Abu Dhabi – Chandrika Daily

അബുദാബി പൊലീസ് വനിതാ സേനക്ക് കരുത്തായി 88 പേര്‍കൂടി സേവനരംഗത്തേക്ക്

webdesk18 — Sat, 17 May 2025 18:20:55 +0000

അബുദാബി: അബുദാബി പോലീസ് പരിശീലന കോഴ്‌സുകളില്‍നിന്ന് റിക്രൂട്ട് ചെയ്ത 88 വനിതക ള്‍കൂടി ബിരുദം നേടി. അബുദാബി പോലീസ് ജനറല്‍ കമാന്‍ഡ് സെയ്ഫ് ബിന്‍ സായിദ് അക്കാദമി ഫോര്‍ പോലീസ് ആന്റ് സെക്യൂരിറ്റി സയന്‍സസുമായി അഫിലിയേറ്റ് ചെയ്തിട്ടുള്ള അല്‍ഐന്‍ സിറ്റിയി ലെ പോലീസ് യോഗ്യതാ വകുപ്പില്‍ നിന്നുള്ള 88 പുതിയ റിക്രൂട്ട്മെന്റുകള്‍ ഉള്‍പ്പെടുന്ന ബേസിക് പ്രിപ്പ റേഷന്‍ കോഴ്സ് ഫോര്‍ ന്യൂ റിക്രൂട്ട്സ് നമ്പര്‍ (63) ന്റെ ബിരുദദാന ചടങ്ങാണ് നടന്നത്.

അക്കാദമിക്, സേവന വൈജ്ഞാനികത, സുരക്ഷ, പോലീസ് ശാസ്ത്രങ്ങള്‍ എന്നിവയുള്‍പ്പെടെ പോലീസ് സുരക്ഷാ പ്രവര്‍ത്തനങ്ങളുടെ വിവിധ മേഖലകളില്‍ യോഗ്യത നേടിയ പുതിയ ബാച്ച് വനിതാ ബിരുദധാരികള്‍ സേവനരംഗത്തേക്ക് ഇറങ്ങുന്നതില്‍ പോലീസ് യോഗ്യതാ വിഭാഗം ഡയറക്ടര്‍ ബ്രിഗേ ഡിയര്‍ ഹുസൈന്‍ അലി അല്‍ ജുനൈബി അഭിമാനം പ്രകടിപ്പിച്ചു.

കേഡര്‍മാരെ യോഗ്യരാക്കുക, അവരു ടെ കഴിവുകള്‍ വികസിപ്പിക്കുക, സുരക്ഷയും എമിറേറ്റിനെ സംരക്ഷിക്കാനുള്ള സന്നദ്ധതയും സ്ഥാപന നേതൃത്വവും വര്‍ദ്ധിപ്പിക്കുന്നതില്‍ അബുദാബി പോലീസിന്റെ മുന്‍ഗണനകള്‍ കൈവരിക്കുന്നതിന് അവര്‍ ക്ക് പ്രത്യേക വൈദഗ്ധ്യവും അറിവും നല്‍കുക എന്നിവ പൂര്‍ത്തിയാക്കിയാണ് പുതിയ ബാച്ച് ബിരുദം നേടി സേവനരംഗത്തേക്ക് ചുവട് വെയ്ക്കുന്നത്.

പോലീസ്, സുരക്ഷാ മേഖലക്കൊപ്പം തുടരാനുള്ള താല്‍പ്പര്യത്തെയും, ഫീല്‍ഡ് പരിശീലനം പൂ ര്‍ത്തിയാക്കി അക്കാദമിക് പാഠ്യപദ്ധതികള്‍ പഠിച്ചു അടിയന്തര സാഹചര്യങ്ങള്‍ കൈകാര്യം ചെയ്യുന്നതിനും ഉയര്‍ന്ന തലങ്ങളിലെത്താനുമുള്ള വനിതകളുടെ താല്‍പ്പര്യത്തെ അദ്ദേഹം പ്രശംസിച്ചു.

വിവിധ മേഖലകളില്‍ യുഎഇയുടെ വികസന പ്രക്രിയയില്‍ യുഎഇ വനിതകള്‍ ഗണ്യമായ സംഭാവന നല്‍കുന്നുണ്ടെ ന്നും സുരക്ഷ നിലനിര്‍ത്തുന്നതിലും സുരക്ഷാ മേഖലകളില്‍ ബുദ്ധിമുട്ടുള്ള ജോലികള്‍ ചെയ്യുന്നതിലും അവര്‍ പ്രത്യേക പങ്ക് വഹിക്കുന്നുണ്ടെന്നും അദ്ദേഹം വിശദീകരിച്ചു.

ഡെപ്യൂട്ടി ഡയറക്ടര്‍ കേണല്‍ ഡോ. അലി ഖാമിസ് അല്‍ യമഹി, അബുദാബി സിവില്‍ ഡിഫന്‍സ് അതോറിറ്റി പ്രതിനിധി കേണല്‍ മുഹമ്മദ് ഖാമിസ് അല്‍ കാബി തുടങ്ങി നിരവധി ഉദ്യോഗസ്ഥര്‍ സന്നിഹിതരായിരുന്നു.

