മസ്കത്ത്: ഇറാന് ഇസ്രാഈല് സംഘര്ഷത്തില് ‘മേഖലയിലെ സുരക്ഷക്ക് അടിയന്തിര ഇടപെടല് ആവശ്യംമെന്ന് ഒമാന് സുല്ത്താന് ഹൈതം ബിന് താരിഖ്. സംഘര്ഷം ലഘൂകരിക്കുന്നതിനായി അടിയന്തര ഇടപെടല് ആവശ്യപ്പെട്ട് ഗള്ഫ് നേതാക്കളുമായി ഫോണ്സംഭാഷണം നടത്തി.
കുവൈത്ത് അമീര് ശൈഖ് മിഷ്അല് അല് അഹമ്മദ് അല് ജാബര് അസ്സബാഹ്, യുഎഇ പ്രസിഡന്റ് ശൈഖ് മുഹമ്മദ് ബിന് സായിദ് അല് നഹ്യാന്, ഖത്തര് അമീര് ശൈഖ് തമീം ബിന് ഹമദ് അല്താനി, ബഹ്റൈന് രാജാവ് ഹമദ് ബിന് ഈസ അല് ഖലീഫ, സൗദി കിരീടാവകാശി മുഹമ്മദ് ബിന് സല്മാന് എന്നിവരുമായാണ് സുല്ത്താന് ചര്ച്ച നടത്തിയത്. ഇറാനിലെ സൈനിക കേന്ദ്രങ്ങള് ലക്ഷ്യമിട്ടുള്ള ആക്രമണങ്ങള് മേഖലയുടെ സ്ഥിരതയെ തകര്ക്കുമെന്നും നയതന്ത്ര ചര്ച്ചകളിലൂടെയും സംഭാഷണങ്ങളിലൂടെയും പ്രശ്നപരിഹാരം കണ്ടെത്തണമെന്നും സുല്ത്താന് പറഞ്ഞു.