500&1000 rs – Chandrika Daily

നോട്ട് നിരോധനത്തിന് ശേഷം കാര്‍ഡ് വഴിയുള്ള ഇടപാടുകളുടെ വളര്‍ച്ച 7 ശതമാനം മാത്രം

chandrika — Sun, 16 Jul 2017 16:08:08 +0000

ന്യൂഡല്‍ഹി: നോട്ട് നിരോധനത്തിന് ശേഷം ഡെബിറ്റ്, ക്രെഡിറ്റ് കാര്‍ഡുകള്‍ വഴിയുള്ള ഇടപാടുകളില്‍ വെറും ഏഴ് ശതമാനത്തിന്റെ വളര്‍ച്ച മാത്രമെ ഉണ്ടായിട്ടുള്ളുവെന്ന് റിപ്പോര്‍ട്ട്. അതേ സമയം ഡിജിറ്റല്‍ ഇടപാടുകളില്‍ 23 ശതമാനത്തിലധികം വര്‍ധനവ് വന്നെന്നും സര്‍ക്കാര്‍ വൃത്തങ്ങള്‍ അറിയിച്ചു. നോട്ട് അസാധുവാക്കിയത് ഡിജിറ്റല്‍ സമ്പദ്‌വ്യവസ്ഥയില്‍ വരുത്തിയ മാറ്റത്തെ കുറിച്ച് വിവിധ മന്ത്രാലയങ്ങളിലെ ഉദ്യോഗസ്ഥര്‍ പാര്‍ലമെന്ററി സ്റ്റാന്‍ഡിങ് കമ്മറ്റിയില്‍ നടത്തിയ ചര്‍ച്ചയിലാണ് ഇക്കാര്യം അറിയിച്ചത്. എല്ലാ തരത്തിലുമുള്ള ഡിജിറ്റല്‍ ഇടപാടുകളിലുമായി 23 ശതമാനത്തിന്റെ വര്‍ധനവാണ് ഉണ്ടായിട്ടുള്ളത്. 2016 നവംബറില്‍ 2.24 കോടിയുടെ ഡിജിറ്റല്‍ ഇടപാടുകള്‍ ഉണ്ടായിരുന്നത് 2017 മെയ് ആയപ്പോള്‍ 2.75 കോടിയായി മാറി. യുപിഐ ഉപയോഗിച്ചുള്ള ഇടപാടുകളില്‍ വന്‍കുതിച്ചു ചാട്ടമാണ് ഉണ്ടായിട്ടുള്ളത്. 2016 നവംബറിനും 2017 മെയ്ക്കും ഇടയില്‍ ദിവസവും പത്തു ലക്ഷത്തിന്റെ ഇടപാടുകള്‍ യുപിഐ വഴി നടക്കുന്നുണ്ടെന്നാണ് സര്‍ക്കാര്‍ വൃത്തങ്ങള്‍ പറയുന്നത്. ഈ കാലഘട്ടത്തില്‍ അടിയന്തിര പേയ്മന്റ് സര്‍വീസ് (ഐ.എം.പി.എസ്) സിസ്റ്റം വഴിയുള്ള ഇടപാടുകള്‍ ഇരട്ടിയായി വര്‍ധിച്ചു. എന്നാല്‍ പ്ലാസ്റ്റിക് കാര്‍ഡുകള്‍ വഴിയുള്ള പണമിടപാടുകളില്‍ ഏഴ് ശതമാനം വര്‍ധവ് മാത്രമെ സൃഷ്ടിക്കാനായിട്ടുള്ളൂ. കഴിഞ്ഞ വര്‍ഷം നവംബറില്‍ 68 ലക്ഷമാണ് പ്ലാസ്റ്റിക് കാര്‍ഡ് വഴിയുള്ള ഇടപാടെങ്കില്‍ ഈ വര്‍ഷം മെയ് മാസത്തില്‍ 73 ലക്ഷമായി മാത്രമെ വര്‍ധിച്ചിട്ടുള്ളൂ. 2016 നവംബര്‍ എട്ടിനാണ് രാജ്യത്ത് ഉയര്‍ന്നമൂല്യമുള്ള 1000, 500 രൂപ നോട്ടുകള്‍ കേന്ദ്ര സര്‍ക്കാര്‍ നിരോധിച്ചത്. കള്ളപ്പണം തടയുന്നതോടൊപ്പം ഡിജിറ്റല്‍ ഇടപാടുകള്‍ വ്യാപകമാക്കുന്നതിനും വേണ്ടിയായിരുന്നു ഇതെന്നാണ് സര്‍ക്കാറിന്റെ അവകാശ വാദം.