മലയാളി എഞ്ചിനീയർ അബുദാബിയിൽ മരിച്ചു

webdesk13 — Sat, 22 Feb 2025 06:00:34 +0000

അബുദാബി: തൃശൂർ കേച്ചേരി പട്ടിക്കര സ്വദേശി മിഷാൽ (34) ഹൃദയാഘാതം മൂലം മരണപ്പെട്ടു. ഇതിഹാദ് എയർവേസിൽ എയർക്രാഫ്റ്റ് എഞ്ചിനീയർ ആയിരുന്നു. പട്ടിക്കര മണ്ണാറയിൽ മുസ്തഫയുടെ മകനാണ്.

നാട്ടിൽ പോയ ഭാര്യ നാളെ പ്രസവിക്കാനിരിക്കെയാണ് ഇന്ന് ഭർത്താവ് മിഷാൽ മരണപ്പെടുന്നത്. ഏക സഹോദരി രണ്ടുവർഷം മുമ്പാണ് അര്‍ബുദം മൂലം മരണപ്പെട്ടത്.

കുടുംബം നാട്ടിലായതിനാൽ ഒറ്റയ്ക്ക് താമസിക്കുകയായിരുന്ന മിഷാൽ ഉറക്കത്തിനിടെയാണ് മരണപ്പെട്ടത്.

മലയാളികളെ കോടിപതികളാക്കിയ ബിഗ് ടിക്കറ്റ്; 59 കോടി ഇത്തവണയും മലയാളിക്ക്

webdesk13 — Tue, 04 Feb 2025 07:18:23 +0000

അബുദാബി: നിരവധി മലയാളികളെ കോടിപതികളാക്കിയ ബിഗ് ടിക്കറ്റ് നറുക്കെടുപ്പ് ഇത്തവണയും മലയാളിക്ക് സ്വന്തം. ഷാര്‍ജയില്‍ സ്വദേശിയോടൊപ്പം ജോലി ചെയ്യുന്ന ആഷിഖ് പടിഞ്ഞാറത്താണ് 25 ദശലക്ഷം ദിര്‍ഹമിന് (59.29 കോടി രൂപ) അര്‍ഹനായത്.

അബുദാബി എയര്‍പോര്‍ട്ട് ആസ്ഥാനമായി നടക്കുന്ന ബിഗ് ടിക്കറ്റ് 271 സീരീസ് നറുക്കെടുപ്പിലാണ് ഒന്നാം സമ്മാനത്തിന് ആഷിഖ് അര്‍ഹനായത്. കഴിഞ്ഞ കുറെ കാലമായി ആഷിഖ് എല്ലാ മാസവും ബിഗ് ടിക്കറ്റെടുക്കാറുണ്ട്.

ജനുവരി 29ന് ഓണ്‍ലൈന്‍ വഴി എടുത്ത 456808 നമ്പര്‍ ടിക്കറ്റിനാണ് സമ്മാനം ലഭിച്ചത്. കഴിഞ്ഞ ഇരുപത് വര്‍ഷമായി ഷാര്‍ജയില്‍ ജോലി ചെയ്തുവരികയാണ്. താന്‍ ഒറ്റയ്ക്കാണ് ടിക്കറ്റെടുത്തതെന്ന് ആഷിഖ് പറഞ്ഞു.

271 സീരിസ് പ്രതിവാര നറുക്കെടുപ്പില്‍ പത്ത് ലക്ഷം ദിര്‍ഹമിന് മഞ്ജു അജിതകുമാര്‍, സുന്ദര്‍ മരകള, അബ്ദുല്ല സുലൈമാന്‍ എന്നീ ഇന്ത്യക്കാരും മുഹമ്മദ് അതീഖുല്‍ ആലം എന്ന ബംഗ്ലാദേശ് പൗരനും അര്‍ഹരായി. ഡ്രീംകാര്‍ നറുക്കെടുപ്പില്‍ ബിഎംഡബ്ല്യൂ 449 കാറിന് മുഹമ്മദ് അല്‍സറൂനി നേടി.

അവസാനം നടന്ന 270 സീരീസ് നറുക്കെടുപ്പിലും ഒന്നാം സമ്മാനം മലയാളിയായ മനുമോഹനാണ് ലഭിച്ചത്. ബഹ്‌റൈനില്‍ നഴ്‌സായി ജോലി ചെയ്യുന്ന മനുമോഹന് മുപ്പത് ദശലക്ഷം ദിര്‍ഹമാണ് നറുക്കെടുപ്പിലൂടെ നേടിയത്. 15 സുഹൃത്തുക്കള്‍ ചേര്‍ന്നാണ് മനു ടിക്കറ്റെടുത്തിരുന്നത്.

