തിരുവനന്തപുരം: തന്നെ വ്യക്തിഹത്യ ചെയ്യുന്ന തരത്തില് വീഡിയോകള് നിര്മിച്ച് പ്രചരിപ്പിക്കുന്ന യൂട്യൂബര്മാര്ക്കെതിരെ നടപടി വേണമെന്ന് അഭ്യര്ത്ഥിച്ച് പ്രമുഖ സീരിയല് താരം രേഖാ രതീഷ്. മുഖ്യമന്ത്രി പിണറായി വിജയനെയും സംസ്ഥാന സര്ക്കാരിനെയും അഭിസംബോധന ചെയ്തുകൊണ്ട് സമൂഹമാധ്യമത്തില് പങ്കുവെച്ച വീഡിയോയിലാണ് താരം ദുരനുഭവം വിവരിച്ചത്. കഴിഞ്ഞ കുറച്ച് മാസങ്ങളായി ചില യൂട്യൂബ് ചാനലുകള് തനിക്കെതിരെ വ്യാജ വാര്ത്തകളും മോശം ക്യാപ്ഷനുകളും നല്കി വീഡിയോകള് പ്രചരിപ്പിക്കുന്നുണ്ടെന്ന് രേഖ പറഞ്ഞു. ഇത് തന്റെ ജീവിതത്തെ സാരമായി ബാധിക്കുന്നുണ്ടെന്നും താരം വ്യക്തമാക്കി.
മാനസിക സമ്മര്ദ്ദം താങ്ങാനാകുന്നില്ലെന്നും എനിക്കെന്തെങ്കിലും സംഭവിച്ചാല് അതിനുത്തരവാദികള് ഈ യൂട്യൂബര്മാരായിരിക്കുമെന്ന് നിറകണ്ണുകളോടെ താരം പറയുന്നുണ്ട്. കഴിഞ്ഞ എട്ടു മാസമായി ജോലിയില്ലാതെ ഫ്ലാറ്റില് കഴിയുകയാണെന്നും, ഒന്പതാം ക്ലാസ്സില് പഠിക്കുന്ന മകന്റെ ഏക ആശ്രയം താനാണെന്നും രേഖ പറയുന്നു.
തനിക്ക് വേണ്ടി മാത്രമല്ല, സമാനമായ സൈബര് ആക്രമണങ്ങള് നേരിടുന്ന തന്റെ സഹപ്രവര്ത്തകര്ക്കും മറ്റ് സ്ത്രീകള്ക്കും വേണ്ടിയാണ് ഈ അപേക്ഷയെന്നും, ഇതിനെതിരെ കര്ശന നടപടി സ്വീകരിക്കണമെന്നും രേഖ അഭ്യര്ത്ഥിച്ചു.