തിരുവനന്തപുരം: ആഭ്യന്തര ക്രിക്കറ്റിലെ പ്രമുഖ ടി20 ടൂര്ണമെന്റ് ആയ സയ്യിദ് മുഷ്താഖ് അലി ട്രോഫിക്ക് നാളെ തുടക്കമാവുന്നു. ആദ്യ മത്സരത്തില് ഒഡീഷയാണ് കേരളത്തിന്റെ എതിരാളി. ക്യാപ്റ്റന് സഞ്ജു സാംസന്റെ നേതൃത്വത്തിലാണ് ഈ തവണ കരുത്തുറ്റ ബന്ധിപ്പിച്ച ടീമുമായി കേരളം രംഗത്തെത്തുന്നത്.
യുവത്വവും പരിചയസമ്പത്തും ഒരുമിച്ചുള്ള ടീമില് കെഎസിഎല്ലില് മികവ് തെളിയിച്ച താരങ്ങള്ക്കും അവസരം ലഭിച്ചിട്ടുണ്ട്. സഞ്ജുവിന്റെ സഹോദരനും കെഎസിഎല് ടീം കോച്ചി ബ്ലൂ ടൈഗേഴ്സ് നായകനുമായ സാലി വി. സാംസണും ടീമില് ഉള്പ്പെട്ടിട്ടുണ്ട്. കേരളത്തിനുവേണ്ടി സഹോദരങ്ങള് ഒന്നിച്ചിറങ്ങുന്ന അപൂര്വ നിമിഷവുമാകും ഇത്.
വൈസ് ക്യാപ്റ്റന് അഹമ്മദ് ഇമ്രാനൊപ്പം സല്മാന് നിസാര്, മുഹമ്മദ് അസറുദ്ദീന്, വിഷ്ണു വിനോദ്, രോഹന് കുന്നുമ്മല് എന്നിവരുടെ സാന്നിദ്ധ്യത്തോടെ ശക്തമായ ബാറ്റിംഗ് നിരയാണ് കേരളത്തിനുള്ളത്. ഓള്റൗണ്ടര് വിഭാഗത്തില് അഖില് സ്കറിയ, ഷറഫുദ്ദീന്, അങ്കിത് ശര്മ്മ എന്നിവര് ടീമിന് ബഹുമുഖ കരുത്തേകും.
ബൗളിങ് നിരയില് നിധീഷ്, കെ.എം ആസിഫ്, വിഘ്നേഷ് പുത്തൂര് എന്നിവരെ കൂടാതെ കെഎസിഎല്ലില് മികവു തെളിയിച്ച സിബിന് ഗിരീഷ്, കൃഷ്ണദേവന്, അബ്ദുല് ബാസിദ് എന്നിവരും ടീമിലുണ്ട്.
വലിയ പ്രതീക്ഷകളോടെയാണ് കേരളം ഇത്തവണ മുഷ്താഖ് അലി ട്രോഫിയില് തുടക്കം കുറിക്കുന്നത്.