അതേസമയം, ചോദ്യം ചെയ്യലിനു വേണ്ടി വീണ്ടും ഹാജരാകാന്‍ അന്വേഷണസംഘം നാദിര്‍ഷയോട് ആവശ്യപ്പെട്ടതായാണ് വിവരം.
എ്ന്നാല്‍ നാദിര്‍ഷ മുന്‍കൂര്‍ ജാമ്യം തേടി ഹൈക്കോടതിയെ സമീപിച്ചു. അറസ്റ്റ് ചെയ്യുമെന്ന് പോലീസ് ഭീഷണിപ്പെടുത്തുന്ന സാഹചര്യത്തിലാണ് ഹൈക്കോടതിയെ സമീപിക്കുന്നതെന്ന് ജാമ്യാപേക്ഷയില്‍ നാദിര്‍ഷ പറയുന്നു. തെറ്റായ കാര്യങ്ങള്‍ പറയാനാണ് പോലീസ് നിര്‍ബന്ധിക്കുന്നത്. കേസുമായി ബന്ധപ്പെട്ട് നിരവധി തവണ തന്നെ ചോദ്യം ചെയ്തിട്ടുണ്ടെന്നും അന്വേഷണവുമായി സഹകരിച്ചിട്ടുണ്ടെന്നും നാദിര്‍ഷ അപേക്ഷയില്‍ വ്യക്തമാക്കുന്നുണ്ട്.

അതേസമയം താരസംവിധായകന്‍ ശാരീരിക അസ്വാസ്ഥ്യത്തെ തുടര്‍ന്ന് കൊച്ചിയിലെ സ്വകാര്യ ആസ്പത്രിയില്‍ ചികിത്സയിലാണിപ്പോള്‍. എന്നാല്‍ ഇത് അറസ്റ്റ് സാധ്യത മുന്നില്‍ കണ്ട് പുതിയ തന്ത്രമാണെന്നാണ് പരക്കെയുള്ള ആക്ഷേപം.

നടി ആക്രമിക്കപ്പെട്ട കേസിലെ വെളിപ്പെടുത്തലിന്റെ പശ്ചാത്തലത്തില്‍ ദിലീപിനെയും നാദിര്‍ഷയെയും വീണ്ടും ചോദ്യം ചെയ്യാനിരിക്കെയാണ് ദിലീപ് പ്രതികരണവുമായെത്തിയത്. കേസില്‍ അറസ്റ്റ് ഉണ്ടാവുമെന്നും ഇത് മുന്നില്‍ കണ്ട് ദിലീപും നാദിര്‍ഷയും മുന്‍കൂര്‍ ജാമ്യത്തിനുള്ള സാധ്യത തേടിയതായും വാര്‍ത്തകള്‍ വന്നിരുന്നു. ഇരുവരും ഹൈക്കോടതിയെ സമീപിക്കാനൊരുങ്ങുന്നുവെന്നായിരുന്നു വിവരം. ഈ പശ്ചാത്തലത്തിലാണ് ദിലീപ് മനോരമാ ന്യൂസ് ചാനലില്‍ ഇതേക്കുറിച്ച് പ്രതികരിച്ചത്.

13 മണിക്കൂര്‍ ആലുവാ പോലീസ് ക്ലബ്ബില്‍ വിളിച്ചുവരുത്തി ദിലീപിനേയും നാദിര്‍ഷയേയും പോലീസ് ചോദ്യം ചെയ്തിരുന്നു. ഇതിന് പിന്നാലെയാണ് ഇന്ന് വീണ്ടും ചോദ്യം ചെയ്യുന്നത്. ദിലീപിന്റെ 143 പേജുള്ള മൊഴിയും നാദിര്‍ഷയുടെ 140 പേജുള്ള മൊഴിയും പരിശോധിച്ചതിന് ശേഷമാണ് പോലീസ് ചോദ്യാവലി തയ്യാറാക്കുന്നത്.

