദ്ധ നേടിയിരുന്നു.
വേടന്റെ ഹിറ്റ് ഗാനമായ ‘മോണലോവ’ തന്റെ സുഹൃത്ത് നവമി ലതയെ കുറിച്ചുള്ളതാണെന്ന് അദ്ദേഹം നേരത്തെ വെളിപ്പെടുത്തിയിരുന്നു.
‘മഞ്ഞുമ്മല് ബോയ്സ്’ എന്ന ചിത്രത്തിലെ ‘കുതന്ത്രം’ എന്ന ഗാനത്തിലൂടെ മികച്ച ഗാനരചയിതാവിനുള്ള സംസ്ഥാന ചലച്ചിത്ര അവാര്ഡ് വേടന് നേടിയിരുന്നു.