രണ്ടാം സ്ഥാനത്തുള്ള ഹാദി അല്‍ ആമിരിയുടെ സഖ്യവുമായുണ്ടാക്കിയ കൂട്ടുകെട്ടിനെക്കുറിച്ച് സദ്ര്‍ പ്രസ്താവനയില്‍ പരാമര്‍ശിച്ചില്ല. അബാദി-സദ്ര്‍ സഖ്യത്തോട് ആമിരിയുടെ ക്യാമ്പില്‍നിന്നും പ്രതികരണമൊന്നും ഉണ്ടായിട്ടില്ല. സദ്‌റിന്റെ മറ്റ് സഖ്യങ്ങള്‍ക്ക് താനുമായുള്ള ബന്ധം കോട്ടമുണ്ടാക്കില്ലെന്ന് അബാദി വ്യക്തമാക്കി. സദ്‌റും അബാദിയും ഒന്നിക്കുന്നത് സര്‍ക്കാര്‍ രൂപീകരണത്തിനുള്ള തടസ്സങ്ങള്‍ നീക്കിയേക്കും.

ഇറാഖ് ജനതയുടെ താല്‍പര്യങ്ങള്‍ സംരക്ഷിക്കുന്നതിനുവേണ്ടി പൊതുതത്വങ്ങളില്‍ ഐക്യപ്പെടാനും സര്‍ക്കാര്‍ രൂപീകരണം വേഗത്തിലാക്കുന്നതിന് വിഭാഗീയതയും വംശീയതയും മറികടന്ന് ഒരുമിക്കാനും തീരുമാനിച്ചതായി സദ്ര്‍ പറഞ്ഞു. അമേരിക്കന്‍ അധിനിവേശത്തിനെതിരെ സായുധ പോരാട്ടം നടത്തിയ സദ്ര്‍ ഇറാനുമായി സഖ്യമുള്ള ശിയാ പാര്‍ട്ടികളുടെ ശക്തനായ പ്രതിയോഗിയും പാവങ്ങളുടെ വക്താവുമായായാണ് അറിയപ്പെടുന്നത്.
ഇറാഖ് സമൂഹത്തിലെ എല്ലാ വിഭാഗങ്ങള്‍ക്കും പങ്കാളിത്തമുള്ള ഭരണകൂടമായിരിക്കും നിലവില്‍ വരുന്നതെന്ന് അദ്ദേഹം അറിയിച്ചു. മെയ് 12ന് നടന്ന പാര്‍ലമെന്റ് തെരഞ്ഞെടുപ്പില്‍ വ്യാപക ക്രമക്കേടുകളുണ്ടായ ആരോപണത്തിന്റെ പശ്ചാത്തലത്തില്‍ അബാദി ഭണകൂടം വീണ്ടും വോട്ടെണ്ണണമെന്ന് ആവശ്യപ്പെട്ടിട്ടുണ്ട്. ഏതായാലും പുതിയ സര്‍ക്കാര്‍ രൂപീകരണ ചര്‍ച്ചകള്‍ ഇനിയും ആഴ്ചകളോ മാസങ്ങളോ തുടരും.

ഇറഖില്‍ നിന്നും ഐ.എസിനെ തുരത്തിയതിന് ശേഷം നടക്കുന്ന ആദ്യ പാര്‍ലമെന്ററി തെരഞ്ഞെടുപ്പിലാണ് സദ്‌റിന്റെ നേതൃത്വത്തിലുള്ള സെക്കുലര്‍ സഖ്യം വിജയത്തിലേക്ക് എത്തിയത്. ഇറാഖില്‍ ഇസ്്‌ലാമിക് സ്റ്റേറ്റ് (ഐ.എസ്) തീവ്രവാദികളുമായി പോരാടിയ ഇറാന്‍ പിന്തുണയുള്ള ശിയാ നേതാവായ ഹാദി അല്‍ അമീരിയുടെ ഫതഹ് സഖ്യമാണ് രണ്ടാം സ്ഥാനത്ത്. നിലവിലുള്ള അവസ്ഥ തുടരുകയാണെങ്കില്‍ സദ്‌റും സഖ്യകക്ഷികളും അധികാരത്തിലെത്തുമെന്ന് ഉറപ്പാണ്.