വരാനിരിക്കുന്ന കള്ളപ്പണ ഒഴുക്കിന് തടയിടാന്‍ നോട്ട് നിരോധനത്തിനാവില്ലെന്ന് അസോചം

chandrika — Tue, 17 Jan 2017 14:55:02 +0000

ന്യൂഡല്‍ഹി: ഭാവിയിലെ കള്ളപ്പണ പ്രവാഹത്തെ ഇല്ലാതാക്കാന്‍ നോട്ട് നിരോധനം കൊണ്ടു കഴിയില്ലെന്ന് പ്രമുഖ വ്യാപാര സംഘടന അസോചം. നിലവിലെ കള്ളപ്പണത്തെ ഇല്ലാതാക്കാന്‍ നീക്കം സഹായകരമാകുമെങ്കിലും സ്വര്‍ണം, റിയല്‍ എസ്റ്റേറ്റ് തുടങ്ങിയ മേഖലകളില്‍ നിക്ഷേപിക്കപ്പെട്ട അനധികൃത സമ്പാദ്യങ്ങള്‍ തുടച്ചുനീക്കാന്‍ ഇതുകൊണ്ടാവില്ല എന്നും അസോചം ചൂണ്ടിക്കാണിക്കുന്നു. കള്ളപ്പണ ശല്യം ഒഴിവാക്കാന്‍ സ്വത്തുകള്‍ക്കു മേലുള്ള സ്റ്റാമ്പ് ഡ്യൂട്ടി കുറയ്ക്കുക തുടങ്ങിയ നടപടികള്‍ കൊണ്ടേ സാധ്യമാകൂ എന്നും സംഘടനയുടെ പഠനം വ്യക്തമാക്കി.
അസാധുവാക്കിയ നോട്ടുകളുടെ സിംഹഭാഗവും ബാങ്കുകളില്‍ തിരിച്ചെത്തിയിട്ടുണ്ട്. അതു കൊണ്ടു തന്നെ കറന്‍സിയില്‍ സൂക്ഷിച്ച കള്ളപ്പണം മുഴുവനായി പിടികൂടാനായില്ല. വിവിധ അക്കൗണ്ടുകളിലാണ് പണം നിക്ഷേപിക്കപ്പെട്ടത്. അതു കൊണ്ടു തന്നെ കള്ളപ്പണം തിരിച്ചറിയുക ഭഗീരഥ പ്രയത്‌നം തന്നെയാകും- അസോചം സെക്രട്ടറി ജനറള്‍ ഡി.എസ് റാവത് ചൂണ്ടിക്കാട്ടി.

നോട്ട് അസാധു: കേന്ദ്രസര്‍ക്കാര്‍ ഇടപെടലിനെതിരെ ആര്‍ബിഐ ഉദ്യോഗസ്ഥര്‍

chandrika — Sat, 14 Jan 2017 11:57:24 +0000

മുബൈ: കേന്ദ്രസര്‍ക്കാര്‍ പ്രഖ്യാപിച്ച നോട്ട് അസാധു നടപടി റിസര്‍വ്ബാങ്കിന് വളരെയധികം അപമാനമുണ്ടാക്കിയെന്ന പരാതിയുമായി റിസര്‍വ് ബാങ്ക് ഉദ്യോഗസ്ഥര്‍ രംഗത്ത്. റിസര്‍വ് ബാങ്കിലെ മുതിര്‍ന്ന ഉദ്യോഗസ്ഥരും ജീവനക്കാരും ആര്‍ബിഐ ഗവര്‍ണര്‍ ഉര്‍ജിത് പട്ടേലിന് നല്‍കിയ കത്തിലാണ് കേന്ദ്ര സര്‍ക്കാറിന്റെ നോട്ട് അസാധു നടപടിക്കെതിരേയും ധനകാര്യ മന്ത്രാലയത്തിനെതിരേയും കടുത്ത വിമര്‍ശനം ഉന്നയിച്ചത്.

നോട്ട് റദ്ദാക്കലിനെ തുടര്‍ന്നുള്ള സംഭവങ്ങളിലൂടെ റിസര്‍വ് ബാങ്കിന്റെ പ്രതിച്ഛായ പരിഹരിക്കാനാകാത്ത വിധം മോശമായെന്ന് യുണൈറ്റഡ് ഫോറം ഓഫ് റിസര്‍വ് ബാങ്ക് ഓഫീസേഴ്‌സ് എംപ്ലോയിസ് ആര്‍ ബി ഐ ഗവര്‍ണര്‍ ഊര്‍ജിത് പട്ടേലിന് അയച്ച കത്തില്‍ ചൂണ്ടിക്കാട്ടി.

500, 1000 രൂപാ നോട്ടുകള്‍ നിരോധിച്ച തീരുമാനം പ്രഖ്യാപിക്കുന്നതിന് മുന്‍പ് വേണ്ടത്ര മുന്നൊരുക്കം ഉണ്ടായില്ല. നോട്ട് നിരോധിച്ചതിനെ തുടര്‍ന്നുണ്ടായ പ്രശ്‌നങ്ങള്‍ പരിഹരിക്കുന്നതിലും വന്‍ കെടുകാര്യസ്ഥതയാണ് ഉണ്ടായതെന്നും കത്തില്‍ കുറ്റപ്പെടുത്തുന്നുണ്ട്.

അതേസമയം, നോട്ട് റദ്ദാക്കലിനെത്തുടര്‍ന്നുള്ള ആര്‍ബിഐ പ്രവര്‍ത്തനങ്ങളുടെ മേല്‍നോട്ടത്തിനായി ധനകാര്യ മന്ത്രാലയം ഉദ്യോഗസ്ഥനെ നിയമിച്ച നടപടിയെയും ആര്‍ബിഐ ജീവനക്കാര്‍ വിമര്‍ശിച്ചു. ആര്‍ബിഐയുടെ സ്വയംഭരണാവകാശത്തിലേക്കുള്ള കടന്നുകയറ്റമാണെന്ന് ഇതെന്നും ജീവനക്കാര്‍ കുറ്റപ്പെടുത്തി. വിഷയത്തില്‍ ഗവര്‍ണര്‍ ഉടന്‍ ഇടപെടണമെന്നും ആര്‍ബിഐ ജീവനക്കാര്‍ ഊര്‍ജിത് പട്ടേലിനോട് കത്തിലൂടെ ആവശ്യപ്പെട്ടു.

നവംബര്‍ 8ലെ നോട്ട് പിന്‍വലിക്കല്‍ നടപടിയെ തുടര്‍ന്ന് ഒരു രാജ്യവും അനുഭവിക്കാത്ത ജോലിഭാരമാണ് ആര്‍ബിഐക്ക് ഏറ്റെടുക്കേണ്ടിവന്നത്. നോട്ടു മാറ്റവുമായി ബന്ധപ്പെട്ട് രാജ്യത്തെ വിവിധ കേന്ദ്രങ്ങളില്‍ പണമെത്തിക്കാനും മറ്റുമായി വലിയ ദുരിതം അനുഭവിച്ചതായും കത്തില്‍ പറയുന്നു.