അതേസമയം, കേസില്‍ ദിലീപും നാദിര്‍ഷായും ഹൈക്കോടതിയെ സമീപിക്കാനൊരുങ്ങുകയാണ്. കേസില്‍ അറസ്റ്റ് ഒഴിവാക്കാനായി മുന്‍കൂര്‍ ജാമ്യാപേക്ഷ സമര്‍പ്പിക്കാനുള്ള തയ്യാറെടുപ്പിലാണ് ഇരുവരും. ഇതിനുവേണ്ടി രണ്ടുപേരും മുതിര്‍ന്ന അഭിഭാഷകരെ സമീപിച്ചിട്ടുള്ളതായാണ് റിപ്പോര്‍ട്ട്. ഇരുവരുടേയും പങ്കാത്തിത്തത്തിന് കൂടുതല്‍ തെളിവുകള്‍ പോലീസിന് ലഭിച്ചിട്ടുണ്ട്. നടിയുടെ പീഢനത്തിന്റെ ദൃശ്യങ്ങള്‍ പോലീസിന് ലഭിച്ചതും ദിലീപും പള്‍സര്‍ സുനിയും തമ്മിലുള്ള ബന്ധത്തെക്കുറിച്ച് കൂടുതല്‍ തെളിവുകള്‍ പോലീസിന് ലഭിച്ചതും അറസ്റ്റിലേക്ക് നീങ്ങുന്നതിന് സഹായകരമായി.

കാവ്യാമാധവന്റെ അമ്മക്കൊപ്പം ദിലീപുമായി അടുത്ത ബന്ധമുള്ള യുവനടിയെയും ഉടന്‍ ചോദ്യംചെയ്‌തേക്കും. ഇവരുള്‍പ്പെടെ 5 പേരോട് കൊച്ചി വിട്ട് പോകരുതെന്ന് പോലീസ് ആവശ്യപ്പെട്ടതായാണ് സൂചന.

കഴിഞ്ഞ ദിവസമാണ് നടി ആക്രമിക്കപ്പെട്ട കേസിലെ ഗൂഢാലോചനയുടെ ഭാഗമായി ദിലീപിനേയും നാദിര്‍ഷയേയും ആലുവ പോലീസ് ക്ലബ്ബില്‍ ചോദ്യം ചെയ്യുന്നത്. ഉച്ചക്ക് 12.30-ഓടെ ആരംഭിച്ച ചോദ്യം ചെയ്യല്‍ പുലര്‍ച്ചെവരെ നീണ്ടുനിന്നു. എന്നാല്‍ ചോദ്യം ചെയ്യല്‍ അവസാനിപ്പിച്ചത് തിരുവനന്തപുരത്തുനിന്നെത്തിയ ഫോണ്‍കോളിനെത്തുടര്‍ന്നാണെന്ന് മലയാളമനോരമ റിപ്പോര്‍ട്ട് ചെയ്യുന്നു. ദിലീപിനെ പിന്നെയും അഞ്ചുമണിക്കൂര്‍ കൂടി ചോദ്യം ചെയ്യാനായിരുന്നു പോലീസിന്റെ തീരുമാനം. ഇത് നിര്‍ത്തിവെച്ച് ഇരുവരേയും പറഞ്ഞുവിടുകയായിരുന്നു.

ആറുമണിക്കൂര്‍ മാത്രമാണ് ദിലീപിനെ ചോദ്യം ചെയ്തതെന്ന് കഴിഞ്ഞ ദിവസം പോലീസ് അറിയിച്ചിരുന്നു. മൊഴി രേഖപ്പെടുത്തി വായിച്ചുകേള്‍പ്പിക്കാനാണ് സമയമെടുത്തതെന്നായിരുന്നു പോലീസ് വിശദീകരണം. അതേസമയം, കേസില്‍ ദിലീപ് ഇതുവരെ പ്രതിയല്ല. വ്യാഴാഴ്ച്ച നടന്ന താരസംഘടന അമ്മയുടെ യോഗത്തില്‍ ദിലീപിന് പൂര്‍ണ്ണപിന്തുണ പ്രഖ്യാപിച്ചിരുന്നു.

നടിക്കെതിരെയുള്ള നടന്‍മാരുടെ ആക്ഷേപങ്ങളെക്കുറിച്ചുള്ള ചോദ്യങ്ങളിലാണ് മുകേഷ് ക്ഷുഭിതനായത്. കസേരയില്‍ നിന്നെഴുന്നേറ്റുകൊണ്ടായിരുന്നു പ്രതികരണം. അനാവശ്യ ചോദ്യങ്ങളാണെങ്കില്‍ പ്രതികരിക്കേണ്ട ആവശ്യമില്ലെന്ന് മുകേഷ് പറഞ്ഞു. വാര്‍ത്താസമ്മേളനത്തില്‍ മാധ്യമങ്ങള്‍ക്കുനേരെ രൂക്ഷ വിമര്‍ശനമുണ്ടായി. ഇരു താരങ്ങളും അമ്മയുടെ മക്കളാണ്. ആരേയും ഒറ്റപ്പെടുത്താന്‍ അനുവദിക്കില്ല. നടിയുടെ വിഷയം നിലവില്‍ അന്വേഷണം നടന്നുകൊണ്ടിരിക്കുന്ന സാഹചര്യത്തില്‍ ചര്‍ച്ച ചെയ്തില്ല. വിഷയം ആരും ഉന്നയിച്ചില്ലെന്നും പ്രസിഡന്റ് ഇന്നസെന്റ് പറഞ്ഞു.

