അതേസമയം ദിലീപിന്റെ ജാമ്യാപേക്ഷയില്‍ പ്രതിഭാഗം അഭിഭാഷകന്‍ കെ രാംകുമാര്‍ ഉയര്‍ത്തുന്ന ചോദ്യങ്ങള്‍ ഇതിനകം ചര്‍ച്ചയായിട്ടുണ്ട്. പള്‍സര്‍ സുനിയുടെ മൊഴിമാത്രം കണക്കിലെടുത്ത ദിലീപിന്റെ അറസ്റ്റ് മതിയായ തെളിവുകളില്ലാതെയാണെന്ന് ചൂണ്ടിക്കാട്ടിയാണ് ദിലീപിനായി കെ രാംകുമാര്‍ ജാമ്യാപേക്ഷ നല്‍കിയത്. കേസിലെ അന്തിമ റിപ്പോര്‍ട്ട് ഏപ്രിലില്‍ സമര്‍പ്പിക്കുമ്പോഴും ദിലീപ് പ്രതിയായിരുന്നില്ല. സിനിമാ ജീവിതം തകര്‍ക്കാന്‍ ചിലര്‍ ഗൂഢാലോചന നടത്തുന്നുവെന്ന് ദിലീപ് പരാതി നല്‍കിയതിനു പിന്നാലെയാണ് നടനെതിരെ പൊലീസ് തിരിഞ്ഞത്. കേസില്‍ ഗൂഢാലോചനയില്ലെന്ന് മുഖ്യമന്ത്രി പിണറായി വിജയന്‍ തന്നെ വ്യക്തമാക്കിയിട്ടുണ്ടെന്നും ജാമ്യഹര്‍ജിയില്‍ രാംകുമാര്‍ ചൂണ്ടിക്കാട്ടുന്നു.

ദിലീപിന്റെ അഭിഭാഷകന്‍ കെ രാംകുമാറിന്റെ വാദം ഇങ്ങനെ…

• ബ്ലാക്‌മെയില്‍ ചെയ്യുന്നതായ ദിലീപിന്റെ പരാതി പൊലീസിന്റെ നിര്‍ദേശപ്രകാരം.
• പ്രതി സുനില്‍കുമാറുമായി കൂടിക്കാഴ്ച നടത്തിയതു കൊണ്ടുമാത്രം അത് കേസിലെ ഗൂഢാലോചനയാകില്ല.
• കുറ്റം ചെയ്യാനുള്ള മാനസിക ഐക്യമുണ്ടെങ്കിലേ ഗൂഢാലോചനയാകൂ.
• പൊലീസ് പറയുന്ന ഗൂഢാലോചനകള്‍ക്ക് തെളിവില്ല.
• സുനിയും ദിലീപും തമ്മില്‍ എന്താണ് സംസാരിച്ചതെന്നോ എന്തിനാണ് കണ്ടതെന്നോ തെളിയിക്കാന്‍ സാക്ഷികളില്ല.
• കുറ്റവാളി കൂടിയായ പള്‍സര്‍ സുനിയുടെ കുറ്റസമ്മതം അംഗീകരിക്കാവുന്ന തെളിവല്ല.
• ദിലീപിനെ അറസ്റ്റ് ചെയ്യാനുള്ള പൊലീസിന്റെ വാദങ്ങള്‍ക്കു തെളിവില്ല.
• വന്‍ പണമുടക്കില്‍ നിര്‍മാണത്തിലിരിക്കുന്ന നിരവധി സനിമകള്‍ ദിലീപിന് പൂര്‍ത്തിയാക്കാനുണ്ട്.
• ജാമ്യത്തില്‍ ഇറങ്ങിയാലും എപ്പോള്‍ വേണമെങ്കിലും അന്വേഷണവുമായി സഹകരിക്കും.
• നടിയെ ആക്രമിക്കാന്‍ ദിലീപ് ഗൂഢാലോചന നടത്തിയെന്ന് വ്യക്തമാക്കുന്ന തെളിവുകളൊന്നും റിമാന്‍ഡ് റിപ്പോര്‍ട്ടിലില്ല.
• റിമാന്‍ഡ് റിപ്പോര്‍ട്ടിലെ ആരോപണങ്ങള്‍ ദിലീപിന്റെ ജീവനക്കാര്‍ക്കെതിരെ മാത്രമാണ്.
• ദിലീപിനെ മണിക്കൂറുകളോളം ചോദ്യം ചെയ്തു.
• ഇനിയും ജയിലില്‍ തുടരേണ്ട സാഹചര്യമില്ല.