കത്തിനെക്കുറിച്ചു പുറത്തു വന്ന വിവരങ്ങള്‍ ജീവനക്കാരുടെ സംഘടനകളായ ഓള്‍ ഇന്ത്യ റിസര്‍വ് ബാങ്ക് എംപ്ലോയീസ് അസോസിയേഷന്‍ പ്രതിനിധി സമീര്‍ ഘോഷും, ഓള്‍ ഇന്ത്യ റിസര്‍വ് ബാങ്ക് വര്‍ക്കേഴ്‌സ് ഫെഡറേഷന്‍ പ്രതിനിധി സൂര്യകാന്ത് മഹാദിക്കും സ്ഥിരീകരിച്ചു.

നോട്ട് അസാധു നടപടി: ആര്‍.ബി.ഐയുടെ മറുപടിയില്‍ നിഗൂഢത തുടരുന്നു

chandrika — Fri, 13 Jan 2017 15:15:54 +0000

ന്യൂഡല്‍ഹി: നോട്ട് അസാധുവാക്കലുമായി ബന്ധപ്പെട്ട വിവരങ്ങള്‍ പുറത്തു വിടുന്നത് രാജ്യത്തിന്റെ അഖണ്ഡതയ്ക്കും, സുരക്ഷയ്ക്കും, ജീവനും ഭീഷണിയാണെന്ന് റിസര്‍വ് ബാങ്ക്. ഇതോടെ ഉയര്‍ന്ന മൂല്യമുള്ള 500, 1000 രൂപ നോട്ടുകള്‍ അസാധുവാക്കാനുള്ള തീരുമാനം എവിടെ നിന്നു ഉല്‍ഭവിച്ചുവെന്നത് ആര്‍.ബി.ഐയുടെ മറുപടിയോടെ വീണ്ടും നിഗൂഢമാവുകയാണ്. വിവരാവകാശം വഴി നോട്ട് നിരോധനവുമായി ബന്ധപ്പെട്ട വിവരങ്ങള്‍ ആരാഞ്ഞപ്പോഴാണ് ആര്‍.ബി.ഐഇത്തരത്തില്‍ മറുപടി നല്‍കിയത്.

നോട്ട് അസാധുവാക്കലിന് മുമ്പ് നടത്തിയ തയാറെടുപ്പുകളെ കുറിച്ചും ഇതുണ്ടാക്കുന്ന സ്വാധീനത്തെ കുറിച്ചുമുള്ള വിവരങ്ങള്‍ ആരാഞ്ഞപ്പോഴും വിവരം വെളിപ്പെടുത്താന്‍ കഴിയില്ലെന്നാണ് ആര്‍.ബി.ഐ മറുപടി നല്‍കിയത്. വിവരങ്ങള്‍ പുറത്ത് വിടുന്നയാളുടെ ജീവന് ആപത്തുണ്ടാകുമെന്നും രാജ്യ സുരക്ഷയ്ക്കും ദേശീയോദ്ഗ്രഥനത്തിനും രാജ്യത്തിന്റെ പരമാധികാരത്തിനും വെല്ലുവിളിയാണെന്നും ആര്‍.ബി.ഐ വിവരാവകാശത്തിനുള്ള മറുപടിയില്‍ പറയുന്നു. നോട്ട് അസാധുവാക്കലിന് മുമ്പ് എന്തെല്ലാം തയാറെടുപ്പുകള്‍ നടത്തി എന്ന ചോദ്യത്തിനാണ് ആര്‍.ബി.ഐ ഇത്തരത്തില്‍ ഒഴിവുകഴിവുകള്‍ പറഞ്ഞത്.

മോദി നോട്ട് അസാധുവാക്കല്‍ പ്രഖ്യാപനം നടത്തിയ ദിവസം വരെ ഉയര്‍ന്ന മൂല്യമുള്ള എത്ര കറന്‍സികള്‍ ബാങ്കുകളില്‍ ഉണ്ടായിരുന്നുവെന്ന ചോദ്യത്തിന് ഇതേ കുറിച്ചുള്ള വിവരം നല്‍കുന്നയാളുടെ ജീവന് ഭീഷണിയുള്ളതിനാല്‍ പുറത്തു വിടാനാവില്ലെന്നാണ് ആര്‍.ബി.ഐ വ്യക്തമാക്കിയത്. ഡിസംബര്‍ എട്ടിനും ജനുവരി രണ്ടിനും ഇടയില്‍ 14 ചോദ്യങ്ങളാണ് വിവരാവകാശം വഴി ബ്ലൂംബര്‍ഗ് ന്യൂസ് ആര്‍ബിഐയോട് ചോദിച്ചത്. ഇതില്‍ അഞ്ച് ചോദ്യങ്ങള്‍ക്ക് മാത്രമാണ് മറുപടി കിട്ടിയത്. വാണിജ്യ ബാങ്കുകളില്‍ എത്ര നോട്ടുകള്‍ തിരിച്ചെത്തിയെന്ന് അറിയില്ലെന്ന് ഒരു ചോദ്യത്തിന് ഉത്തരമായി ആര്‍ബിഐ പറഞ്ഞു. എന്തുകൊണ്ടാണ് റിസര്‍വ്വ് ബാങ്ക് ബോര്‍ഡ് നോട്ട് നിരോധന തീരുമാനം കൈക്കൊണ്ടതെന്ന ചോദ്യത്തിന് ഇത് വിവരാവകാശ നിയമത്തിന്റെ കീഴില്‍ വരില്ലെന്നായിരുന്നു ആര്‍ബിഐയുടെ മറുപടി.

