aeroplane clash – Chandrika Daily

കെനിയയില്‍ ദുരന്തം: വിനോദസഞ്ചാരികളെ കൊണ്ടുപോയ ചെറുവിമാനം തകര്‍ന്നു വീണു; 12 പേര്‍ മരിച്ചു

webdesk17 — Tue, 28 Oct 2025 10:52:48 +0000

നെയ്‌റോബി: കെനിയയിലെ തീരദേശ മേഖലയായ ക്വാലെയില്‍ ചൊവ്വാഴ്ച പുലര്‍ച്ചെ ഭീകര വിമാനാപകടം. മസായി മാര നാഷണല്‍ റിസര്‍വിലേക്കുള്ള യാത്രാമധ്യേ ചെറുവിമാനം തകര്‍ന്നു വീണ് തീപിടിച്ചതോടെ 12 പേര്‍ മരിച്ചതായി പ്രാഥമിക വിവരം.

ഡയാനി എയര്‍സ്റ്റ്രിപ്പില്‍നിന്ന് ഏകദേശം 40 കിലോമീറ്റര്‍ അകലെയുള്ള കുന്നിന്‍ പ്രദേശത്തും വനത്തിനടുത്തുമാണ് വിമാനം തകര്‍ന്നുവീണത്. വിമാനത്തില്‍ യാത്ര ചെയ്തവരൊക്കെ വിദേശ വിനോദസഞ്ചാരികളാണെന്ന് ക്വാലെ കൗണ്ടി കമീഷണര്‍ സ്റ്റീഫന്‍ ഒറിന്‍ഡെ വ്യക്തമാക്കി. മരിച്ചവരുടെ പൗരത്വം സ്ഥിരീകരിക്കുന്ന നടപടികള്‍ പുരോഗമിച്ചുകൊണ്ടിരിക്കുകയാണ്.

സെസ്‌ന കാരവാന്‍ വിഭാഗത്തില്‍പ്പെട്ട ഈ വിമാനത്തില്‍ 12 പേര്‍ ഉണ്ടായിരുന്നുവെന്നാണ് കെനിയ സിവില്‍ ഏവിയേഷന്‍ അതോറിറ്റി നല്‍കിയ വിവരം. അപകടത്തിന്റെ കാരണം ഇതുവരെ വ്യക്തമായിട്ടില്ല. പറന്നുയര്‍ന്നതിനു പിന്നാലെ മിനിറ്റുകള്‍ക്കുള്ളില്‍ തന്നെ വിമാനം നിയന്ത്രണം നഷ്ടപ്പെടുത്തി താഴേക്ക് പതിച്ചുവെന്നാണ് പ്രാഥമിക വിലയിരുത്തല്‍.

അപകടസ്ഥലത്ത് എത്തിയ രക്ഷാപ്രവര്‍ത്തകര്‍ കത്തിക്കരിഞ്ഞ വിമാനാവശിഷ്ടങ്ങളും ശരീരാവശിഷ്ടങ്ങളും കണ്ടെത്തി. ഉച്ചത്തിലുള്ള സ്ഫോടനശബ്ദം കേട്ടതിനെ തുടര്‍ന്ന് നാട്ടുകാര്‍ സ്ഥലത്തെത്തിയതായും ദൃക്‌സാക്ഷികള്‍ അറിയിച്ചു.

വിമാനാപകടത്തിന്റെ കാരണം അന്വേഷിക്കുന്നതിനായി സിവില്‍ ഏവിയേഷന്‍ അതോറിറ്റിയും പൊലീസും സംയുക്തമായി അന്വേഷണം ആരംഭിച്ചിരിക്കുകയാണ്.

വ്യോമസേനയുടെ മിഗ് 21 വിമാനം തകര്‍ന്നു; പൈലറ്റുമാര്‍ അത്ഭുതകരമായി രക്ഷപ്പെട്ടു

Test User — Wed, 25 Sep 2019 07:08:40 +0000

മധ്യപ്രദേശിലെ ഗ്വാളിയോറില്‍ വ്യോമസേനയുടെ മിഗ് 21 വിമാനം തകര്‍ന്നുവീണു. രാവിലെയാണ് സംഭവം. ഗ്വാളിയോറിലെ വ്യോമസേന താവളത്തിന് സമീപത്ത് തന്നെയായിരുന്നു വിമാനം തകര്‍ന്ന് വീണത്.

