200 note – Chandrika Daily

യു.പി എ.ടി.എമ്മില്‍ 200 രൂപയുടെ കള്ളനോട്ടുകള്‍

Test User — Wed, 26 Oct 2022 15:45:54 +0000

ലഖ്‌നോ: ഉത്തര്‍പ്രദേശിലെ അമേഠിയില്‍ എ.ടി.എമ്മില്‍ നിന്നും കള്ളനോട്ട് ലഭിച്ചു. 200 രൂപയുടെ രണ്ട് കള്ളനോട്ടുകളാണ് ലഭിച്ചത്. സംഭവത്തില്‍ പോലീസ് അന്വേഷണം ആരംഭിച്ചിട്ടുണ്ട്.

നോട്ടിന് മുകളില്‍ ‘ചില്‍ഡ്രന്‍ ബാങ്ക് ഓഫ് ഇന്ത്യ’ എന്നും ‘ഫുള്‍ ഓഫ് ഫണ്‍’ എന്നും എഴുതിയിരുന്നത് കണ്ടാണ് കള്ളനോട്ടാണെന്ന് തിരിച്ചറിഞ്ഞത്. അതോടെ കള്ളനോട്ട് ലഭിച്ചവര്‍ സമൂഹ മാധ്യമത്തില്‍ വീഡിയോ പകര്‍ത്തി പ്രചരിപ്പിച്ചു. വീഡിയോ വൈറലായതോടെ കള്ളനോട്ട് കാണാന്‍ നാട്ടുകാര്‍ ഓടിക്കൂടി.

5000 രൂപ പിന്‍വലിച്ച മറ്റൊരാള്‍ക്കും സമാന അനുഭവം ഉണ്ടായതായി നാട്ടുകാര്‍ പറഞ്ഞു.

ചോക്കലേറ്റ് ബ്രൗണ്‍ നിറത്തില്‍ പുതിയ പത്തുരൂപാ നോട്ട്

chandrika — Thu, 04 Jan 2018 07:57:47 +0000

മുംബൈ: മഹാത്മഗാന്ധി സീരീസില്‍പ്പെട്ട പത്തുരൂപയുടെ പുതിയ നോട്ട് റിസര്‍വ് ബാങ്ക് ഉടന്‍ പുറത്തിറക്കുന്നു.

പത്തുരൂപയുടെ 100 കോടി നോട്ടുകളുടെ അച്ചടി ഇതിനകംതന്നെ പൂര്‍ത്തിയാക്കിയതായി ആര്‍ബിഐ ഉന്നത വൃത്തങ്ങള്‍ അറിയിച്ചതായി റിപ്പോര്‍ട്ട്.

ചോക്കലേറ്റ് ബ്രൗണ്‍ കളറിലുള്ള നോട്ടാണ് പുറത്തിറങ്ങുന്നത്. കൊണാര്‍ക് സൂര്യക്ഷേത്രത്തിന്റെ ചിത്രം പതിച്ചാണ് നോട്ടിന്റെ പുതിയ ഡിസൈന്‍. അതേസമയം കൊണാര്‍ക് സൂര്യക്ഷേത്രത്തിന്റെ ചിത്രം നേരത്തെ ഇരുപത് രൂപാ നോട്ടില്‍ ഉപയോഗിച്ചിരുന്നതാണ്.

പുതിയ ഡിസൈന്‍ കഴിഞ്ഞയാഴ്ചയാണ് സര്‍ക്കാര്‍ അംഗീകരിച്ചത്. അതേസമയം നോട്ടിന്റെ രൂപം ഇതുവരെ പുറത്തുവിട്ടിട്ടില്ല.
ഇതിനുമുമ്പ് 2005ലാണ് പത്ത് രൂപ നോട്ടിന്റെ ഡിസൈന്‍ മാറ്റിയത്. നോട്ട് നിരോധനത്തിന് ശേഷം കഴിഞ്ഞ ആഗസ്തില്‍ മഹാത്മാഗാന്ധി സീരിസിലുള്ള പുതിയ 200ന്റെയും 50ന്റെയും നോട്ടുകള്‍ പുറത്തിറക്കിയിരുന്നു.