നോട്ട് നിരോധനത്തിന് ആര്‍.ബി.ഐയാണ് നിര്‍ദേശം നല്‍കിയതെന്നായിരുന്നു കേന്ദ്ര മന്ത്രി പിയൂഷ് ഗോയല്‍ പാര്‍ലമെന്റിനെ അറിയിച്ചിരുന്നത്. ആര്‍.ബി.ഐ നിര്‍ദേശം മന്ത്രിസഭ അംഗീകരിക്കുകയും പിന്നീട് പ്രധാനമന്ത്രി പ്രഖ്യാപിക്കുകയുമായിരുന്നുവെന്നാണ് പിയൂഷ് ഗോയല്‍ പാര്‍ലമെന്റിനെ അറിയിച്ചിരുന്നത്. എന്നാല്‍ കേന്ദ്ര സര്‍ക്കാറാണ് നോട്ട് അസാധുവാക്കലിന് നിര്‍ദേശം നല്‍കിയതെന്നാണ് ആര്‍.ബി.ഐ പറയുന്നത്. പാര്‍ലമെന്ററി പാനലിനു മുന്നിലായിരുന്നു ആര്‍.ബി.ഐയുടെ വെളിപ്പെടുത്തല്‍. ജനുവരി 20ന് ആര്‍.ബി.ഐ ഗവര്‍ണര്‍ ഉര്‍ജിത് പട്ടേല്‍ പാര്‍ലമെന്ററി കമ്മിറ്റിക്ക് മുന്നില്‍ സത്യവാങ് മൂലം നല്‍കുന്നതോടെ വിഷയത്തില്‍ കൂടുതല്‍ വ്യക്തത കൈവരുമെന്നാണ് പ്രതീക്ഷിക്കുന്നത്.

നാലു ലക്ഷം കോടി രൂപയുടെ കള്ളപ്പണം വെളുപ്പിച്ചു

chandrika — Tue, 10 Jan 2017 17:25:45 +0000

ന്യൂഡല്‍ഹി: നോട്ട് പിന്‍വലിക്കലിന്റെ മറവില്‍ വന്‍തോതില്‍ കള്ളപ്പണം വെളുപ്പിച്ചെന്ന ആരോപണം ശരിവെക്കുന്ന കണക്കുകള്‍ പുറത്ത്. നികുതി അടക്കാതെ സൂക്ഷിച്ച മൂന്ന്- നാല് ലക്ഷം കോടി രൂപ നവംബര്‍ എട്ടിനു ശേഷം ബാങ്കുകളില്‍ നിക്ഷേപിച്ചതായി കേന്ദ്ര ധനമന്ത്രാലയമാണ് വെളിപ്പെടുത്തിയത്.
അസാധുവാക്കിയ 1000, 500 രൂപ നോട്ടുകള്‍ ആയാണ് തുക ബാങ്കുകളില്‍ നിക്ഷേപിച്ചത്. നിക്ഷേപങ്ങളുടെ വിശദാംശങ്ങള്‍ ആദായ നികുതി വകുപ്പിനും എന്‍ഫോഴ്‌സ്‌മെന്റ് ഡയരക്ടറേറ്റിനും കൈമാറിയതായും അന്വേഷണം നടത്താന്‍ നിര്‍ദേശിച്ചതായും ധനമന്ത്രാലയ വൃത്തങ്ങള്‍ പറഞ്ഞു.
വിവരങ്ങളുടെ വന്‍ ശേഖരമാണ് ലഭിച്ചിട്ടുള്ളത്. ഇവ പരിശോധിച്ചു വരികയാണ്. 60 ലക്ഷം അക്കൗണ്ടുകളില്‍ നവംബര്‍ എട്ടിനും- ഡിസംബര്‍ 30നും ഇടയില്‍ രണ്ടു ലക്ഷം രൂപയില്‍ കൂടുതല്‍ നിക്ഷേപം നടന്നിട്ടുണ്ട്. ഇതു മാത്രം 7.34 ലക്ഷം കോടിയിലിധികം രൂപ വരും. വടക്കുകിഴക്കന്‍ സംസ്ഥാനങ്ങളില്‍ സംശയകരമായ നിലയില്‍ കോടികളുടെ നിക്ഷേപം നടന്നിട്ടുണ്ട്. വിഘടനവാദ, തീവ്രവാദ സംഘങ്ങള്‍ കള്ളപ്പണം വെളുപ്പിക്കാന്‍ നോട്ട് പിന്‍വലിക്കല്‍ നടപടി മറയാക്കിയെന്ന സംശയം ഇതോടെ സജീവമായിട്ടുണ്ട്.
പല അക്കൗണ്ടുകളിലായാണ് നിക്ഷേപം നടന്നിരിക്കുന്നത്. ഇതിന്റെയെല്ലാം വിശദാംശങ്ങള്‍ എന്‍ഫോഴ്‌സ്‌മെന്റ് ഡയരക്ടറേറ്റിനു കൈമാറിയിട്ടുണ്ട്. തീവ്രവാദ സാന്നിധ്യമുള്ള സംസ്ഥാനങ്ങളിലെ നിക്ഷേപങ്ങളുടെ കണക്കുകള്‍ പ്രത്യേകം പരിശോധിക്കാന്‍ നിര്‍ദേശിച്ചതായും ധനമന്ത്രാലയ വൃത്തങ്ങള്‍ പറഞ്ഞു.

രണ്ടായിരത്തിന്റെ നോട്ടുകള്‍ക്കെതിരെ രാംദേവ്

chandrika — Tue, 10 Jan 2017 15:56:14 +0000

റായ്പൂര്‍: രണ്ടായിരത്തിന്റെ നോട്ടുകളുടെ അച്ചടി ഭാവിയില്‍ നിര്‍ത്തണമെന്ന നിര്‍ദേശവുമായി വിവാദ യോഗഗുരു ബാബാ രാംദേവ്. ഉയര്‍ന്ന മൂല്യമുള്ള നോട്ടുകളുടെ വ്യാജന്റെ അച്ചടിയും വിതരണവും സൗകര്യപ്രദമാണെന്നാണ് രാംദേവ് അഭിപ്രായപ്പെട്ടത്. റായ്പൂരില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
ആയിരം, അഞ്ഞൂറ് നോട്ടുകള്‍ പിന്‍വലിച്ച സര്‍ക്കാര്‍ തീരുമാനത്തെ അദ്ദേഹം അഭിനന്ദിച്ചു. എന്നാല്‍ ഉയര്‍ന്ന മൂല്യമുള്ള രണ്ടായിരം നോട്ടുകള്‍ക്ക് മോദി നിരോധിച്ച പഴയ 500, 1000 നോട്ടുകള്‍ക്ക് കാരണമായ അതേ പ്രശ്‌നങ്ങള്‍ വന്നത്താന്‍ സാധ്യതയുണ്ടെന്നും രാംദേവ് കൂട്ടിച്ചേര്‍ത്തു.

