മലപ്പുറം: എസ്.ഐ.ആര് എന്യൂമേറേഷന് ഫോം വിതരണ ക്യാമ്പിനിടെ മുണ്ട് പൊക്കിക്കാണിച്ച ബി.എല്.ഒക്കെതിരെ നടപടി. തൃപ്രങ്ങോട് പഞ്ചായത്തിലെ 38-ാം നമ്പര് ബൂത്തിലെ ആനപ്പടി വെസ്റ്റ് എല്.പി. സ്കൂളില് ചുമതലയുള്ള ബി.എല്.ഒ വാസുദേവനെ ചുമതലയില് നിന്ന് മാറ്റിയതായി ജില്ല കലക്ടര് അറിയിച്ചു. സര്ക്കാര് ജീവനക്കാര് പാലിക്കേണ്ട പെരുമാറ്റച്ചട്ടങ്ങള് ലംഘിച്ചതിനാലാണ് നടപടി.
സംഭവത്തിന് കാരണം കാണിക്കല് നോട്ടീസ് നല്കുമെന്ന് കലക്ടര് അറിയിച്ചു. വിശദീകരണം ലഭിച്ച ശേഷമാണ് തുടര്നടപടികള് തീരുമാനിക്കുക.
കഴിഞ്ഞ വ്യാഴാഴ്ചയാണ് സംഭവം നടന്നത്. പ്രായമായവരുള്പ്പെടെ ജനങ്ങളെ വെയിലത്ത് കാത്തുനിര്ത്തുന്നതിനെ കുറിച്ച് നാട്ടുകാര് ചോദ്യം ചെയ്തതിന് പിന്നാലെ പ്രകോപിതനായി മുണ്ട് പൊക്കി നഗ്നത പ്രദര്ശിപ്പിക്കുകയായിരുന്നു വാസുദേവന്. സ്ത്രീകള് ഉള്പ്പെടെയുള്ളവര് സാന്നിധ്യത്തിലായിരിക്കെയാണ് ഈ അശ്ലീലപ്രവര്ത്തനം നടന്നത്. സംഭവത്തിന്റെ ദൃശ്യങ്ങള് സമൂഹമാധ്യമങ്ങളില് വ്യാപകമായി പ്രചരിച്ചിരുന്നു.
താന് പെട്ടെന്നുള്ള പ്രകോപനത്തിലാണ് ഇത്തരം പ്രവൃത്തി ചെയ്തത് എന്നാണ് വാസുദേവന്റെ പ്രതികരണം.