ഐ.എസില്‍നിന്ന് രാജ്യത്തെ മോചിപ്പിച്ചത് വോട്ടാക്കി തെരഞ്ഞെടുപ്പില്‍ മുതലെടുപ്പ് നടത്താമെന്ന അബാദിയുടെ പ്രതീക്ഷകള്‍ക്കാണിപ്പോള്‍ തിരിച്ചടി നേരിട്ടിരിക്കുന്നത്. അമേരിക്കന്‍ അധിനവേശ സേനക്കെതിരെ പോരാടിയിരുന്ന മുഖ്തത അല്‍ സദ്‌റിന്റെ ശക്തമായ തിരിച്ചുവരവിന് തെരഞ്ഞെടുപ്പ് സാക്ഷ്യംവഹിച്ചിരിക്കുകയാണ്. പ്രധാനമന്ത്രി ഹൈദര്‍ അല്‍ അബാദിയുടെ നസ്റ് സഖ്യം മൂന്നാമതാണ്.

വോട്ടെടുപ്പ് നടന്ന 18 പ്രവിശ്യകളിലെ 16 സ്ഥലങ്ങളിലും വോട്ടെണ്ണി തീര്‍ന്നിട്ടുണ്ട്. 91 ശതമാനം വോട്ടെണ്ണലും കഴിയുമ്പോള്‍ ബഗ്ദാദും ഉള്‍പ്പെടെ ആറു പ്രവിശ്യകളിലും സദറിന്റെ സഖ്യമാണ് മുന്നേറിയത്. സദ്റിസ്റ്റുകളും ഇറാഖ് കമ്മ്യൂണിസ്റ്റ് പാര്‍ട്ടിയും ഇടതുസംഘടനകളും ഒന്നിച്ചാണ് (സൈറൂണ്‍ സഖ്യം) തെരഞ്ഞെടുപ്പിനെ നേരിട്ടത്. സഖ്യം 1.3 മില്ല്യണ്‍ വോട്ടുകളും 329ല്‍ 54 സീറ്റുകളും നേടിയതായാണ് റിപ്പോര്‍ട്ടുകള്‍. ഏറ്റവും കൂടുതല്‍ സീറ്റുകള്‍ ലഭിച്ചെങ്കിലും മറ്റുകക്ഷികളുടെ കൂടി പിന്തുണ ലഭിച്ചാല്‍ മാത്രമേ മുഖ്തദ അല്‍ സദ്റിന് പ്രധാനമന്ത്രി പദത്തിലെത്താന്‍ സാധിക്കുകയുള്ളൂ.

ഇറാഖില്‍ ഏറ്റവും കൂടുതല്‍ സ്വാധീനമുള്ള ശിയാ നേതാവാണ് സദ്ര്‍. 2003ല്‍ പ്രസിഡന്റ് സദ്ദാം ഹുസൈനെ അധികാരഭ്രഷ്ടനാക്കിയ അമേരിക്കന്‍ അധിനിവേശത്തിന് ശേഷമാണ് അദ്ദേഹം രാഷ്ട്രീയരംഗത്ത് തിളങ്ങിത്തുടങ്ങിയത്. അദ്ദേഹത്തിന്റെ നേതൃത്വത്തിലുള്ള മെഹ്ദ് ആര്‍മി മിലീഷ്യ യു.എസ് സേനക്കെതിരെ വന്‍ പോരാട്ടം നടത്തി. എത്രയും വേഗം യു.എസ് സേന പിന്മാറണമെന്നായിരുന്നു അദ്ദേഹത്തിന്റെ ആവശ്യം. 2006നും 2007നുമിടക്ക് ഇറാഖില്‍ വിഭാഗീയ അക്രമങ്ങള്‍ അരങ്ങേറിയപ്പോള്‍ ആയിരക്കണക്കിന് സുന്നി മുസ്്‌ലിംകളെ കൊന്നൊടുക്കിയതില്‍ സദ്‌റിന്റെ മീലിഷ്യക്ക് പങ്കുള്ളതായി ആരോപണമുണ്ട്. മെഹ്ദി ആര്‍മിയെ ഇറാഖ് ഭരണകൂടം അടിച്ചമര്‍ത്തിയപ്പോള്‍ സദ്ര്‍ ഇറാനിലേക്ക് പലായനം ചെയ്തു. നൂരി അല്‍ മാലികി പ്രധാനമന്ത്രിയായതോടെ രാജ്യത്ത് തിരിച്ചെത്തി. കുറച്ചു വര്‍ഷങ്ങളായി ഇറാനില്‍നിന്ന് അകന്നുനില്‍ക്കുന്ന അദ്ദേഹം ഇറാഖ് ദേശീയവാദത്തിന്റെ വക്താവായി ജനങ്ങള്‍ക്കിടയില്‍ സ്വാധീനമുറപ്പിക്കുകയായിരുന്നു.

