മണ്ണഞ്ചേരി: മണ്ണഞ്ചേരി പഞ്ചായത്തിലെ മണ്ണഞ്ചേരി ഗവ. ഹൈസ്കൂള് ഒന്നാം നമ്പര് ബൂത്തില് നടന്ന റീ പോളിംഗ് പൂര്ത്തിയായി. ആകെ 1077 വോട്ടര്മാരില് 772 പേര് വോട്ട് രേഖപ്പെടുത്തി. ഇതില് 368 പുരുഷന്മാരുടെയും 404 സ്ത്രീകളുടെയും വോട്ടുകളാണ്.
ഡിസംബര് 9-ന് നടന്ന വോട്ടെടുപ്പില് വോട്ടിംഗ് മെഷീന് തകരാറിലായതിനെ തുടര്ന്ന് ക്രമദോഷം ഉണ്ടായതായി വരണാധികാരിയുടെ റിപ്പോര്ട്ടില് വ്യക്തമാക്കിയിരുന്നു. തുടര്ന്ന് കമ്മീഷന് അന്നത്തെ പോളിംഗ് അസാധുവാക്കി റീ പോളിംഗ് നിര്ദ്ദേശിക്കുകയായിരുന്നു.
ആലപ്പുഴ ജില്ലാ പഞ്ചായത്ത് ആറാം നിയോജകമണ്ഡലത്തിന്റെയും ബി.34 ആര്യാട് ബ്ലോക്ക് പഞ്ചായത്ത് അഞ്ചാം നിയോജകമണ്ഡലത്തിന്റെയും പരിധിയില്പ്പെടുന്ന ജി.19 മണ്ണഞ്ചേരി ഗ്രാമപഞ്ചായത്തിന്റെ അമ്പലക്കടവ് വാര്ഡിലാണ് ബൂത്ത് സ്ഥിതിചെയ്യുന്നത്.