269 സീരീസ് നറുക്കെടുപ്പില്‍ 25 ദശലക്ഷം ദിര്‍ഹം മലയാളിയായ അരവിന്ദ് അപ്പുക്കുട്ടനാണ് ലഭിച്ചത്.

മലയാളി യുവാക്കളെ അബുദാബിയില്‍ നിന്നും കാണാതായി

webdesk13 — Sun, 26 May 2024 06:08:06 +0000

അബുദാബി: അബുദാബിയില്‍ നിന്നും തായ്‌ലാന്റിലേക്ക് ജോലി തേടിപ്പോയ മലപ്പുറം സ്വദേശികളായ സഫീര്‍, സുഹൈബ് എന്നിവരെ കാണാനില്ലെന്ന് പരാതി. പെരിന്തല്‍മണ്ണ വള്ളിക്കാപറ്റ കുട്ടീരി ഹൗസില്‍ അബൂബക്കറിന്റെ മകന്‍ സുഹൈബ്, ഒപ്പമുണ്ടായിരുന്ന സഫീര്‍ എന്നിവരെയാണ് ഈ മാസം 22 മുതല്‍ കാണാതായിട്ടുള്ളത്. സുഹൈബും സഫീറും ഇക്കഴിഞ്ഞ മാര്‍ച്ച് 27നാണ് സന്ദര്‍ശക വിസയില്‍ ദുബൈയിലെത്തുന്നത്.

പിന്നീട് അബുദാബിയിലെ മില്ലേനിയം ടവറിനടുത്തുള്ള ഗിഫ്റ്റ് കിംഗ് ബില്‍ഡിംഗില്‍ താമസിക്കുമ്പോഴാണ് ഓണ്‍ലൈന്‍ ഇന്റര്‍വ്യൂ വഴി തായ്‌ലാന്റിലേക്കുള്ള തൊഴില്‍ വിസ കരസ്ഥമാക്കുന്നത്. ഈമാസം 21ന് അബുദാബിയില്‍ നിന്നും ഇത്തിഹാദ് വിമാനത്തില്‍ തായ്‌ലാന്റിലേക്ക് പുറപ്പെടുന്നു. 22 ന് തായ്‌ലാന്റ് സുവര്‍ണഭൂമി എയര്‍പോര്‍ട്ടിലെത്തിയ ചിത്രങ്ങള്‍ കുടുംബവുമായി പങ്കുവെച്ചിരുന്നു.

എയര്‍പോര്‍ട്ടിലെത്തിയ യുവാക്കളെ ഏജന്റ് വാഹനത്തില്‍ കയറ്റി കൊണ്ടുപോയെന്നും 21 മണിക്കൂര്‍ നീണ്ട യാത്രക്ക് ശേഷം അജ്ഞാതമായ സ്ഥലത്ത് എത്തിച്ചുവെന്നുമാണ് അറിയുന്നത്. അന്വേഷണത്തില്‍ ഇവരുള്ളത് മ്യാന്‍മര്‍ അതിര്‍ത്തിക്കടുത്തുള്ള സ്ഥലത്താണെന്ന് സൂചനയുണ്ട്. ഇവരുടെ പാസ്‌പോര്‍ട്ടും മറ്റു രേഖകളും പിടിച്ചുവെക്കുകയും ക്രൂരമായ മര്‍ദ്ദനത്തിന് വിധേയരാക്കിയെന്നുമാണ് കിട്ടിയ വിവരം. യുവാക്കളുടെ രക്ഷിതാക്കള്‍ മലപ്പുറം ജില്ലാ പോലീസ് സൂപ്രണ്ട് മുഖേന ബാങ്കോക്കിലെ ഇന്ത്യന്‍ എംബസിയില്‍ പരാതി നല്‍കിയിട്ടുണ്ട്.

ഇന്ത്യന്‍ മീഡിയ അബുദാബി ഇഫ്താർ സംഗമം സംഘടിപ്പിച്ചു

webdesk13 — Tue, 02 Apr 2024 07:51:27 +0000

അബൂദബി: ഇന്ത്യന്‍ മീഡിയ അബൂദബി (ഐ.എം.എ) ഇഫ്താര്‍ സംഗമം സംഘടിപ്പിച്ചു.

അബൂദബി മുഷ്‌രിഫ് മാളിലെ ഇന്ത്യാ പാലസില്‍ നടന്ന ഇഫ്താറില്‍ ഇന്ത്യന്‍ എംബസി തേര്‍ഡ് സെക്രട്ടറി (പ്രസ് ആന്‍ഡ് ഇന്‍ഫര്‍മേഷന്‍) അനീസ് ഷഹല്‍, ബിന്‍ അലി മെഡിക്കല്‍ ആന്‍ഡ് സെയ്ഫ് കെയര്‍ മെഡിക്കല്‍ ഇന്‍ഡസ്ട്രീസ് സി.ഇ.ഒ. ഒമര്‍ അലി എന്നിവര്‍ മുഖ്യാതിഥികളായിരുന്നുഎസ്.എഫ്.സി. ഗ്രൂപ്പ് വൈസ് പ്രഡിസന്റ് (ബിസിനസ് ഡവലപ്‌മെന്റ് ആന്‍ഡ് ഓപറേഷന്‍സ്) സംബന്ധിച്ചു. അനീസ് ഷഹലിനെയും ഒമര്‍ അലിയെയും ചടങ്ങില്‍ ആദരിച്ചു.