ഗ്രൂപ്പ് ക്യാപ്റ്റനും സ്‌ക്വാഡ്രന്‍ ലീഡറും ഉള്‍പ്പെടെ രണ്ടുപേരായിരുന്നു വിമാനത്തിലുണ്ടായിരുന്നത്. ഇവര്‍ രണ്ട് പേരും കൃത്യസമയത്ത് സീറ്റ് ഉപേക്ഷിച്ചതുകൊണ്ട് രക്ഷപ്പെട്ടു, അപകടത്തില്‍ ആളപായമില്ല. കഴിഞ്ഞ മാര്‍ച്ചില്‍ ചിറകില്‍ പക്ഷിയിടിച്ചതിനെ തുടര്‍ന്ന് ബിക്കാനീറില്‍ മിഗ് 21 വിമാനം തകര്‍ന്ന് വീണിരുന്നു.

Madhya Pradesh: MiG 21 Trainer aircraft of the Indian Air Force crashed in Gwalior, today. Both the pilots, including a Group Captain and a squadron leader, managed to eject safely. pic.twitter.com/Gdmik5RhTN
— ANI (@ANI) September 25, 2019

സേനയുടെ കാണാതായ വിമാനത്തിലെ 13 പേരും മരിച്ചതായി വ്യോമസേന

Test User — Thu, 13 Jun 2019 10:11:30 +0000

മൂന്ന് മലയാളി സൈനികരടക്കം 13 പേരുമായി കാണാതായ വ്യോമസേനയുടെ എ.എന്‍.32 ചരക്കുവിമാനത്തിലുണ്ടായിരുന്ന എല്ലാവരും മരിച്ചതായി സ്ഥിരീകരിച്ചു.
അരുണാചലിലെ ലിപോ മേഖലയില്‍ ചൊവ്വാഴ്ച വിമാന അവശിഷ്ടങ്ങള്‍ കണ്ടെത്തിയതായി വ്യാമസേന അറിയിച്ചിരുന്നു. എട്ടു ദിവസത്തോളം നീണ്ട തിരിച്ചിലിനൊടുവിലാണ് വിമാനം കണ്ടെത്തിയത്. കാണാതായ വിമാനത്തിലുള്ളവരാരും രക്ഷപ്പെട്ടിട്ടില്ലെന്ന് വ്യോമസേന അറിയിച്ചു.

മൃതദേഹങ്ങള്‍ കണ്ടെത്താനുള്ള ശ്രമത്തിലാണിപ്പോള്‍ തിരച്ചില്‍ സംഘം. വിമാനം തകര്‍ന്ന് വീണ പ്രദേശത്തേക്ക് ഹെലികോപ്ടര്‍ ഇറക്കാന്‍ സാധിക്കാത്തതിനെ തുടര്‍ന്ന് പാരച്യൂട്ടുകള്‍ ഉപയോഗിച്ചാണ് ആളുകളെ ഇറക്കിയത്. ഇന്നലെ തന്നെ സംഘം ഇങ്ങോട്ടേക്കെത്തിയെങ്കിലും മോശം കാലാവസ്ഥയെ തുടര്‍ന്ന് തിരച്ചില്‍ നിര്‍ത്തിവെച്ച് ഇന്ന് പുലര്‍ച്ച വീണ്ടും ശ്രമം നടത്തുകയായിരുന്നു.

തൃശ്ശൂര്‍ മുളങ്കുന്നത്തുകാവ് സ്വദേശി സ്‌ക്വാഡ്രന്‍ ലീഡര്‍ വിനോദ്, കൊല്ലം അഞ്ചല്‍ സ്വദേശി സര്‍ജന്റ് അനൂപ്കുമാര്‍, കണ്ണൂര്‍ അഞ്ചരക്കണ്ടി സ്വദേശി കോര്‍പ്പറല്‍ എന്‍.കെ. ഷരിന്‍ എന്നിവരാണ് വിമാനത്തിലുണ്ടായിരുന്ന മലയാളികള്‍.

