നല്ല റോളുകള്‍ ലഭിക്കാത്തതുകൊണ്ടാണ് മലയാളത്തില്‍ അഭിനയിക്കാത്തതെന്ന് ഷംന കാസിം പറഞ്ഞു. മലയാളത്തില്‍ തനിക്കു കിട്ടിയ നല്ല സിനിമയാണ് ചട്ടക്കാരി. അതിലെ പാട്ടുകളെ കുറിച്ച് എവിടെ ചെന്നാലും ആളുകള്‍ നല്ല അഭിപ്രായം പറയാറുണ്ട്. എന്നിട്ടും മലയാളത്തില്‍ കാസ്റ്റിംഗ് കഴിഞ്ഞ് സിനിമ തുടങ്ങാറാകുമ്പോള്‍ ‘സോറി, ഷംന ഇതിലില്ല’ എന്നു പറയുന്ന അനുഭവങ്ങള്‍ ഉണ്ടായിട്ടുണ്ടെന്നും നടി പറഞ്ഞു. എന്നാല്‍ ആരാണ് മലയാളത്തില്‍ തന്റെ ശത്രു എന്നെനിക്കറിയില്ല, പക്ഷെ ആരോ ഉണ്ടെന്നും താരം കൂട്ടിച്ചേര്‍ത്തു. ഇനി തന്റെ പെരുമാറ്റമാണോ, മുഖമാണോ മലയാളത്തിന് ചേരാത്തതെന്നറിയില്ല. ഓടാത്ത പടങ്ങളില്‍ പേരിനു വേണ്ടി മാത്രം അഭിനയിക്കാന്‍ താത്പര്യമില്ല. അന്യഭാഷകളില്‍ നല്ല റോളുകള്‍ കിട്ടുന്നുണ്ട്. അതൊകൊണ്ട് അവിടെ സജീവമാകുന്നു എന്നു മാത്രം.- ഷംന കാസിം പറഞ്ഞു.

ദിലീപേട്ടന്‍ തന്നെയായിരുന്നു ഇക്കാര്യം വിളിച്ചുപറഞ്ഞതെന്ന് ഒരു ചാനലിന് നല്‍കിയ അഭിമുഖത്തില്‍ താരം പറഞ്ഞു. ഒരുപാട് ആഗ്രഹിച്ച സിനിമയായിരുന്നു. ഒഴിവാക്കിയപ്പോള്‍ വിഷമം തോന്നി. അന്ന് തമിഴില്‍ സ്‌നേഹക്കൊപ്പം വിളിച്ച സിനിമ ചെയ്യാതിരുന്നത് മോസ് ആന്റ് ക്യാറ്റിനുവേണ്ടിയായിരുന്നു. ഫാസില്‍ സാറിന്റെ നിര്‍ദ്ദേശാനുസരണം ഒട്ടേറെ നൃത്തപരിപാടികളും വേണ്ടെന്ന് വെച്ചു. ആ സമയത്താണ് ദിലീപേട്ടന്റെ വിളി എത്തുന്നത്. സിനിമയുടെ ചിത്രീകരണം തുടങ്ങാന്‍ രണ്ടു ദിവസം മാത്രമുള്ളപ്പോഴായിരുന്നു അത്. തന്നെ ആ സിനിമയില്‍ നിന്നും ഒഴിവാക്കിയ കാര്യം ദിലീപേട്ടന്‍ തന്നെയാണ് പറഞ്ഞത്. ഒന്നും വിചാരിക്കരുത്. ശപിക്കരുതെന്നും അന്ന് ദിലീപേട്ടന്‍ പറഞ്ഞിരുന്നുവെന്നും ഷംനകാസിം വെളിപ്പെടുത്തുന്നു. എന്നാല്‍ ഇതിന് പിന്നില്‍ ദിലീപാണോയെന്ന് അറിയില്ലെന്നും താരം വ്യക്തമാക്കി. വളരെ ആത്മവിശ്വാസം തന്നാണ് ദിലീപേട്ടന്‍ സംസാരിച്ചത്. പിന്തുണ നല്‍കുകയും ചെയ്തിരുന്നു. സിനിമയില്‍ നിന്നൊഴിവാക്കിയത് തന്നെ തളര്‍ത്തി. സിനിമ വേണ്ടെന്ന് വെക്കാനും തീരുമാനിച്ചിരുന്നു. കേരളത്തിലേക്ക് പിന്നീട് വരാന്‍ തോന്നിയില്ലെന്നും ഷംന കാസിം പറഞ്ഞു.

നടി ആക്രമിക്കപ്പെട്ട കേസില്‍ ജയിലില്‍ കഴിയുന്ന ദിലീപിനെതിരെ ഗുരുതര ആരോപണങ്ങളുമായി നിരവധിപേര്‍ രംഗത്തെത്തിയിട്ടുണ്ട്. സിനിമയില്‍ പലര്‍ക്കും അവസരം നിഷേധിച്ചതിന് പിന്നില്‍ ദിലീപാണെന്ന് വെളിപ്പെടുത്തലുണ്ടായിരുന്നു. എന്നാല്‍ തന്നെ ഒഴിവാക്കിയതിന് പിന്നില്‍ ദിലീപാണോയെന്ന് അറിയില്ലെന്ന് ഷംന വ്യക്തമാക്കി.