നോട്ട് അസാധു: മോദിയുടെ വാദം പൊളിയുന്നു; ആവശ്യമുന്നയിച്ചത് സര്‍ക്കാറെന്ന് ആര്‍ബിഐ

chandrika — Tue, 10 Jan 2017 07:15:30 +0000

ന്യൂഡല്‍ഹി: അഞ്ഞൂറിന്റെയും ആയിരത്തിന്റെയും നോട്ടുകള്‍ അസാധുവാക്കണമെന്ന ആവശ്യമുന്നയിച്ചത് കേന്ദ്രസര്‍ക്കാറാണെന്ന് റിസര്‍വ് ബാങ്ക് ഓഫ് ഇന്ത്യയുടെ റിപ്പോര്‍ട്ട്. പാര്‍ലമെന്റ് സമിതിക്കു മുമ്പാകെ ആര്‍ബിഐ സമര്‍പ്പിച്ച രേഖകളിലാണ് ഇക്കാര്യം ചൂണ്ടിക്കാട്ടുന്നത്. റിസര്‍വ് ബാങ്കിന്റെ നിര്‍ദേശപ്രകാരമാണ് നോട്ട് അസാധുവാക്കിയതെന്നായിരുന്നു നേരത്തെയുള്ള റിപ്പോര്‍ട്ട്. എന്നാല്‍ ഇത് അടിസ്ഥാന രഹിതമാണെന്നും നോട്ട് അസാധുവാക്കിയത് കേന്ദ്രസര്‍ക്കാറിന്റെ ആവശ്യപ്രകാരമായിരുന്നുവെന്നാണ് റിപ്പോര്‍ട്ടില്‍ പറയുന്നത്.

കള്ളപ്പണം ഇല്ലാതാക്കുന്നതിനും അഴിമതി തടയുന്നതിനും ഭീകരരുടെ സാമ്പത്തിക സ്രോതസ്സുകള്‍ മരവിപ്പിക്കുന്നതിനുമായി ആയിരത്തിന്റെയും അഞ്ഞൂറിന്റെയും നോട്ടുകള്‍ പിന്‍വലിക്കണമെന്നായിരുന്നു കേന്ദ്ര സര്‍ക്കാറിന്റെ ആവശ്യം. നോട്ട് പിന്‍വലിക്കല്‍ സംബന്ധിച്ച് നവംബര്‍ ഏഴിനാണ് സര്‍ക്കാര്‍ ഉപദേശം ചോദിച്ചത്. നവംബര്‍ എട്ടിന് രാത്രി എട്ടു മണിക്ക് മോദി രാജ്യത്തെ അഭിസംബോധന ചെയ്യുന്നതിന് മണിക്കൂറുകള്‍ക്കു മുമ്പ് അനുമതി നല്‍കുകയായിരുന്നുവെന്ന് ആര്‍ബിഐ വൃത്തങ്ങള്‍ വ്യക്തമാക്കുന്നു.

നോട്ടു അസാധു: അമ്പതു ദിവസം, 74 പ്രഖ്യാപനങ്ങള്‍

chandrika — Sat, 31 Dec 2016 07:33:06 +0000

ന്യൂഡല്‍ഹി: അഞ്ഞൂറിന്റെയും ആയിരത്തിന്റെയും നോട്ടുകള്‍ അസാധുവാക്കിയതിനു പിന്നാലെ രൂക്ഷമായ കറന്‍സി പ്രതിസന്ധി പരിഹരിക്കുന്നതിന് പ്രധാനമന്ത്രി നരേന്ദ്രമോദി ജനങ്ങളോട് ആവശ്യപ്പെട്ട അമ്പതു ദിവസത്തിനുള്ളില്‍ 74 പ്രഖ്യാപനങ്ങളാണ് പുറത്തുവന്നത്. റിസര്‍വ് ബാങ്ക് ഓഫ് ഇന്ത്യയും കേന്ദ്രസര്‍ക്കാര്‍ പുറത്തിറക്കിയ വിജ്ഞാപനങ്ങളില്‍ പ്രധാനപ്പെട്ടവ പരിശോധിക്കാം…

നവംബര്‍ എട്ട്

-നവംബര്‍ എട്ടിന് നോട്ടു അസാധു പ്രാബല്യത്തില്‍ വരുന്നു
-നവംബര്‍ 9. ബാങ്കുകള്‍ക്ക് അവധി.
-എല്ലാ എടിഎമ്മുകളും ക്യാഷ് ഡെപോസിറ്റ് മെഷീനുകളും നവംബര്‍ 9, 10 തിയതികളില്‍ അടച്ചിടാന്‍ നിര്‍ദേശം
-എടിഎം വഴി പണം പിന്‍വലിക്കലിന് ദിവസത്തില്‍ രണ്ടായിരമായി നിജപ്പെടുത്തി.
-അസാധു നോട്ടുകള്‍ മാറ്റിവാങ്ങാന്‍ സാധിക്കാത്തവര്‍ക്ക് ആര്‍ബിഐ ഓഫീസുകളില്‍ നിന്ന് മാറ്റിവാങ്ങാം.
-എടിഎമ്മുകളില്‍ 50, 100 രൂപാ നോട്ടുകള്‍ ലഭിക്കുന്നു.
-ബാങ്ക് വഴി ഒരാള്‍ക്ക് 4000 രൂപയുടെ പഴയ നോട്ടുകള്‍ മാറ്റി നല്‍കാന്‍ തീരുമാനം

