500&2000rs – Chandrika Daily

പുതിയ 200 രൂപ നോട്ടുകള്‍ അച്ചടിക്കാന്‍ ആര്‍ബിഐ നിര്‍ദ്ദേശം

chandrika — Tue, 04 Apr 2017 05:29:24 +0000

മുംബൈ: പുതിയ 500, 2000 രൂപ നോട്ടുകള്‍ പുറത്തിറങ്ങിയതിന്റെ തുടര്‍ച്ചയായി രാജ്യത്ത് 200 രൂപ നോട്ടുകളും നിലവില്‍ വരുന്നു. റിസര്‍വ് ബാങ്ക് ഓഫ് ഇന്ത്യയുടെ ബോര്‍ഡ് യോഗം പുതിയ 200 രൂപ നോട്ടുകള്‍ പുറത്തിറക്കാന്‍ നിര്‍ദേശം നല്‍കിയതായി റിപ്പോര്‍ട്ട്.

കഴിഞ്ഞ മാസം ചേര്‍ന്ന ബോര്‍ഡ് യോഗത്തിലാണ് 200 രൂപ നോട്ടുകള്‍ അച്ചടിക്കാന്‍ സംബന്ധിച്ച നിര്‍ദ്ദേശം യോഗം അംഗീകരിച്ചത്. ആര്‍ബിഐയിലെ ഉന്നത ഉദ്യോഗസ്ഥരെ ഉദ്ധരിച്ച് ഇന്ത്യാ ടുഡേയാണ് റിപ്പോര്‍ട്ട് പുറത്തുവിട്ടത്.

കേന്ദ്ര സര്‍ക്കാറിന്റെ അംഗീകാരം കൂടി ലഭിച്ചാല്‍ ജൂണിന് മാസത്തിന് ശേഷം അച്ചടി തുടങ്ങാനാണ് നീക്കം. എന്നാല്‍ 200 രൂപ നോട്ടിന്റെ സംബന്ധിച്ച് കൂടുതല്‍ പ്രതികരിക്കാന്‍ ആര്‍ബിഐ അധികൃതര്‍ തയാറായില്ല.

500, 1000 രൂപ നോട്ടുകള്‍ കഴിഞ്ഞ നവംബര്‍ എട്ടിനാണ് കേന്ദ്ര സര്‍ക്കാര്‍ വിപണിയില്‍ നിന്നും പിന്‍വലിച്ചത്. എന്നാല്‍ പിന്നാലെ പുറത്തിറക്കിയ 2000, 500 രൂപ നോട്ടുകള്‍ രാജ്യത്തെ വിപണിയില്‍ വലിയ മാറ്റമാണ് വരുത്തിയത്. രാജ്യത്തെ 86 ശതമാനം വരുന്ന 500, 1000 നോട്ടുകള്‍ക്ക് പകരം ഉയര്‍ന്ന മൂല്യമുള്ള നോട്ടുകള്‍ പുറത്തിറക്കിയതാണ് വിപണിയെ കുഴക്കിയത്. വിപണിയിലെ 2000 രൂപ നോട്ടുകളുടെ ബാഹുല്യം ജനങ്ങളില്‍ ചില്ലറ ക്ഷാമം നിലനിര്‍ത്തുന്നതാണ് പുതിയ നോട്ട് പുറത്തിറക്കാനുള്ള സാഹചര്യമെന്നാണ് വിലയിരുത്തല്‍.

അതേസമയം, പിന്‍വലിച്ച നോട്ടുകളുടെ എത്രശതമാനം തിരിച്ചെത്തി എന്നതിനെ സംബന്ധിച്ച വിവരങ്ങള്‍ സര്‍ക്കാര്‍ ഇതുവരെ പുറത്തുവിട്ടിട്ടില്ല.

സുരക്ഷാ പ്രശ്‌നം; പുതിയ 500, 2000 നോട്ടുകളില്‍ മാറ്റം വരുത്താനൊരുങ്ങി കേന്ദ്രം

chandrika — Mon, 03 Apr 2017 11:26:24 +0000

ന്യൂഡല്‍ഹി: നോട്ടുകളുടെ സുരക്ഷാക്രമീകരണങ്ങളില്‍ മാറ്റം വരുത്താന്‍ കേന്ദ്ര സര്‍ക്കാര്‍ ആലോചന. ഓരോ 3-4 വര്‍ഷം കൂടുമ്പോഴും 2,000, 500 രൂപ നോട്ടുകളുടെ സുരക്ഷാ ക്രമീകരണങ്ങളില്‍ മാറ്റംവരുത്താന്‍ സര്‍ക്കാര്‍ ആലോചിക്കുന്നതായാണ് റിപ്പോര്‍ട്ട്. നോട്ട് പിന്‍വലിക്കലിനു ശേഷമുള്ള നാലു മാസത്തിനിടയില്‍ രാജ്യത്ത് വലിയതോതിലുള്ള കള്ളനോട്ടുകള്‍ പിടികൂടിയ സാഹചര്യത്തിലാണ് നടപടി.