പ്രസിഡന്റ് എന്‍.എം.അബൂബക്കര്‍ (മലയാള മനോരമ) ജനറല്‍ സെക്രട്ടറി ടി.എസ്.നിസാമുദ്ദീന്‍ (മാധ്യമം), വൈസ് പ്രസിഡന്റ് പി.എം.അബ്ദുല്‍റഹ്‌മാന്‍ (ഇപത്രം), ജോയിന്റ് സെക്രട്ടറി അനില്‍ സി.ഇടിക്കുള (ദീപിക), ഭരണസമിതി അംഗങ്ങളായ റസാഖ് ഒരുമനയൂര്‍ (ചന്ദ്രിക) സഫറുല്ല പാലപ്പെട്ടി (ദേശാഭിമാനി), സമീര്‍ കല്ലറ (24/7) എന്നിവര്‍ നേതൃത്വം നല്‍കി.

അബുദാബി കെഎംസിസി ‘ദി കേരള ഫെസ്റ്റിന്’ പ്രൗഡോജ്വല തുടക്കം

webdesk13 — Fri, 09 Feb 2024 17:51:32 +0000

അബുദാബി : അബുദാബി കെഎംസിസി ഒരുക്കിയ ‘ദി കേരള ഫെസ്റ്റിന്’ അബുദാബി ഇന്ത്യൻ ഇസ്ലാമിക് സെന്ററിൽ പ്രൗഢമായ തുടക്കം. ഇന്ത്യൻ ഇസ്ലാമിക് സെന്റർ പ്രസിഡന്റ് പി ബാവ ഹാജി പതാക ഉയർത്തിയതോടെയാണ് മൂന്നു നാൾ നീണ്ടു നിൽക്കുന്ന കേരള ഫെസ്റ്റിനു തുടക്കം കുറിച്ചത്. തുടർന്ന് പ്രദർശന സ്റ്റാളുകളുടെ ഉദ്ഘാടനം നടന്നു.

വിവിധ ജില്ലകളുടെ കലാസാംസ്‌കാരിക പരിപാടികളും തുടർന്ന് പ്രശസ്ത സൂഫി കലാകാരന്മാരായ ബിൻസിയും മജ്‌ബൂറും ചേർന്ന് അവതരിപ്പിച്ച സൂഫി സംഗീതവും അരങ്ങേറി.

കേരളത്തിലെ പതിനാല് ജില്ലകളുടെ കലയും സംസ്കാരവും കോർത്തിണക്കി വിനോദവും വിജ്ഞാനവും പകരുന്ന രീതിയിൽ സംഘടിപ്പിച്ചിരിക്കുന്ന ഫെസ്റ്റ് അബുദാബി യിലെ പ്രവാസിസമൂഹത്തിന് ആസ്വാദനത്തിന്റെ മൂന്നു രാവുകളാണ് സമ്മാനിക്കുന്നത്

ആദ്യദിനം ആയിരക്കണക്കിന് പേരാണ് കേരള ഫെസ്റ്റിന് ഒഴുകിയെത്തിയത്.

വ്യത്യസ്തമായ കലാ സാംസ്‌കാരിക പരിപാടികൾ,
കേരളത്തിലെ തനതായ നാടൻ രുചിക്കൂട്ടുകൾ ഒരുക്കി തായ്യാറാക്കുന്ന ഫുഡ് സ്ട്രീറ്റ്, പ്രോപ്പർട്ടി, ടൂറിസം, വിവിധ വാണിജ്യ സ്ഥാപങ്ങളടക്കം ഉൾപ്പെടെ 30ലേറെ വരുന്ന സ്റ്റാളുകൾ ഉൾപ്പെടെ ആകർഷയമായ അന്തരീക്ഷത്തിലാണ് കെഎംസിസി ഫെസ്റ്റ് നടക്കുന്നത്.

ഇന്ന് ശനിയാഴ്ച വൈകിട്ട് വൈകിട്ട് 4മണി മുതൽ 6 മണി വരെ കേരളത്തിലെ പ്രശസ്ത മാധ്യമ പ്രവർത്തകരായ പ്രമോദ് രാമൻ, ഷാനി പ്രഭാകർ , പി ജി സുരേഷ്‌കുമാർ , ഹാഷ്മി താജ് ഇബ്രാഹിം, മാതു സജി ഉൾപ്പെടെയുള്ളവർ പങ്കെടുക്കുന്ന മീഡിയ ടോക്ക് ഷോയും നടക്കും. തുടർന്ന് രാത്രി 8 മണിക്ക് ജനപ്രിയ കോമഡി കലാ പരിപാടിയായ ‘ടീം മറിമായം’ അവതരിക്കുന്ന കോമഡി എന്റർടൈൻമെന്റ് ഷോയും
വിവിധ കലാപരിപാടികളും അരങ്ങേറും.