നവംബര്‍ ഒമ്പത്

– എടിഎം മെഷീനുകള്‍ മാറ്റി സ്ഥാപിക്കാന്‍ ബാങ്കുകള്‍ക്ക് നിര്‍ദേശം
– ശനി, ഞായര്‍ (നവംബര്‍ 12, 13) ദിവസങ്ങളില്‍ ബാങ്ക് പ്രവര്‍ത്തിക്കാന്‍ നിര്‍ദേശം
– പഴയ 500, 1000 രൂപാ നോട്ടുകള്‍ നവംബര്‍ 11 വരെ അന്താരാഷ്ട്ര വിമാനത്താവളങ്ങളിലും വിദേശികള്‍ക്ക് ഫോറിന്‍ എക്‌സ്‌ചേഞ്ച്് വഴിയും നല്‍കാന്‍ അനുമതി. 5000 രൂപ വരെ ഒരാള്‍ക്ക് ഇത്തരത്തില്‍ പഴയ നോട്ട് നല്‍കി മാറ്റാനായി.

നവംബര്‍ 10

ബാങ്ക് വഴി പിന്‍വലിക്കാവുന്ന തുക ദിവസേന 10000 രൂപയും ആഴ്ചയില്‍ 20000 രൂപയുമാക്കി.

നവംബര്‍ 11

എസ്ബിഎന്‍ എക്‌സ്‌ചേഞ്ചുകള്‍ക്ക് ദിവസവും റിപ്പോര്‍ട്ട് സൂക്ഷിക്കാന്‍ നിര്‍ദേശം

നവംബര്‍ 13

– ബാങ്കില്‍ പഴയ നോട്ട് നല്‍കി പുതിയത് വാങ്ങുന്ന പരിധി 4000 രൂപയില്‍ നിന്ന് 4500 രൂപയാക്കി.
– ദിവസേന എടിഎമ്മില്‍ നിന്ന് പിന്‍വലിക്കാവുന്ന തുക 2000ത്തില്‍ നിന്ന് 2500 രൂപയാക്കി.
– ആഴ്ചയില്‍ പിന്‍വലിക്കാവുന്ന തുക 20000ത്തില്‍ നിന്ന് 24000 ആക്കി.
– മുതിര്‍ന്ന പൗരന്മാര്‍ക്കും അംഗവൈകല്യമുള്ളവര്‍ക്കും ബാങ്കിനു മുന്നില്‍ പ്രത്യേക ക്യൂ ഏര്‍പ്പെടുത്തി.

നവംബര്‍ 14

-സഹകരണ ബാങ്കുകള്‍ക്ക് ആഴ്ചയില്‍ 24000 രൂപ പിന്‍വലിക്കാന്‍ അനുമതി. എന്നാല്‍ പഴയ നോട്ട് വാങ്ങി പുതുക്കി നല്‍കാനാവില്ല.

– കറന്റ് അക്കൗണ്ടുകളില്‍ നിന്ന് ആഴ്ചയില്‍ പിന്‍വലിക്കാവുന്ന തുക 50000 രൂപയാക്കി. പഞ്ചായത്ത് ഓഫീസ്, പൊലീസ് സ്റ്റേഷന്‍, സൈനിക പോസ്റ്റ്, സര്‍ക്കാര്‍ സ്ഥാപനങ്ങള്‍ എന്നിവിടങ്ങളില്‍ മൈക്രോ എടിഎമ്മുകള്‍ സ്ഥാപിക്കാന്‍ നിര്‍ദേശം.
നവംബര്‍ 15

പഴയ നോട്ടിനു പകരം പുതുക്കി വാങ്ങുന്നതിന് ബാങ്കുകളില്‍ നിന്ന് ആളുകള്‍ക്ക് മഷി പുരട്ടല്‍.

നവംബര്‍ 16

– 50000 രൂപക്കോ അതിനു മുകളിലോ ഉള്ള തുകക്ക് പാന്‍ നമ്പര്‍ നല്‍കാന്‍ നിര്‍ദേശം

-എസ്ബിഎന്‍ വിവരങ്ങള്‍ ഉള്‍പ്പെടെ ഇടപാടുകളുടെ ദിവസ റിപ്പോര്‍ട്ട് ആര്‍ബിഐക്ക് അയക്കാന്‍ ബാങ്കുകള്‍ക്ക് നിര്‍ദേശം.

നവംബര്‍ 17

അസാധു നോട്ട് പുതുക്കുന്ന പരിധി 2000 രൂപയാക്കി.

നവംബര്‍ 21

– കല്യാണ ആവശ്യങ്ങള്‍ക്ക് ഡിസംബര്‍ 30 വരെ രണ്ടര ലക്ഷം രൂപ നല്‍കാന്‍ അനുമതി

– കര്‍ഷകര്‍ക്ക് ആഴ്ചയില്‍ 25000 രൂപ പിന്‍വലിക്കാം.
നവംബര്‍ 22

ഇ-പെയ്‌മെന്റ് പ്രോത്സാഹിപ്പിക്കാന്‍ തീരുമാനം.

നവംബര്‍ 23

സ്‌മോള്‍ സേവിങ് സ്‌കീമില്‍ ഉള്‍പ്പെട്ട അക്കൗണ്ടുകളിലെ നിക്ഷേപങ്ങളില്‍ പഴയ നോട്ട് സ്വീകരിക്കേണ്ടെന്ന് തീരുമാനം.

