കൊല്ക്കത്ത: കൊല്ക്കത്തയിലെ ബി.സി. റോയ് ആശുപത്രിയില് ആറുമാസം പ്രായമുള്ള കുഞ്ഞിനെ തട്ടിക്കൊണ്ടുപോയ സംഭവത്തില് സബീന ബീബി എന്ന യുവതിയെ പൊലീസ് അറസ്റ്റ് ചെയ്തു. അമ്മയോട് നഴ്സാണെന്ന് ധരിപ്പിച്ച് സൗഹൃദം സൃഷ്ടിച്ച ശേഷം കുഞ്ഞിനെ കൈക്കലാക്കിയാണ് യുവതി ഒളിവിലായത്. ചികിത്സയ്ക്കായി ആശുപത്രിയില് എത്തിയ അമ്മയോടൊപ്പം ബസ്സില് യാത്ര ചെയ്യുന്നതിനിടെയാണ് സബീന ബന്ധം സ്ഥാപിച്ചത്. ആശുപത്രിയില് ഒത്തുചെന്ന ശേഷം, ഡോക്ടറെ കാണാന് പോയതിനു പിന്നാലെ അമ്മയോട് മരുന്ന് വാങ്ങാന് പോകണമെന്ന് പറഞ്ഞ് കുഞ്ഞിനെ കൈയില് വാങ്ങി നിന്ന ഇവര് അതിനിടെ കുഞ്ഞുമായി കടന്നുകളയുകയായിരുന്നു.കുഞ്ഞിനെ കാണാതായതോടെ പൊലീസില് പരാതി നല്കുകയും, ആശുപത്രിയത്തിലെ സി.സി.ടി.വി ദൃശ്യങ്ങള് പരിശോധിച്ച് നീല ജാക്കറ്റ് ധരിച്ച സബീനയെ തിരിച്ചറിയുകയും ചെയ്തു. അതിന്റെ അടിസ്ഥാനത്തില് എല്ലാ പൊലീസ് സ്റ്റേഷനുകളിലും വിവരങ്ങള് പങ്കുവെച്ചതോടെ, ഒരു കടയുടമ ഇവരെ തിരിച്ചറിയുകയായിരുന്നു. സബീന താന് ഗര്ഭിണിയാണെന്നും പ്രസവശേഷം കുഞ്ഞിനെയും കൊണ്ട് എത്തിയതാണെന്നും അയല്ക്കാരോട് പറഞ്ഞിരുന്നതായി കടയുടമ പൊലീസിനോട് അറിയിച്ചു. തുടര്ന്ന് നടത്തിയ തിരച്ചിലില് ആശുപത്രിയില് നിന്ന് 33 കിലോമീറ്റര് അകലെയുള്ള സബീനയുടെ വീടിലാണ് പൊലീസ് കുഞ്ഞിനെ കണ്ടെത്തിയത്. ഇവരെ പിന്നീട് ഫുല്ബഗന് പൊലീസിനു കൈമാറി. സംഭവത്തെ തുടര്ന്ന് ബി.സി. റോയ് ആശുപത്രി പ്രിന്സിപ്പല് ഡോ. ദിലീപ് പാല് മാതാപിതാക്കളോട് പ്രത്യേക ജാഗ്രത പാലിക്കണമെന്നു നിര്ദേശിച്ചു. ഒ.പി.ഡിയില് അന്യര്ക്കു കുഞ്ഞിനെ കൈമാറുന്നത് ഒഴിവാക്കണമെന്ന് അദ്ദേഹം മുന്നറിയിപ്പ് നല്കി.