ഞായറാഴ്ച ഉച്ചകഴിഞ്ഞു മൂന്നു മണിക്ക് മുപ്പതോളം പ്രവാസി സംഘടനകൾ ഒരുമിക്കുന്ന ‘ഡയസ്പോരാ സമ്മിറ്റ്’ നടക്കും. പ്രവാസികൾ ആഭിമുഖീകരിക്കുന്ന വിമാന ടിക്കറ്റ് നിരക്ക്, വിദ്യാഭ്യാസം ,വോട്ടവകാശം എന്നീ വിഷയങ്ങളിൽ ചർച്ച നടക്കും . പ്രമുഖ മാധ്യമ പ്രവർത്തകൻ പി ജി സുരേഷ് കുമാർ മോഡറേറ്റർ ആയിരിക്കും.

വിവിധ കലാരൂപങ്ങളെ കോർത്തിണക്കിയുള്ള പ്രത്യക കലാ പരിപാടികൾ ഫെസ്റ്റിന്റെ രാത്രി കാല പ്രത്യേകതയാണ്. മെഗാ സമ്മാനമായി നൽകുന്ന കാറടക്കം നൂറോളം സമ്മാനങ്ങൾ നൽകുന്ന സമ്മാന കൂപ്പൺ നറുക്കെടുപ്പ് സമാപന ചടങ്ങിൽ നടക്കും. മൂന്നു ദിവസങ്ങളിലായി ഉത്സവ പ്രതീതി സൃഷ്ട്ടിച്ചു ആഹ്ലാദ പൂർവം നടത്തുന്ന കേരള ഫെസ്റ്റിൽ വിവിധ ഭാഗങ്ങളിൽ നിന്നായി ആയിരക്കണക്കിന് പേർ എത്തും.

ആയിരങ്ങൾക്ക് ആവശ്യമായ വിപുലമായ സൗകര്യങ്ങളാണ് ഇസ്ലാമിക് സെന്ററും കെഎംസിസി പ്രവർത്തകരും ഒരുക്കിയിട്ടുള്ളത്.

പ്രവാസികള്‍ക്ക് ഉത്സവമായി അബുദാബി കെഎംസിസി ഫെസ്റ്റ് 9ന് ആരംഭിക്കും

webdesk13 — Sat, 03 Feb 2024 17:23:38 +0000

അബുദാബി: അബുദാബി സംസ്ഥാന കെഎംസിസി ഒരുക്കുന്ന ‘ദി കേരള ഫെസ്റ്റ്’ ഫെബ്രുവരി 9 10 11 തീയതികളില്‍ അബുദാബി ഇന്ത്യന്‍ ഇസ്ലാമിക് സെന്ററില്‍ നടക്കും.

കേരളത്തിലെ പതിനാല് ജില്ലകളുടെ കലയും സംസ്‌കാരവും കോര്‍ത്തിണക്കി വിനോദവും വിജ്ഞാനവും പകരുന്ന രീതിയില്‍ ഒരുക്കുന്ന ദി കേരള ഫെസ്റ്റ്
പ്രവാസികള്‍ക്ക് പുതിയ അനുഭവമായിരിക്കുമെന്ന പ്രസിഡണ്ട് ശുക്കൂറലി കല്ലുങ്ങല്‍, ജനറല്‍ സെക്രട്ടറി സിഎച്ച യൂസുഫ് എന്നിവര്‍ വാര്‍ത്താസമ്മേളനത്തില്‍ വ്യക്തമാക്കി.

9നു വൈകീട്ട് 5 മണിക്ക് വര്‍ണ്ണ ശബളമായ ഘോഷയാത്രയോടെ മൂന്നുദിവസം നീണ്ടു നില്‍ക്കുന്ന കേരള ഫെസ്റ്റിന് തുടക്കം കുറിക്കും. കേരളത്തിന്റെ തനതു കലകളും വാദ്യമേളങ്ങളും ഘോഷയാത്രക്ക് മിഴിവേകും. വിവിധ ജില്ലകളുടെ പൈതൃകം വിളിച്ചോതുന്ന സാംസ്‌കാരിക പരിപാടികള്‍ ഘോഷയാത്രയില്‍ അവതരിപ്പിക്കും.

രാത്രി എട്ടുമണിക്ക് പ്രമുഖ സൂഫീഗായകരായ ബിന്‌സി- മജ്ബൂര്‍ സംഘം അവതരിപ്പിക്കുന്ന സൂഫി സംഗീതനിശയും വിവിധ കലാപരിപാടികളും അരങ്ങേറും.