നവംബര്‍ 24

പെന്‍ഷന്‍കാര്‍ക്കും സൈനിക പോസ്റ്റുകളിലെ ഉദ്യോഗസ്ഥര്‍ക്കും പണം ഉറപ്പുവരുത്താന്‍ നിര്‍ദേശം

നവംബര്‍ 25

വിദേശികള്‍ക്ക് ഡിസംബര്‍ 15 വരെ 5000 രൂപയുടെ പഴയ ഇന്ത്യന്‍ കറന്‍സി മാറ്റി വാങ്ങാന്‍ അനുമതി.

നവംബര്‍ 30

കെവൈസിയുള്ള ജന്‍ധന്‍ അക്കൗണ്ടുകളില്‍ നിന്ന് 10000 രൂപ പിന്‍വലിക്കാന്‍ അനുമതി. നോണ്‍ കെവൈസി ജന്‍ധന്‍ അക്കൗണ്ടുകളില്‍ നിന്ന് 5000 രൂപയും പിന്‍വലിക്കാം.

ഡിസംബര്‍ 13

നവംബര്‍ എട്ടു മുതല്‍ ഡിസംബര്‍ 30 വരെയുള്ള സിസിടിവി ദൃശ്യങ്ങള്‍ സൂക്ഷിച്ചുവെക്കാന്‍ നിര്‍ദേശം.

ഡിസംബര്‍ 19

ഡിസംബര്‍ 30 വരെ പഴയ നോട്ട് നിക്ഷേപിക്കാനുള്ള പരിധി 5000 രൂപയാക്കി വെട്ടിചുരുക്കി. ഇത്രയും ദിവസം നിക്ഷേപിക്കാത്തതിന്റെ കാരണം അക്കൗണ്ട് ഉടമകളോട് ചോദിക്കാനും ബാങ്ക് ഉദ്യോഗസ്ഥര്‍ക്ക് നിര്‍ദേശം.

ഡിസംബര്‍ 21

– നിക്ഷേപ പരിധി 5000 രൂപയാക്കിയത് റദ്ദാക്കി.

ഡിസംബര്‍ 26

കാര്‍ഷിക ലോണ്‍ തിരിച്ചടക്കുന്നതിന് 60 ദിവസത്തെ ഇളവ് നല്‍കി.

ഡിസംബര്‍ 30

പഴയ നോട്ട് മാറ്റി വാങ്ങാനുള്ള കാലാവധി അവസാനിച്ചു. എടിഎമ്മില്‍ നിന്ന് പിന്‍വലിക്കാനുള്ള പരിധി 2500ല്‍ നിന്ന് 4500 ആക്കി ഉയര്‍ത്തി. ആഴ്ചയില്‍ ബാങ്കു വഴി പിന്‍വലിക്കാനുള്ള പരിധിയില്‍ മാറ്റമില്ല.

90 ശതമാനം നോട്ടുകളും തിരിച്ചെത്തി

chandrika — Tue, 27 Dec 2016 16:33:48 +0000

ന്യൂഡല്‍ഹി: കള്ളപ്പണത്തിന്റെ പേരില്‍ നോട്ട് നിരോധനം നടപ്പാക്കിയ കേന്ദ്രസര്‍ക്കാരിന്റെ കണക്കുകൂട്ടലുകള്‍ തെറ്റിച്ച് ബാങ്കുകളിലേക്ക് ഒഴുകിയെത്തിയത് കോടികള്‍. റിസര്‍വ് ബാങ്കിന്റെ റിപ്പോര്‍ട്ട് പ്രകാരം ഡിസംബര്‍ 10 വരെ 12.44 ലക്ഷം കോടി ബാങ്കുകളില്‍ തിരിച്ചെത്തി. പിന്‍വലിച്ച 1000, 500 നോട്ടുകളുടെ 85 ശതമാനമാണിത്. ഇതിനു ശേഷമുള്ള കണക്കുകള്‍ ഇതുവരെ റിസര്‍വ് ബാങ്ക് പുറത്തുവിട്ടിട്ടില്ല. ഡിസംബര്‍ 10 നു ശേഷം 90 ശതമാനത്തിലധികം തിരിച്ചെത്തിയെന്നും അനൗദ്യോഗിക റിപ്പോര്‍ട്ടുണ്ട്. കള്ളപ്പണം പൂര്‍ണമായും പിടികൂടാമെന്ന കേന്ദ്ര സര്‍ക്കാറിന്റെ പ്രതീക്ഷകള്‍ അസ്ഥാനത്തായെന്ന് ഇതില്‍ നിന്ന് വ്യക്തം. തിരികെ എത്താനുള്ള പണത്തില്‍ കോടതികളിലും മറ്റും നിയമക്കുരുക്കില്‍പ്പെട്ട് കെട്ടിക്കിടക്കുന്ന കോടിക്കണക്കിന് രൂപയുടെ നോട്ടുകളും ഉള്‍പെടും. നവംബര്‍ 8ന് നോട്ട് നിരോധനം നടപ്പാക്കുമ്പോള്‍ 15.4 ലക്ഷം കോടിയുടെ 1000, 500 നോട്ടുകള്‍ പ്രചാരത്തിലുണ്ടായിരുന്നു. പകരം ജനങ്ങളിലേക്ക് എത്തിക്കാനായത് 5.92 ലക്ഷം കോടി രൂപയുടെ പുതിയ നോട്ടുകള്‍ മാത്രം. 2000, 500 രൂപയുടെ 170 കോടി നോട്ടുകളും 2100 കോടി 10, 20, 50, 100 രൂപ നോട്ടുകളും വിതരണം ചെയ്തു. നവംബര്‍ 10 മുതല്‍ ഡിസംബര്‍ 10 വരെ ബാങ്ക് കൗണ്ടറുകള്‍ വഴിയും എ.ടി.എമ്മിലൂടെയുമായിരുന്നു വിതരണം. പ്രഖ്യാപനത്തിന് ഒരുമാസം തികഞ്ഞപ്പോള്‍ തന്നെ പഴയ നോട്ടുകളില്‍ 70 ശതമാനവും തിരിച്ചെത്തിയിരുന്നു. നാലുലക്ഷം കോടി രൂപയുടെ കള്ളപ്പണം പിടിച്ചെടുക്കുമെന്ന കേന്ദ്രസര്‍ക്കാര്‍ വാദം പൊള്ളയായിരുന്നെന്നാണ് കണക്കുകള്‍ വ്യക്തമാക്കുന്നത്. അസാധുവാക്കലിനു ശേഷം വന്‍ തോതില്‍ കള്ളപ്പണം വെളുപ്പിക്കപ്പെട്ടു എന്നും സര്‍ക്കാരിന് സമ്മതിക്കേണ്ടി വരും.

