പോലീസ് ഉദ്യോഗസ്ഥന്റെ മകന്‍ തന്നെ മര്‍ദ്ദിക്കുകയായിരുന്നുവെന്ന് അതുല്‍ശ്രീവ പറഞ്ഞു. കൈയൊടിഞ്ഞ് മെഡിക്കല്‍ കോളേജ് ആസ്പത്രിയിലായെങ്കിലും കേസെടുത്തത് തനിക്കെതിരെയാണ്. പോലീസ് ഉദ്യോഗസ്ഥന്റെ മകനെതിരെ നല്‍കിയ പരാതിയില്‍ നടപടിയുണ്ടായില്ല. പോലീസ് സ്‌റ്റേഷനില്‍ വലിയ മാനസികപീഡനമാണ് നേരിട്ടതെന്നും അതുല്‍ പറഞ്ഞു. മാധ്യമങ്ങളില്‍ വന്ന വാര്‍ത്തകള്‍ അടിസ്ഥാനരഹിതമാണ്. അത് തന്നെ മാനസികമായി തളര്‍ത്തിയെന്നും അതുല്‍ കൂട്ടിച്ചേര്‍ത്തു.

പോലീസിനെതിരെ മനുഷ്യാവകാശകമ്മീഷനും പോലീസ് കംപ്ലയിന്റ് അതോറിറ്റിക്കും പരാതി നല്‍കാനാണ് അതുലിന്റെ തീരുമാനം. വധശ്രമമുള്‍പ്പെടെയുള്ള വകുപ്പുകള്‍ ചുമത്തിയാണ് പോലീസ് അതുലിനെതിരെ കേസെടുത്തിരിക്കുന്നത്.

ചെറിയൊരു വിദ്യാര്‍ത്ഥി സംഘര്‍ഷത്തിന്റെ പേരില്‍ അതുലിനെ പിടിച്ചുപറിക്കാനും ഗുണ്ടാസംഘത്തില്‍ പെട്ടവനുമാണെന്ന് ചിത്രീകരിക്കുകയായിരുന്നുവെന്ന് ബന്ധുക്കള്‍ പറയുന്നു. അതുലിനെതിരെ പരാതി നല്‍കിയത് ഒരു പോലീസ് ഉദ്യോഗസ്ഥന്റെ മകനാണ്. സംഘര്‍ഷത്തില്‍ യാതൊരു പരിക്കും പറ്റാത്ത വിദ്യാര്‍ഥിയാണ് പരാതി നല്‍കിയിരിക്കുന്നതെന്നും ഇവര്‍ പറയുന്നു.

സീരിയലുകളില്‍ നിന്നും സുഹൃദ് സംഘം നടത്തുന്ന ബാന്റ് മ്യൂസിക് ബാന്‍ഡിലൂടെയും അതുലിന് വരുമാനം ലഭിക്കുന്നുണ്ട്. അങ്ങനെയുള്ള അതുല്‍ 100 രൂപ ഗുണ്ടാപിരിവ് കൊടുക്കാത്തതിന് ആക്രമണം നടത്തിയെന്ന് പറയുന്നത് ശുദ്ധ അസംബന്ധമാണെന്നാണ് നാട്ടുകാര്‍ പറയുന്നത്. കഴിഞ്ഞ വെള്ളിയാഴ്ച്ച കോളേജില്‍ നടന്ന സംഘര്‍ഷത്തില്‍ അതുലിന് പരിക്കേറ്റിരുന്നു. ഇതില്‍ പരാതിയും നല്‍കിയിരുന്നു. പരാതിയുടെ മൊഴി എടുപ്പിക്കാനെന്ന് പറഞ്ഞ് വിളിപ്പിച്ചാണ് അതുലിനെ അറസ്റ്റ് ചെയ്തതെന്നാണ് ബന്ധുക്കളുെട ആരോപണം.

കോളേജ് കേന്ദ്രീകരിച്ച് ഗുണ്ട ഗ്യാങ്ങുകള്‍ പ്രവര്‍ത്തിക്കുന്നതായി പോലീസിന് അറിവ് ലഭിച്ചിട്ടുണ്ട്. കുരുക്ഷേത്ര എന്ന ഗുണ്ട ഗ്യാങ്ങിലെ അംഗമാണ് അതുല്‍ ശ്രീവയെന്ന് പോലീസ് പറയുന്നു. വിദ്യാര്‍ത്ഥികളെ ഭീഷണിപ്പെടുത്തി ഇവര്‍ പണം തട്ടുന്നതായും 100 രൂപയില്‍ കുറവ് നല്‍കുന്ന വിദ്യാര്‍ത്ഥികളെ കൂട്ടം ചേര്‍ന്ന് മര്‍ദ്ദിക്കുന്നതായും പോലീസ് കണ്ടെത്തി. പല വിദ്യാര്‍ത്ഥികളും പേടിച്ച് പരാതിപ്പെടുന്നില്ലെന്നും പോലീസ് പറയുന്നു. കഴിഞ്ഞ മാസം മറ്റൊരു വിദ്യാര്‍ത്ഥിയെ മര്‍ദ്ദിച്ച കേസിലും പ്രതിയാണ് അതുല്‍ ശ്രീവയെന്നും പോലീസ് അറിയിച്ചു. അതേസമയം. കേസിലെ മറ്റു പ്രതികള്‍ക്കുവേണ്ടി പോലീസ് അന്വേഷണം ആരംഭിച്ചു.

എം80 മൂസ എന്ന ജനപ്രിയ സീരിയലിലൂടെ പ്രേക്ഷകര്‍ക്കു മുന്നിലെത്തിയ താരമാണ് അതുല്‍ ശ്രീവ. ഇതിലൂടെ പ്രേക്ഷകരുടെ ശ്രദ്ധ പിടിച്ചുപറ്റിയ അതുല്‍ ഗുരുവായൂരപ്പന്‍ കോളേജിലെ മൂന്നാം വര്‍ഷ വിദ്യാര്‍ത്ഥിയാണ്.