2016 നവംബര്‍ 8ന് 1000 ത്തിന്റെയും 500ന്റെയും നോട്ടുകള്‍ നരേന്ദ്രമമോദി സര്‍ക്കാര്‍ പിന്‍വലിച്ചതോടെയാണ് ആര്‍ബിഐ പുതിയ നോട്ടുകള്‍ പുറത്തിറക്കാന്‍ തുടങ്ങിയത്. നിലവില്‍ 2000 ത്തിന്റെ നോട്ടാണ് രാജ്യത്തെ ഏറ്റവും മൂല്യമേറിയ കറന്‍സി. എന്നാല്‍ 2000ത്തിന്റെ നോട്ടുകള്‍ ഉടന്‍ പിന്‍വലിക്കാന്‍ സാധ്യതയുള്ളതായി ആര്‍ബിഐ സൂചന നല്‍കിയിരുന്നു.
നിലവില്‍ വിപണിയില്‍ കറന്‍സി ഇടപാടുകള്‍ കുറക്കാനും നോട്ടുഅനുപാതം തുല്യതയിലെത്തിക്കാനും ലക്ഷ്യമിട്ടാണ് ആര്‍ബിഐ ചെറിയ തുകകളുടെ നോട്ടുകള്‍ ഇറക്കുന്നത്.

200 രൂപയുടെ നോട്ട് വെള്ളിയാഴ്ച പുറത്തിറക്കും; പ്രത്യേകതകള്‍

chandrika — Thu, 24 Aug 2017 15:51:20 +0000

ന്യൂഡല്‍ഹി: രാജ്യത്ത് പുതിയ 200 രൂപയുടെ നോട്ടുകള്‍ വെള്ളിയാഴ്ച പുറത്തിറങ്ങും. മഹാത്മാഗാന്ധി സീരീസില്‍പ്പെട്ട നോട്ടുകള്‍ റിസര്‍വ് ബാങ്ക് ഗവര്‍ണര്‍ ഊര്‍ജിത് പട്ടേലിന്റെ ഒപ്പോടു കൂടിയാണ് പുറത്തിറങ്ങുന്നത്. നേരത്തെ അടുത്തമാസം ആദ്യവാരം നോട്ട് പുറത്തിറക്കുമെന്നായിരുന്നു റിപ്പോര്‍ട്ട്. ആര്‍.ബി.ഐയുടെ തിരഞ്ഞെടുക്കപ്പെട്ട ഓഫീസുകളില്‍നിന്നും ചില ബാങ്കുകള്‍ വഴിയുമായിരിക്കും നോട്ടുകള്‍ പുറത്തിറക്കുക. സുരക്ഷാമാനദണ്ഡങ്ങള്‍ കൃത്യമായി പാലിച്ചാണ് പുതിയനോട്ട് പുറത്തിറക്കുന്നത്. രാജ്യത്തിന്റെ സാംസ്‌കാരിക പൈതൃകം വിളിച്ചോതുന്ന സാഞ്ചി സ്തൂപത്തിന്റെ ചിത്രമാണ് 200 രൂപാ നോട്ടിന്റെ മുഖ്യ ഘടകം. ലോകത്തിലെ ഏറ്റവും പ്രാചീനമായ ബുദ്ധമത സ്മാരകങ്ങളാണ് മധ്യപ്രദേശിലെ സാഞ്ചിയിലുള്ളത്. പുറകുവശത്തായാണ് ചിത്രം ഉള്‍ക്കൊള്ളിച്ചിരിക്കുന്നത്. കടുംനിറത്തിലുള്ള മഞ്ഞയാണ് നോട്ടിന് അടിസ്ഥാന നിറം. സ്വച്ഛ് ഭാരത് പദ്ധതിയുടെ ലോഗോയും മുദ്രാവാക്യവും നോട്ടില്‍ ഉള്‍പ്പെടുത്തിയിട്ടുണ്ട്.

പ്രത്യേകതകള്‍:
മുന്‍ഭാഗം
ദേവനാഗരിയിലും അക്കത്തിലും 200 എന്ന് എഴുതിയിരിക്കുന്നു.
നടുവിലായി മഹാത്മഗാന്ധിയുടെ പോര്‍ട്രെയിറ്റ്.
ആര്‍.ബി.ഐ എന്ന് ഇംഗ്ലീഷിലും ഭാരത് എന്ന് ഹിന്ദിയിലും ചെറിയ അക്ഷരങ്ങളിലായി എഴുതിയിരിക്കുന്നു.
നോട്ട് തിരിക്കുമ്പോള്‍ നീലയും പച്ചയും നിറം മാറിവരുന്ന സെക്യൂരിറ്റി ത്രെഡ്.
ആര്‍ബിഐ ഗവര്‍ണറുടെ ഒപ്പ്.
മുന്‍വശത്ത് അശോക ചക്രത്തിന്റെ എംബ്ലം.
അന്ധര്‍ക്ക് കണ്ടുപിടിക്കാനായി അടയാളം