ഫെബ്രുവരി 10 ശനിയാഴ്ച്ച വൈകിട്ട് 4 മണി മുതല്‍ 6 വരെ കേരളത്തിലെ പ്രശസ്ത മാധ്യമ പ്രവര്‍ത്തകരായ പ്രമോദ് രാമന്‍, ഷാനി പ്രഭാകര്‍, പി ജി സുരേഷ്‌കുമാര്‍ , ഹാഷ്മി താജ് ഇബ്രാഹിം, മാതു സജി ഉള്‍പ്പെടെയുള്ളവര്‍ പങ്കെടുക്കുന്ന ടോക്ക് ഷോ നടക്കും. രാത്രി ജനപ്രിയ കോമഡി കലാ പരിപാടിയായ ടീം മറിമായം അവതരിക്കുന്ന കോമഡി എന്റര്‍ടൈന്‍മെന്റ് ഷോയും വിവിധ കലാപരിപാടികളും അരങ്ങേറും.

കേരളത്തിലെ പതിനാലു ജില്ലകളുടെ വിവിധ കലാ- സാംസ്‌കാരിക ആഘോഷങ്ങള്‍ കോര്‍ത്തിണക്കി ഒരുക്കുന്ന പരിപാടികള്‍ ആയിരങ്ങളെ ആകര്‍ഷിക്കുന്നവിധത്തിലാണ് ആസൂത്രണം ചെയ്തിട്ടുള്ളത്.

ഇരുപത്തിയഞ്ചില്‍പരം സ്റ്റാളുകള്‍ ഇസ്ലാമിക് സെന്ററിന്റെ അകത്തുംപുറത്തുമായി സജ്ജീകരിക്കുന്നുണ്ട്. പ്രവാസികള്‍ക്ക ഉതകുന്ന തരത്തിലുള്ള വിവിധ പ്രദര്‍ശനങ്ങളും വാണിജ്യ വിപണനവും ഇവിടെ നടക്കും. പ്രോപ്പര്‍ട്ടി ഷോ, ആരോഗ്യ മേഖലയിലെ പ്രമുഖര്‍ തുടങ്ങിയവയും കേരളത്തിന്റെ രുചിയൂറുന്ന നാടന്‍ തട്ടുകടകളും വ്യത്യസ്തമായ ഗ്രാ്മീണ വിഭവങ്ങളും ലഭ്യമായിരിക്കും.

മൂന്നു ദിവസങ്ങളിലായി കേരളത്തിന്റെ കലാ-സാംസ്‌കാരിക വേദികള്‍ ഒന്നിച്ചണിനിരക്കുന്ന കേരള ഫെസ്റ്റില്‍ പതിനായിരത്തില്‍പരംപേര്‍ എത്തുമെന്ന് ഭാരവാഹികള്‍ വ്യക്തമാക്കി. മെഗാ സമ്മാനമായി നല്‍കുന്ന കാറടക്കം നൂറോളം സമ്മാനങ്ങള്‍ നല്‍കുന്ന സമ്മാന കൂപ്പണ്‍ നറുക്കെടുപ്പ് സമാപന ചടങ്ങില്‍ നടക്കും.

ഫെസ്റ്റിനോടനുബന്ധിച്ച് നല്‍കുന്ന കൂപ്പണ്‍ നറുക്കെടുപ്പിലെ ഒന്നാം സമ്മാനമായ കാറിന്റെ പ്രദര്‍ശനം നടന്നു. പ്രസിഡന്റ് ഷുക്കൂറലി കല്ലുങ്ങലിന്റെ അദ്ധ്യക്ഷതയില്‍ ഇന്ത്യന്‍ ഇസ്ലാമിക് സെന്റര്‍ ജനറല്‍ സെക്രട്ടറി അഡ്വ കെ വി മുഹമ്മദ്കുഞ്ഞി ഉദ്ഘാടനം ചെയ്തു.

കമ്മ്യൂണിറ്റി പോലീസ് വിഭാഗം മേധാവികളായ ആയിഷ, അബ്ദുല്‍ ജമാല്‍, ഇന്ത്യന്‍ ഇസ്ലാമിക് സെന്ററര്‍ ട്രഷറര്‍ ഹിദായത്തുള്ള, എംപിഎം റഷീദ്,
ഐഎസ്‌സി പ്രസിഡന്റ് ജോണ്‍ പി വര്‍ഗീസ്, മലയാളി സമാജം ജനറല്‍ സെക്രട്ടറി ഇര്‍ഷാദ് പെരുമാനത്തുറ, ഇന്‍കാസ് ജനറല്‍ സെക്രട്ടറി സലിം ചിറക്കല്‍, ലുലു ഗ്രൂപ്പ് പിആര്‍ഒ മാനേജര്‍ അഷ്റഫ്, എല്‍ എല്‍ എച്ച് ഹോസ്പിറ്റല്‍ മാനേജര്‍ നിര്‍മല്‍, റേഡിയോ കേരളം പ്രതിനിധി റഹീം എന്നിവര്‍ സംസാരിച്ചു.
അബുദാബി കെഎംസിസി ആക്ടിങ് ജനറല്‍ സെക്രട്ടറി അന്‍വര്‍ ചുള്ളിമുണ്ട സ്വാഗതവും സെക്രട്ടറി സലാം ടി കെ നന്ദിയും പറഞ്ഞു.