അതിനിടെ പ്രതിഭാഗം മുദ്രവെച്ച രണ്ട് മൊബൈല്‍ ഫോണുകള്‍ കോടതിക്ക് കൈമാറി. കോടതിയുടെ മേല്‍നോട്ടല്‍ ശാസ്ത്രീയ പരിശോധന നടത്താന്‍ വേണ്ടിയാണ് ദിലീപ് ഉപയോഗിച്ചിരുന്ന ഫോണുകള്‍ കോടതിയെ സമര്‍പ്പിച്ചതെന്ന് പ്രതിഭാഗം വക്കീല്‍ അഡ്വ. രാംകുമാര്‍ പറഞ്ഞു. എന്നാല്‍ മാധ്യമപ്രവര്‍ത്തകരുടെ കൂടുതല്‍ ചോദ്യങ്ങളോട് കേസ് കഴിഞ്ഞ് പ്രതികരിക്കാം എന്നായിരുന്നു രാംകുമാറിന്റെ മറുപടി.
അതേസമയം നടി ആക്രമിക്കപ്പെട്ട സംഭവത്തില്‍ പ്രതിയായ നടന്‍ ദിലീപിന്റെ ജാമ്യാപേക്ഷ കോടതി വിധി പറയാനായി മാറ്റിവെച്ചു. അങ്കമാലി ജുഡീഷ്യല്‍ മജിസ്ട്രേറ്റ് കോടതിയാണ് ദിലീപിന്റെ ജാമ്യാപേക്ഷയില്‍ വാദം പൂര്‍ത്തിയായ ശേഷം വിധി പറയാനായി മാറ്റിയത്.

ഒരു സിറ്റിങ്ങിന് ഒരു ലക്ഷം എന്നതാണ് രാംകുമാറിന്റെ കണക്കെന്നാണ് കൊച്ചിയിലെ അഭിഭാഷക വൃത്തങ്ങളില്‍ നിന്നും ലഭിക്കുന്ന സൂചന. അതേ സമയം ദിലീപ് കേസില്‍ ഇത് ഇരട്ടിയാണെന്നും അണിയറയില്‍ സംസാരമുണ്ട്. കേസില്‍ ദിലീപിനെതിരെ പോലീസ് ഇത്രയധികം തെളിവുകള്‍ കണ്ടെത്തിയതിനാലും സെലിബ്രിറ്റി കേസ് ആയതിനാലുമാണ് പ്രതിഫലം ഇരട്ടിയാക്കിയതെന്നുമാണ് വിവരം.

ആലുവ പോലീസ് ക്ലബ്ബില്‍ 13 മണിക്കൂര്‍ ചോദ്യം ചെയ്ത സമയത്തുതന്നെ ഏകദേശം അറസ്റ്റുചെയ്യുമെന്ന് ദിലീപിന് അറിയാമായിരുന്നു. പുറത്തിറങ്ങി കൊച്ചിയിലെത്തി രാംകുമാറുമായി അതീവരഹസ്യമായി കൂടിക്കാഴ്ച്ചയും താരം നടത്തിയിരുന്നു. പിന്നീട് അറസ്റ്റിലായതോടെ രാംകുമാര്‍ എത്തുന്നതാണ് കണ്ടത്. എന്നാല്‍ തെളിവെടുപ്പിന് എത്തിക്കുന്നയിടത്ത് ദിലീപിനേയും കോടതി പരിസരത്ത് അഡ്വ രാംകുമാറിനേയും കൂക്കിവിളിച്ചാണ് ജനം വരവേല്‍ക്കുന്നത്.