ധനമന്ത്രാലയത്തിന്റെയും ആഭ്യന്തര മന്ത്രാലയത്തിന്റെയും മുതിര്‍ന്ന ഉദ്യോഗസ്ഥരുമായി ആഭ്യന്തര സെക്രട്ടറി രാജീവ് മെഹ്‌റിഷി ഇതുസംബന്ധിച്ചു ചര്‍ച്ച നടത്തി.
മിക്കവാറും എല്ലാ വികസിത രാജ്യങ്ങളും 3-4 വര്‍ഷം കൂടുമ്പോള്‍ സുരക്ഷാ ക്രമീകരണങ്ങളില്‍ മാറ്റം വരുത്താറുണ്ടെന്നും ഇന്ത്യയും ഈ നയം സ്വീകരിക്കണമെന്നുമാണ് ചര്‍ച്ച മുന്നോട്ടുവെച്ചത്.

3-4 വര്‍ഷം കൂടുമ്പോള്‍ നോട്ടുകളിലെ സുരക്ഷാ മാറ്റം കള്ളനോട്ട് തടയാന്‍ സഹായിക്കുമെന്ന് ഉദ്യാഗസ്ഥര്‍ പറയുന്നു. അതേസമയം പുതിയ നോട്ടിലെ 17 സുരക്ഷാ സവിശേഷതകളില്‍ 11 എണ്ണവും പുതിയ കള്ളനോട്ടുകളില്‍ കണ്ടെത്തിയതായും ഉദ്യോഗസ്ഥര്‍ റിപ്പോര്‍ട്ട് ചെയ്തു. കള്ളനോട്ടില്‍ ഗവര്‍ണറുടെ ഒപ്പ് മുതല്‍ വാട്ടര്‍മാര്‍ക്ക്, അശോകസ്തംഭം, നോട്ടിന്റെ ഇടതുവശത്തുള്ള അക്കം എഴുത്ത് തുടങ്ങിയവയൊക്കെ ഉണ്ടായിരുന്നു.

പുതിയതായി ഇറക്കിയ 2,000, 500 രൂപ നോട്ടുകളില്‍ മറ്റുനോട്ടുകള്‍ക്കില്ലാത്ത ഒരു പുതിയ സുരക്ഷാ ക്രമീകരണങ്ങളും ഉള്‍പ്പെടുത്തിയിട്ടില്ലെന്ന് അധികൃതര്‍ വ്യക്തമാക്കി. നോട്ട് പിന്‍വലിക്കലിന് മുന്‍പുവരെ വളരെ കാലംകൂടിയാണ് ഉയര്‍ന്ന മൂല്യമുള്ള നോട്ടുകളുടെ സുരക്ഷാ രൂപകല്‍പനയില്‍ മാറ്റങ്ങള്‍ വരുത്തിയിരുന്നത്. എന്നാല്‍ 1000 രൂപയുടെ നോട്ടില്‍ കാര്യമായ മാറ്റങ്ങളൊന്നും ഇതുവരെ വരുത്തിയിട്ടുമില്ല. 1987ല്‍ പുറത്തിറങ്ങിയ 500 രൂപ നോട്ട് ഒരു പതിറ്റാണ്ട് മുമ്പ് രൂപകല്‍പ്പന ചെയ്തതാണ്.

അതേസമയം, നോട്ട് നിരോധനത്തിന് ശേഷവും ഇപ്പോള്‍ രാജ്യത്ത് 400 കോടി രൂപയുടെ കള്ളനോട്ടുകളാണ് വിപണിയിലുള്ളതെന്നാണ് ഇന്ത്യന്‍ സ്റ്റാറ്റിസ്റ്റിക്കല്‍ ഇന്‍സ്റ്റിറ്റ്യൂട്ടിന്റെ റിപ്പോര്‍ട്ട്.

