തിരുവനന്തപുരം: ശബരിമല സ്വര്ണക്കൊള്ളക്കേസിലെ മുഖ്യപ്രതി ഉണ്ണികൃഷ്ണന് പോറ്റിയെ അറസ്റ്റ് ചെയ്യാനുള്ള നീക്കവുമായി എന്ഫോഴ്സ്മെന്റ് ഡയറക്ടറേറ്റ് (ഇഡി). നിലവില് കസ്റ്റഡിയില് ഉള്ള പോറ്റിക്ക് ഇന്ന് ജാമ്യം ലഭിക്കുന്ന പക്ഷം, ഉടന് തന്നെ ചോദ്യം ചെയ്യലിന് ഹാജരാകാന് സമന്സ് നല്കാനാണ് ഇഡിയുടെ തീരുമാനം.
ജാമ്യം നേടി പുറത്തിറങ്ങിയാലുടന് പോറ്റിയെ ചോദ്യം ചെയ്യാനാണ് അന്വേഷണ ഉദ്യോഗസ്ഥര് തയ്യാറെടുത്തിരിക്കുന്നത്. ഇതിനായി സമന്സ് ഇതിനകം തന്നെ തയാറാക്കിയതായി ഇഡി റിപ്പോര്ട്ടുകള് അറിയിച്ചു. കോടതി ഇന്ന് ജാമ്യാപേക്ഷ പരിഗണിക്കാനിരിക്കെ, അനുകൂല ഉത്തരവ് വന്നാല് അതേ ദിവസം തന്നെ സമന്സ് അയക്കും.
സ്വര്ണക്കൊള്ളയുമായി ബന്ധപ്പെട്ട് സാമ്പത്തിക ഇടപാടുകള്, സ്വര്ണത്തിന്റെ ഉറവിടം, ഇടനിലക്കാര് എന്നിവയെ കുറിച്ച് വിശദമായി ചോദ്യം ചെയ്യാനാണ് ഇഡിയുടെ പദ്ധതി. കേസില് കൂടുതല് അറസ്റ്റുകളും നടപടികളും ഉണ്ടാകാന് സാധ്യതയുണ്ടെന്നാണ് സൂചന.