പിന്‍ഭാഗം
ഇടതുഭാഗത്തായി നോട്ട് അച്ചടിച്ച വര്‍ഷം
സ്വച്ഛ് ഭാരത് ലോഗോയോടൊപ്പം മുദ്രാവാക്യവും
വിവിധ ഭാഷകളിലായി 200 രൂപ എന്ന് എഴുതിയിരിക്കുന്നു
ദേവനാഗിരി ലിപിയില്‍ 200 എന്ന് എഴുതിയിരിക്കുന്നു.

പുതിയ 200 രൂപ നോട്ടുകള്‍ അച്ചടിക്കാന്‍ ആര്‍ബിഐ നിര്‍ദ്ദേശം

chandrika — Tue, 04 Apr 2017 05:29:24 +0000

മുംബൈ: പുതിയ 500, 2000 രൂപ നോട്ടുകള്‍ പുറത്തിറങ്ങിയതിന്റെ തുടര്‍ച്ചയായി രാജ്യത്ത് 200 രൂപ നോട്ടുകളും നിലവില്‍ വരുന്നു. റിസര്‍വ് ബാങ്ക് ഓഫ് ഇന്ത്യയുടെ ബോര്‍ഡ് യോഗം പുതിയ 200 രൂപ നോട്ടുകള്‍ പുറത്തിറക്കാന്‍ നിര്‍ദേശം നല്‍കിയതായി റിപ്പോര്‍ട്ട്.

കഴിഞ്ഞ മാസം ചേര്‍ന്ന ബോര്‍ഡ് യോഗത്തിലാണ് 200 രൂപ നോട്ടുകള്‍ അച്ചടിക്കാന്‍ സംബന്ധിച്ച നിര്‍ദ്ദേശം യോഗം അംഗീകരിച്ചത്. ആര്‍ബിഐയിലെ ഉന്നത ഉദ്യോഗസ്ഥരെ ഉദ്ധരിച്ച് ഇന്ത്യാ ടുഡേയാണ് റിപ്പോര്‍ട്ട് പുറത്തുവിട്ടത്.

കേന്ദ്ര സര്‍ക്കാറിന്റെ അംഗീകാരം കൂടി ലഭിച്ചാല്‍ ജൂണിന് മാസത്തിന് ശേഷം അച്ചടി തുടങ്ങാനാണ് നീക്കം. എന്നാല്‍ 200 രൂപ നോട്ടിന്റെ സംബന്ധിച്ച് കൂടുതല്‍ പ്രതികരിക്കാന്‍ ആര്‍ബിഐ അധികൃതര്‍ തയാറായില്ല.

500, 1000 രൂപ നോട്ടുകള്‍ കഴിഞ്ഞ നവംബര്‍ എട്ടിനാണ് കേന്ദ്ര സര്‍ക്കാര്‍ വിപണിയില്‍ നിന്നും പിന്‍വലിച്ചത്. എന്നാല്‍ പിന്നാലെ പുറത്തിറക്കിയ 2000, 500 രൂപ നോട്ടുകള്‍ രാജ്യത്തെ വിപണിയില്‍ വലിയ മാറ്റമാണ് വരുത്തിയത്. രാജ്യത്തെ 86 ശതമാനം വരുന്ന 500, 1000 നോട്ടുകള്‍ക്ക് പകരം ഉയര്‍ന്ന മൂല്യമുള്ള നോട്ടുകള്‍ പുറത്തിറക്കിയതാണ് വിപണിയെ കുഴക്കിയത്. വിപണിയിലെ 2000 രൂപ നോട്ടുകളുടെ ബാഹുല്യം ജനങ്ങളില്‍ ചില്ലറ ക്ഷാമം നിലനിര്‍ത്തുന്നതാണ് പുതിയ നോട്ട് പുറത്തിറക്കാനുള്ള സാഹചര്യമെന്നാണ് വിലയിരുത്തല്‍.

അതേസമയം, പിന്‍വലിച്ച നോട്ടുകളുടെ എത്രശതമാനം തിരിച്ചെത്തി എന്നതിനെ സംബന്ധിച്ച വിവരങ്ങള്‍ സര്‍ക്കാര്‍ ഇതുവരെ പുറത്തുവിട്ടിട്ടില്ല.