യു.പിയില്‍ പ്രചാരണത്തിനായി പാര്‍ട്ടികള്‍ പൊടിച്ചത് 5500 കോടി; ഒരു വോട്ടിന് ചെലവ് 750 രൂപ

chandrika — Sat, 18 Mar 2017 06:56:53 +0000

ന്യൂഡല്‍ഹി: ഉത്തര്‍പ്രദേശില്‍ വിവിധ രാഷ്ട്രീയകക്ഷികള്‍ പ്രചാരണത്തിനായി പൊടിപൊടിച്ചത് 5500 കോടി രൂപ. ആയിരം കോടി രൂപ വോട്ടു ചെയ്യാനായി മാത്രം ചെലവഴിച്ചുവെന്നും ഇതുസംബന്ധിച്ച് പഠനം നടത്തിയ സി.എം.എസ് സര്‍വേ വെളിപ്പടുത്തുന്നു.
മൂന്നിലൊരു ഭാഗം വോട്ടര്‍മാരും വോട്ടുചെയ്യാനായി പണമോ മദ്യമോ ആവശ്യപ്പെട്ടവരാണെന്നും സര്‍വേ പറയുന്നു. പ്രിന്റിങ്ങ്, വീഡിയോ സ്‌ക്രീന്‍ പ്രൊജക്ടര്‍ അടക്കമുള്ള ഇലക്ട്രോണിക് ഉപകരണങ്ങള്‍, വീഡിയോ വാന്‍ എന്നിവയ്‌ക്കെല്ലാം ചെലവഴിച്ചത് 600 മുതല്‍ 900 കോടി വരെയാണ്.
25 ലക്ഷം രൂപയാണ് ഒരു സ്ഥാനാര്‍ത്ഥിക്ക് ചെലവഴിക്കാ ന്‍ തെരഞ്ഞെടുപ്പ് കമ്മീഷന്‍ അനുവദിച്ച പരമാവധി തുക.
എന്നാല്‍ അതില്‍ക്കൂടുതല്‍ പണം സ്ഥാനാര്‍ത്ഥികള്‍ ചെലവിട്ടു എന്ന് തെളിയിക്കുന്നതാണ് സര്‍വേ. യുപിയില്‍ പോള്‍ ചെയ്ത ഓരോ വോട്ടിനും രാഷ്ട്രീയ പാര്‍ട്ടികളില്‍ നിന്നും 750 രൂപ ചെലവായി. രാജ്യത്തെ ഏറ്റവും ഉയര്‍ന്ന തുകയാണിത്.നിയമസഭാ തെരഞ്ഞെടുപ്പിനിടെ യുപിയില്‍ നിന്നും 200 കോടിയോളം രൂപയും പഞ്ചാബില്‍ നൂറു കോടിയോളം രൂപയും അധികൃതര്‍ പിടിച്ചെടുത്തെന്നാണ് കണക്ക്.
വോട്ട് ചെയ്യാന്‍ പണം വാങ്ങിയവരെ വ്യക്തിപരമായി അറിയാവുന്നവരാണ് സര്‍വേയില്‍ പങ്കെടുത്ത യുപിയിലെ 55 ശതമാനം പേരും.
നോട്ടുനിരോധനം പാര്‍ട്ടികളുടെ തെരഞ്ഞെടുപ്പ് ചെലവ് കൂട്ടിയെന്നാണ് സര്‍വേയിലെ മറ്റൊരു കണ്ടെത്തല്‍. ചില മണ്ഡലങ്ങളില്‍ മത്സരം കടുത്തതായിരുന്നു. വോട്ടര്‍മാരുടെ എണ്ണവും ഓരോ വോട്ടറുടേയും സ്വാധീനവും പരിഗണിക്കേണ്ട ഘടകങ്ങളായപ്പോള്‍ നല്‍കേണ്ടി വന്ന തുക 500 മുതല്‍ 2000 രൂപ വരെയായി ഉയര്‍ന്നു. വീടു കയറിയുള്ള പ്രചാരണങ്ങള്‍, റാലികള്‍, ടെലിവിഷന്‍-പത്ര പരസ്യങ്ങള്‍, മള്‍ട്ടി സ്‌ക്രീന്‍ പ്രൊജക്ഷനുകള്‍, മോട്ടോര്‍സൈക്കിള്‍ റാലികള്‍, സെലിബ്രിറ്റി ഷോകള്‍ തുടങ്ങിയവ ആയിരുന്നു യുപി പാര്‍ട്ടികളുടെ തെരഞ്ഞെടുപ്പ് പ്രചാരണ തന്ത്രങ്ങള്‍.