എസ്ഐആറില് പാര്ലമെന്റില് പ്രതിപക്ഷ പ്രതിഷേധം. സഭാ നടപടികള് നിര്ത്തിവെച്ച് ചര്ച്ച ചെയ്യണമെന്ന് പ്രതിപക്ഷം ആവശ്യപ്പെട്ടു. എസ്ഐആറില് സഭ നിര്ത്തിവെച്ച ചര്ച്ച ചെയ്യണമെന്ന് ആവശ്യപ്പെട്ട് കെസി വേണുഗോപാല്, അബ്ദുല് വഹാബ്, ജോണ് ബ്രിട്ടാസ് ഉള്പ്പെടെയുള്ള എംപിമാര് അടിയന്തര പ്രമേയത്തിന് നോട്ടീസ് നല്കി. ലോക്സഭാ നടപടികള് ആരംഭിച്ച ഉടന് തന്നെ പ്രതിപക്ഷം പ്രതിഷേധവുമായി നടുത്തളത്തിലേക്ക് ഇറങ്ങി.
അതേസമയം, പ്രതിഷേധത്തെ തുടര്ന്ന് സഭാ നടപടികള് രണ്ടുതവണ നിര്ത്തിവെച്ചു. രാജ്യസഭയില് ഉപരാഷ്ട്രപതിയുടെ അനുമോദനങ്ങള്ക്ക് പിന്നാലെ പ്രതിപക്ഷം എസ്ഐആര് വിഷയം ഉയര്ത്തി. മുന് ഉപ രാഷ്ട്രപതി ജഗദീപ് ധന്ഖഡിന് യാത്രയയപ്പ് പോലും നല്കാന് സാധിച്ചില്ലെന്നും അധ്യക്ഷന് ഭരണ- പ്രതിപക്ഷത്തെ ഒരുപോലെ പരിഗണിക്കണമെന്നും കോണ്ഗ്രസ് അധ്യക്ഷന് മല്ലികാര്ജുന് ഖര്ഗെ പറഞ്ഞു.