റഷ്യന്‍ വിമാനത്തിലെ തീപിടിത്തം ; 41പേര്‍ മരിച്ചു

Test User — Mon, 06 May 2019 03:15:27 +0000

റഷ്യയില്‍ എമര്‍ജന്‍സി ലാന്റിങ്ങിനിടയില്‍ വിമാനത്തിന് തീപിടിച്ച് മരിച്ചവരുടെ എണ്ണം 41 ആയി. നിരവധിപ്പേര്‍ക്ക് പരിക്കേറ്റിട്ടുണ്ട്.
മോസ്‌കോ വിമാനത്താവളത്തിലാണ് സംഭവം. സുകോയ് സൂപ്പര്‍ജെറ്റ് വിമാനത്തിനാണ് തീപിടിച്ചത്.
പറന്നുയര്‍ന്ന ഉടനേ സിഗ്‌നല്‍ തകരാറിലായ വിമാനം തിരിച്ചിറക്കിയെങ്കിലും തീപിടിക്കുകയായിരുന്നു. ജീവനക്കാരുള്‍പ്പെടെ 78 പേരാണ് വിമാനത്തില്‍ ഉണ്ടായിരുന്നത്. തീപിടുത്തം ഉണ്ടായതിന്റെ കാരണം പരിശോധിച്ചുവരികയാണെന്ന് അധികൃതര്‍ പറഞ്ഞു. വിമാനത്തിലെ ജീവനക്കാരും കുട്ടികളും മരിച്ചവരില്‍പ്പെടുന്നു. പൊള്ളലേറ്റ് ചികിത്സയില്‍ കഴിയുന്ന പലരുടെയും നില ഗുരുതരമാണ്. മരണ നിരക്ക് ഉയരാന്‍ സാധ്യതയുണ്ടെന്നും അധികൃതര്‍ അറിയിച്ചു.

The moment the flaming Aeroflot Superjet makes an emergency landing at Sheremetyevo. Reports that a lightning strike may have lit the engine on fire https://t.co/ySVAWQkycp pic.twitter.com/sLKBhW0JLf
— Alec Luhn (@ASLuhn) May 5, 2019

എത്യോപ്യന്‍ വിമാനം തകര്‍ന്നുവീണു; വിമാനത്തിലുണ്ടായിരുന്നത് 149 യാത്രക്കാര്‍

chandrika — Sun, 10 Mar 2019 10:21:28 +0000

നെയ്‌റോബി : 149 യാത്രക്കാരുമായി അഡിസ് അബാബയില്‍ നിന്ന് നെയ്‌റോബിയിലേക്ക് പോയ വിമാനം തകര്‍ന്നു വീണു. എത്യോപ്യന്‍ എയര്‍ലൈന്‍സിന്റെ ബോയിംഗ് 737 വിമാനമാണ് തകര്‍ന്നുവീണത്. യാത്രക്കാരെ കൂടാതെ എട്ട് ജീവനക്കാരും വിമാനത്തിലുണ്ടായിരുന്നെന്ന് എയര്‍ലൈന്‍സ് വൃത്തങ്ങള്‍ പറഞ്ഞു. അഡിസ് അബാബയില്‍നിന്ന് 62 കിലോമീറ്റര്‍ അകലെയുള്ള ബിഷോഫ്ടു നഗരത്തിനു സമീപമാണ് അപകടമുണ്ടായത്. അപകടത്തില്‍ ഒട്ടേറെപ്പേര്‍ മരിച്ചതായി അധികൃതര്‍ അറിയിച്ചു. വിമാനാപകടത്തില്‍ മരിച്ചവരുടെ കുടുംബങ്ങള്‍ക്ക് ഇത്യോപ്യന്‍ പ്രധാനമന്ത്രി ട്വിറ്റര്‍ വഴി അനുശോചനം രേഖപ്പെടുത്തി. രക്ഷാപ്രവര്‍ത്തനം പുരോഗമിക്കുകയാണെന്ന് അധികൃതര്‍ വ്യക്തമാക്കി.