ഇസ്്‌ലാമിക് സ്റ്റേറ്റ്(ഐ.എസ്) തീവ്രവാദികളെ തുരത്തിയെ ശേഷം ഇറാഖില്‍ നടന്ന ആദ്യ തെരഞ്ഞെടുപ്പാണിത്. അമേരിക്കയുടെയും ഇറാന്റെയും ഉറ്റസുഹൃത്താണ് നിലവിലെ പ്രധാനമന്ത്രിയായ ഹൈദര്‍ അല്‍ അബാദി. അദ്ദേഹത്തിന്റെ ഭരണത്തെ വിലയിരുത്തുന്ന ഹിതപരിശോധന കൂടിയായാണ് തെരഞ്ഞെടുപ്പിനെ വിലയിരുത്തുന്നത്. 90 ശതമാനത്തിലേറെ വോട്ടുകളും എണ്ണിക്കഴിഞ്ഞിട്ടുണ്ട്.

അതേസമയം ശിയാ സഖ്യങ്ങളുടെ ബലപരീക്ഷണമാണ് ഇറാഖില്‍ നടക്കുന്നത്. ഈ പാര്‍ട്ടികളെല്ലാം ഇറാനുമായി ഉറ്റബന്ധമുള്ളവരാണ്. ഇറാനുമായി ഇറാഖിനെ കൂടുതല്‍ അടുപ്പിക്കാന്‍ ആഗ്രഹിക്കുന്നത് അബാദിയെക്കാള്‍ മറ്റു ശിയാ നേതാക്കളാണ്. എന്നാല്‍ ഇറാനെ അകറ്റിനിര്‍ത്തി സ്വന്തം നിലപാടുകളിലൂടെ മുന്നോട്ടുപോകുന്ന സദ്‌റിന് യുവാക്കളുടെയും ദുര്‍ബല വിഭാഗങ്ങളുടെയും പിന്തുണുണ്ട്. കമ്യൂണിസ്റ്റുകളെയും മറ്റ് സ്വതന്ത്ര മതേതര പാര്‍ട്ടികളെയും കൂട്ടിയാണ് സദ്ര്‍ സഖ്യമുണ്ടാക്കിയിരിക്കുന്നത്. നാലു വര്‍ഷം മുമ്പ് ഇറാഖില്‍ ഐ.എസ് സ്വാധീനമുറപ്പിച്ച ശേഷമാണ് അബാദി അധികാരത്തില്‍ വന്നത്. വീണ്ടും അബാദി പ്രധാനമന്ത്രിയായി തെരഞ്ഞെടുക്കപ്പെട്ടാല്‍ അമേരിക്കയുമായും ഇറാനുമായും സമദൂരം പാലിച്ച് മുന്നോട്ടുപോകാന്‍ അദ്ദേഹം നിര്‍ബന്ധിതനാകും. ഇറാന്‍ ആണവകരാറില്‍നിന്ന് അമേരിക്ക പിന്മാറിയതും ഉപരോധങ്ങള്‍ ശക്തമാക്കിയതും അദ്ദേഹത്തിന് തിരിച്ചടിയാകും. എന്നാല്‍ തെരഞ്ഞെടുപ്പില്‍ സദ്‌റിനുണ്ടായ മുന്നേറ്റം എല്ലാംമാറ്റിമറിച്ചിരിക്കുകയാണ്.