ദിലീപിനെ വേട്ടയാടാന്‍ അനുവദിക്കില്ലെന്ന് ഗണേഷ്‌കുമാര്‍ പറഞ്ഞു. അമ്മ ഒറ്റക്കെട്ടാണ്. എല്ലാവരും അമ്മയുടെ മക്കളാണ്. വനിതാ അംഗങ്ങളുടെ സംഘടന സഹോദരിമാരുടെ സംഘടനയാണ്. അതിനെ അംഗീകരിക്കുന്നു. എന്നാല്‍ താരസംഘടനയില്‍ പിളര്‍പ്പുണ്ടെന്ന് വരുത്താന്‍ മാധ്യമങ്ങള്‍ ശ്രമിക്കുകയാണ്. അങ്ങനെയില്ല. അമ്മ ഒറ്റക്കെട്ടാണെന്നും ദിലീപിനെ ഒറ്റപ്പെടുത്തി വേട്ടയാടാന്‍ അനുവദിക്കില്ലെന്നും ഗണേഷ്‌കുമാര്‍ ആവര്‍ത്തിച്ചു. ഈ സമയം മാധ്യമങ്ങള്‍ക്കുനേരെ താരങ്ങള്‍ കൂക്കിവിളിക്കുകയായിരുന്നു. ഒരുവേളയില്‍ മണിയന്‍പിള്ള രാജു വാര്‍ത്താസമ്മേളനം അവസാനിച്ചുവെന്ന് പറഞ്ഞെങ്കിലും വീണ്ടും തുടര്‍ന്നു. വാര്‍ത്താസമ്മേളനത്തിന്റെ സ്വഭാവത്തില്‍ നിന്നും മാറിയായിരുന്നു വാര്‍ത്താസമ്മേളനം. ഒരു ചോദ്യത്തിന് പലരും എണീറ്റ് നിന്നുകൊണ്ട് പ്രതികരിച്ചു. എന്നാല്‍ വേദിയിലിരുന്ന മമ്മുട്ടിയും മോഹന്‍ലാലും പ്രതികരിച്ചതേയില്ല. മാധ്യമങ്ങളുടെ ഒട്ടുമിക്ക ചോദ്യങ്ങള്‍ക്കും മറുപടി പറഞ്ഞതും ഗണേഷ്‌കുമാറായിരുന്നു.

നേരത്തെ വാര്‍ത്താസമ്മേളനത്തിനു മുമ്പ് നടി ആക്രമിക്കപ്പെട്ട സംഭവം യോഗത്തില്‍ ഉന്നയിച്ചുവെന്ന് നടി റിമകല്ലിങ്കല്‍ പറഞ്ഞിരുന്നു. സിനിമാ രംഗത്തെ സ്ത്രീകള്‍ക്ക് എല്ലാ തരത്തിലുമുള്ള സുരക്ഷയൊരുക്കുമെന്ന് അമ്മ ഉറപ്പുനല്‍കി. നടിയുടെ വിഷയം യോഗത്തില്‍ ഉന്നയിച്ചു. പക്ഷേ ചര്‍ച്ചയായില്ലെന്നും റിമ പറഞ്ഞിരുന്നു.

ഇരുവരും മൊഴിയെടുക്കലിനോട് സഹകരിക്കുന്നുണ്ടെന്ന് പോലീസ് പറഞ്ഞു. ദിലീപ് തനിക്കറിയാവുന്ന നിരവധി കാര്യങ്ങള്‍ പറഞ്ഞു. പള്‍സര്‍ സുനി പറഞ്ഞ കാര്യങ്ങളും ദിലീപിനോട് ചോദിച്ചറിയുന്നുണ്ടെന്നും പോലീസ് പറഞ്ഞു.

ആലുവ പോലീസ് ക്ലബ്ബില്‍ ഉച്ചക്ക് പന്ത്രണ്ടരയോടെയാണ് ദിലീപും നാദിര്‍ഷായും മൊഴികൊടുക്കാന്‍ എത്തിയത്. തുടര്‍ച്ചയായി നാലാംമണിക്കൂറിലേക്ക് മൊഴിയെടുക്കല്‍ കടന്നിരിക്കുകയാണ്. രണ്ടുപേരേയും വെവ്വേറെ ഇരുത്തിയാണ് മൊഴിയെടുക്കുന്നതെന്നാണ് വിവരം.