വിദ്യാബാലനു വേണ്ടി കരുതിവെച്ചിരുന്ന മാധവിക്കുട്ടിയെയല്ല മഞ്ജുവാര്യര്‍ ചെയ്തത്. വിദ്യ ചെയ്തിരുന്നെങ്കില്‍ അതില്‍ അല്‍പം ലൈംഗികതയൊക്കെ കടന്നുവരുമായിരുന്നു. എന്നാല്‍ മഞ്ജുവിലേക്ക് എത്തിയപ്പോള്‍ മാധവിക്കുട്ടി പൂര്‍ണമായും മാറി. സാധാരണ തൃശൂര്‍ക്കാരിയുടെ നാട്ടുഭാഷയില്‍ പെരുമാറുന്ന എഴുത്തുകാരിയെ അവതരിപ്പിക്കാന്‍ സാധിച്ചു. കഥ മനസ്സില്‍ തെളിഞ്ഞപ്പോള്‍ തന്നെ മഞ്ജുവിന്റെ പേര് ഉയര്‍ന്നെങ്കിലും മേക്ക് ഓവര്‍ ശരിയാകുമോയെന്ന ആശങ്കയിലാണ് വിദ്യയെ സമീപിച്ചത്. എന്നാല്‍ രണ്ടു ദിവസത്തിനുള്ളില്‍ മഞ്ജു കഥാപാത്രത്തെ ഉള്‍കൊണ്ടു. ചിത്രീകരണത്തെക്കുറിച്ച് ആലോചിക്കുമ്പോള്‍ വിദ്യ പിന്മാറിയത് അനുഗ്രഹമായി തോന്നുന്നുവെന്നും അദ്ദേഹം പറഞ്ഞു.
സിനിമ പുറത്തിറങ്ങിയാല്‍ വിവാദങ്ങള്‍ക്ക് സാധ്യതയുണ്ടെങ്കിലും അത് കാര്യമാക്കുന്നില്ല. കമല സുരയ്യയിലേക്കുള്ള കഥാനായികയുടെ മാറ്റം അംഗീകരിക്കാന്‍ വര്‍ഗീയ ഫാസിസ്റ്റുകള്‍ക്ക് സാധിക്കില്ല. അതിനാല്‍ വിവാദങ്ങള്‍ ഉണ്ടാകുമെന്നത് തീര്‍ച്ചയാണ്. എന്നാല്‍ മാധവിക്കുട്ടിയുടെ ജീവിതം പറയുമ്പോള്‍ അത്തരം കാര്യങ്ങള്‍ മാറ്റി നിര്‍ത്താനാവില്ലെന്നും കമല്‍ പറഞ്ഞു.

പിന്മാറ്റത്തിന്റെ കാരണം വ്യക്തമാക്കാന്‍ വിദ്യാബാലന്‍ അന്ന് തയാറായിരുന്നില്ല. തുടര്‍ന്നാണ് ആമിയായി നടി മഞ്ജുവാര്യരെ സംവിധായകന്‍ കമല്‍ തെരഞ്ഞെടുത്തത്. എന്നാല്‍ ഇപ്പോള്‍ ചിത്രത്തില്‍ പിന്മാറിയതിന്റെ കാരണം വ്യക്തമാക്കി രംഗത്തു വന്നിരിക്കുകയാണ് വിദ്യാബാലന്‍. പ്രതീക്ഷിച്ച രീതിയില്‍ തന്റെ കഥാപാത്രവും ചിത്രവും വികസിച്ചില്ലെന്ന പേരില്‍ ആമി ടീമുമായി ഉണ്ടായ അഭിപ്രായവ്യത്യാസമാണ് സിനിമയില്‍ നിന്ന് പിന്മാറാന്‍ കാരണമെന്നാണ് വിദ്യാബാലന്‍ പറയുന്നത്. ആവേശത്തോടെയാണ് കമലാ സുരയ്യയുടെ വേഷം ചെയ്യാന്‍ തീരുമാനിച്ചത്.