നോട്ടു നിരോധനം: ആര്‍ബിഐ നയത്തില്‍ വീണ്ടും മാറ്റം; വിവാദ ഉത്തരവ് പിന്‍വലിച്ചു

chandrika — Wed, 21 Dec 2016 08:48:01 +0000

ന്യൂഡല്‍ഹി: നോട്ടു അസാധുവാക്കല്‍ നടപടിയുമായി ബന്ധപ്പെട്ട് ആര്‍ബിഐ പുറപ്പെടുവിച്ച പുതിയ നയത്തിലും മാറ്റം. 5000 രൂപയ്ക്ക് മുകളിലുള്ള അസാധു നോട്ടുകള്‍ ബാങ്കുകളില്‍ നിക്ഷേപിക്കുന്നതുമായി ബന്ധപ്പെട്ട് ഡിസംബര്‍ 19ന് ആര്‍.ബി.ഐ പുറപ്പെടുവിപ്പിച്ച പുതി ഉത്തരവാണ് ഇപ്പോള്‍ കേന്ദ്രം പിന്‍വലിച്ചത്.

5000 രൂപയ്ക്ക് മുകളിലുള്ള അസാധു നോട്ടുകള്‍ നിക്ഷേപിക്കുമ്പോള്‍ കാരണം കാണിക്കണമെന്ന ഈ ഉത്തരവ് നേരത്തെ വിവാദമായിരുന്നു. തുടര്‍ന്ന് ചൊവ്വാഴ്ച വിഷയത്തില്‍ നിലപാട് വ്യക്തമാക്കി വിശദീകരണവുമായി കേന്ദ്ര ധനമന്ത്രി അരുണ്‍ ജെയ്റ്റ്‌ലി രംഗത്ത് വന്നിരുന്നു. അസാധു നോട്ടുകള്‍ ഒരു തവണ നിക്ഷേപിക്കുന്നതിന് തടസമില്ല, എന്നാല്‍ 5000 രൂപക്ക് മുകളില്‍ നിരവധി തവണ നിക്ഷേപിക്കുമ്പാള്‍ പണത്തിന്റെ ഉറവിടം വെളിപ്പെടുത്തേണ്ടി വരുമെന്നാണ് ജെയ്റ്റ്‌ലി പറഞ്ഞത്.

എന്നാല്‍ ആര്‍ബിഐയുടെ തുടരെ തുടരെയുള്ള നയംമാറ്റവും കേന്ദ്രമന്ത്രിയുടെ വിശദീകരണവും കൂടുതല്‍ വിമര്‍ശനങ്ങള്‍ക്കാണ് കാരണമായത്. കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയടക്കം നിരവധി രാഷ്ട്രീയ നേതാക്കള്‍ വിഷയത്തില്‍ കടുത്ത വിമര്‍ശനവും ഉയര്‍ത്തി.

തുടര്‍ന്ന് ഇന്ന് പുറത്തിറക്കിയ ആര്‍ബിഐ വിശദീകരണത്തിലാണ് ഉത്തരവ് പിന്‍വലിച്ചതായി കേന്ദ്രം അറിയിച്ചത്. അയ്യായിരം രൂപയ്ക്ക് മുകളില്‍ കെ.വൈ.സി. ഉള്ള അക്കൗണ്ടുകളില്‍ നിക്ഷേപിക്കുമ്പോള്‍ യാതൊരു തരത്തിലുള്ള ചോദ്യങ്ങളും നേരിടേണ്ടി വരില്ലെന്നും റിസര്‍വ് ബാങ്ക് പുറത്തിറക്കിയ സര്‍ക്കുലറില്‍ ഉത്തരവില്‍ ഉറപ്പ് നല്‍കുന്നു. എന്നാല്‍ കെ.വൈ.സി ഇല്ലാത്തവയിലെ നിക്ഷേപത്തിന് വിശദീകരണം വേണ്ടിവരും.

5000ത്തിന് മുകളിലുള്ള തുക നിക്ഷേപിക്കുമ്പോള്‍ ഇതുവരെ നോട്ടുകള്‍ നിക്ഷേപിക്കാതിരുന്നതിന് രണ്ട് ബാങ്ക് ഉദ്യോഗസ്ഥരുടെ സാന്നിധ്യത്തില്‍ കാരണം നല്‍കണം, ഇത് ബാങ്കില്‍ രേഖപ്പെടുത്തണം തുടങ്ങിയ നിയന്ത്രണങ്ങളാണ് കേന്ദ്രം ഏര്‍പ്പെടുത്തിയിരുന്നത്. കൂടാതെ, അസാധു നോട്ടുകള്‍ എന്തുകൊണ്ട് നേരത്തെ നിക്ഷേപിച്ചില്ല, പണത്തിന്റെ ഉറവിടം ഏത്, എന്നത് ഉള്‍പ്പടെയുള്ള ചോദ്യങ്ങളാണ് പണം നിക്ഷേപിക്കാന്‍ എത്തുന്ന ഉപഭോക്താകള്‍ക്ക് ബാങ്ക് ഉദ്യോഗസ്ഥരില്‍ നിന്ന് നേരിടേണ്ടി വന്നത്.

ഇതാണ് രാജ്യത്ത് പരക്കെ വിമര്‍ശനങ്ങള്‍ക്കു കാരണമായത്.