അബുദാബിയില്‍ വാണിജ്യരംഗത്ത് വന്‍മുന്നേറ്റം

webdesk13 — Wed, 31 Jan 2024 17:24:55 +0000

അബുദാബി: വാണിജ്യരംഗത്ത് അബുദാബിയില്‍ വന്‍മുന്നേറ്റമുണ്ടായതായി ഡിപ്പാര്‍ട്ടുമെന്റ് ഓഫ് എക്കണോമി വ്യക്തമാക്കി.

2023ല്‍ 25,467 പുതിയ വാണിജ്യലൈസന്‍സുകള്‍ അനുവദിക്കുകയുണ്ടായി.
75,778 ലൈസന്‍സുകള്‍ പുതുക്കുകയും ചെയ്തതായി അധികൃതര്‍ വ്യക്തമാക്കി.
ഇതോടെ അബുദാബിയില്‍ മൊത്തം വാണിജ്യലൈസന്‍സുകളുടെ എണ്ണം 143,617 ആയി ഉയര്‍ന്നു.

2022നേക്കാള്‍ 10.9ശതമാനം വര്‍ധനവാണുണ്ടായിട്ടുള്ളത്. പ്രൊഫഷണല്‍, വിനോദസഞ്ചാരം, വ്യവസായം, കാര്‍ഷികം തുടങ്ങിയ ലൈസന്‍സുകള്‍ക്കാണ് കൂടുതല്‍ വര്‍ധനവുണ്ടായത്. ടൂറിസം ലൈസന്‍സുകളുടെ എണ്ണം 219 ആയി ഉയര്‍ന്നു.

അബുദാബിയിലും ഫ്രീ സോണ്‍ വരുന്നു; ചെറുകിട സംരംഭകര്‍ക്ക് വിപുലമായ അവസരം

webdesk13 — Fri, 08 Dec 2023 01:21:14 +0000

അബുദാബി: അബുദാബി അന്താരാഷ്ട്ര വിമാനത്താവളം ആസ്ഥാനമായി ഫ്രീ സോണ്‍ വരുന്നു. ചെറുകിട-ഇടത്തരം നിക്ഷേപകരെ ആകര്‍ഷിക്കുംവിധമാണ് അബുദാബി വിമാനത്താവള അധികൃതര്‍ പുതിയ വ്യവസായ മേഖലക്ക് തുടക്കം കുറിക്കുന്നത്.

വിമാനത്താവളത്തിന് തെക്ക് ഭാഗത്തായി രണ്ടുലക്ഷം ചതുരശ്ര അടി വിസ്തീര്‍ണ്ണത്തിലാണ് ഇതിനായി സൗകര്യമൊരുക്കുന്നത്. ആദ്യഘട്ടമെന്ന നിലയില്‍ നൂറിലധികം വ്യവസായ യൂണിറ്റുകളാണ് ഇവിടെ ഉണ്ടാകുക.

റിയല്‍എസ്റ്റേറ്റ്, ലോജിസ്റ്റിക് മേഖലകളില്‍ ഇതിലൂടെ പുതിയ മുന്നേറ്റമുണ്ടാകുമെന്ന അബുദാബി എയര്‍പോര്‍ട്ട് ചീഫ് കൊമേഴ്ഷ്യല്‍ ഓഫീസര്‍ മൗറിന്‍ ബന്നര്‍മെന്‍ വ്യക്തമാക്കി.

ലോകത്തിലെ ഏറ്റവും വലിയ വിമാനത്താവളങ്ങളിലൊന്നായി അബുദാബി പുതിയ അന്താരാഷ്ട്ര വിമാനത്താവളം ഏതാനും ആഴ്ചകള്‍ക്കുമുമ്പാണ് വ്യോമഗതാഗതത്തിന് തുറന്നുകൊടുത്തത്.

അബുദാബി സെന്റ് ജോര്‍ജ് ഓര്‍ത്തഡോക്‌സ് ദേവാലയ നിര്‍മാണത്തിന് എം.എ യൂസഫലിയുടെ 10 ലക്ഷം ദിര്‍ഹം

webdesk14 — Thu, 07 Dec 2023 09:49:46 +0000

അബുദാബി: പുതുക്കി പണിയുന്ന അബുദാബി സെന്റ് ജോര്‍ജ് ഓര്‍ത്തഡോക്‌സ് ദേവാലയത്തിന് ലുലു ഗ്രൂപ് ചെയര്‍മാന്‍ എം.എ യൂസഫലിയുടെ സഹായ ഹസ്തം. 10 ലക്ഷം ദിര്‍ഹമാണ് (2.25 കോടി രൂപ) യൂസഫലി നല്‍കിയത്.