തിരക്കഥ പൂര്‍ത്തിയായപ്പോഴാണ് കഥാപാത്രത്തിന് പൂര്‍ണത വന്നിട്ടില്ലെന്ന് തിരിച്ചറിഞ്ഞത്. ആമി ടീമിനെ ഇക്കാര്യം അറിയിച്ചെങ്കിലും മാറ്റാന്‍ പറ്റില്ലെന്ന് അറിയിക്കുകയായിരുന്നു. ഇതാണ് പെട്ടെന്നൊരു തീരുമാനമെടുക്കാന്‍ കാരണമെന്നും വിദ്യ പറഞ്ഞു.

വിദ്യാബാലന്‍ പിന്മാറിയതോടെ നിരവധി നടിമാരുടെ പേരുകള്‍ ആമിയിലേക്ക് ഉയര്‍ന്നു കേട്ടെങ്കിലും പിന്നീട് മഞ്ജുവാര്യരെ പരിഗണിക്കുകയായിരുന്നു.

‘ആമിയില്‍ നിന്ന് മാറുന്നതിനെക്കുറിച്ചൊന്നും ചിന്തിച്ചിട്ടേയില്ല. ഒരിക്കലും പിന്‍മാറുകയില്ല. എന്നാല്‍ ആമിയെ ഏറ്റെടുക്കുമ്പോള്‍ പേടിയുണ്ട്. മലയാളികളെല്ലാം ഇഷ്ടപ്പെടുന്ന എഴുത്തുകാരിയാണ് മാധവിക്കുട്ടി. അവരുടെ കഥ സിനിമയാകുമ്പോള്‍ അതിനെ ഏറെ പ്രതീക്ഷയോടെയാണ് ആളുകള്‍ നോക്കിക്കാണുക.അപ്പോള്‍ ആ കഥാപാത്രത്തോട് പൂര്‍ണമായി നീതി പുലര്‍ത്താനാവണം. എന്റെ നൂറുശതമാനവും ഞാനതിനു ശ്രമിക്കും. മാധവിക്കുട്ടിയുടെ ആമി അവസാനം തന്നിലേക്കെത്തുമെന്ന് കരുതിയിരുന്നില്ല. അവസരം ലഭിച്ചത് ഭാഗ്യമായണ് കരുതുന്നത്’ ഭാഗ്യലക്ഷ്മിയുടെ ആമിയെക്കുറിച്ചുള്ള ചോദ്യങ്ങള്‍ക്ക് മഞ്ജുവാര്യര്‍ മറുപടി
പറഞ്ഞു.

ബോളിവുഡ് നടി വിദ്യാബാലനെയായിരുന്നു ആദ്യം ആമിയായി തീരമാനിച്ചിരുന്നത്. എന്നാല്‍ കമലുള്‍പ്പെട്ട ദേശീയഗാന വിവാദത്തെ തുടര്‍ന്ന് വിദ്യാബാലന്‍ പിന്‍മാറുകയായിരുന്നു. പിന്നീട് മലയാളത്തിലെ മുന്‍നിര നായികമാരെല്ലാം തന്നെ ആമിയായി എത്തുന്നുവെന്ന പ്രചാരണങ്ങളുണ്ടായി. തുടര്‍ന്നാണ് മഞ്ജുവാര്യറിലേക്ക് കമലെത്തുന്നത്. എന്നാല്‍ സംഘ്പരിവാര്‍ ശക്തികള്‍ വിമര്‍ശനവുമായി എത്തി. വിവാദമായപ്പോള്‍ ആമിയാവുന്നതില്‍ രാഷ്ട്രീയമില്ലെന്ന് വ്യക്തമാക്കി മഞ്ജുവിന്റെ പോസ്റ്റ് പ്രത്യക്ഷപ്പെട്ടിരുന്നു.