മലങ്കര ഓര്‍ത്തഡോക്‌സ് സഭ ബ്രഹ്മാവര്‍ ഭദ്രസനാധിപന്‍ യാക്കൂബ് മാര്‍ ഏലിയാസ് മെത്രാപ്പോലീത്ത അബുദാബിയില്‍ നടന്ന ചടങ്ങില്‍ യൂസഫലിയില്‍ നിന്നും തുക ഏറ്റുവാങ്ങി. അബുദാബി സെന്റ് ജോര്‍ജ് ഓര്‍ത്തഡോക്‌സ് കത്തീഡ്രല്‍ വികാരി ഫാദര്‍ എല്‍ദോ എം.പോള്‍, സഹ വികാരി ഫാദര്‍ മാത്യു ജോണ്‍, ദേവാലയ നിര്‍മാണ കമ്മിറ്റി ജനറല്‍ കണ്‍വീനര്‍ ഇട്ടി പണിക്കര്‍, ഫിനാന്‍സ് കണ്‍വീനര്‍ ജോണ്‍സണ്‍ കാട്ടൂര്‍, ട്രസ്റ്റി റോയ് മോന്‍ ജോയ്, സെക്രട്ടറി ജോര്‍ജ് വര്‍ഗീസ് എന്നിവരും പങ്കെടുത്തു.
വിവിധ മത വിശ്വാസങ്ങളിപ്പെട്ടവര്‍ക്ക് സാഹോദര്യത്തോടെയും സഹകരണത്തോടെയും കഴിയാനുള്ള സാഹചര്യമാണ് യുഎഇ ഭരണാധികാരികള്‍ ഒരുക്കുന്നതെന്ന് യൂസഫലി പറഞ്ഞു.

ലോകത്ത് തന്നെ ആദ്യമായി സഹിഷ്ണുതാ മന്ത്രലായമുള്ളത് യുഎഇയിലാണ്. അബുദാബി നഗര ഹൃദയത്തിലുള്ള മുസ്‌ലിം പള്ളിക്ക് യേശു ക്രിസ്തുവിന്റെ മാതാവിന്റെ പേരാണ് (മര്‍യം ഉമ്മുല്‍ ഈസ മസ്ജിദ് അഥവാ, യേശുവിന്റെ മാതാവ് മര്‍യം പള്ളി) നല്‍കിയത്. യുഎഇ പിന്തുടരുന്ന സഹിഷ്ണുതാ ആശയങ്ങളുടെ ഉത്തമോദാഹരണവും ഇതര മതത്തോടുള്ള ഇസ്‌ലാമിന്റെ കാഴ്ചപ്പാടുമണിതെന്നും യൂസഫലി പറഞ്ഞു.

മലങ്കര ഓര്‍ത്തഡോക്‌സ് സഭക്ക് യൂസഫലി നല്‍കി വരുന്ന സേവനങ്ങള്‍ യാക്കൂബ് മാര്‍ ഏലിയാസ് മെത്രാപ്പോലീത്ത അനുസ്മരിച്ചു. യൂസഫലി നടത്തുന്ന മാനുഷിക പുണ്യ പ്രവൃത്തികള്‍ ശ്രേഷ്ഠവും അനുകരണീയവുമാണ്. അടുത്ത വര്‍ഷം മേയില്‍ നിര്‍മാണം പൂര്‍ത്തിയാക്കി ദേവാലയം തുറന്ന് കൊടുക്കാനാണ് ഉദ്ദേശിക്കുന്നതെന്നും മെത്രാപ്പോലീത്ത അറിയിച്ചു. ഓര്‍ത്തഡോക്‌സ് സഭയുടെ സ്‌നേഹോപഹാരം അദ്ദേഹം യൂസഫലിക്ക് നല്‍കി.

യുഎഇ നിലവില്‍ വരുന്നതിനു മുന്‍പ് 1970 ആഗസ്തില്‍ അന്നത്തെ ഭരണാധികാരിയും രാഷ്ട്രപിതാവുമായ ശൈഖ് സായിദ് ബിന്‍ സുല്‍ത്താന്‍ അല്‍ നഹ്‌യാന്‍ തറക്കല്ലിട്ട് നിര്‍മിച്ച ദേവാലയമാണ് ഇപ്പോള്‍ പുതുക്കിപ്പണിയുന്നത്. 12,000 ചതുരശ്രയടി വിസ്തീര്‍ണത്തില്‍ നിര്‍മാണം പുരോഗമിക്കുന്ന ദേവാലയത്തില്‍ ആയിരത്തിലേറെ പേര്‍ക്ക് പ്രാര്‍ത്ഥനാ സൗകര്യമുണ്ട്.