തുടക്കം മുതല്‍ ആക്രമിച്ചു കളിച്ച അയാക്‌സിന്റെ മുന്നില്‍ തകരുന്ന ചെല്‍സിയെയാണ് ആദ്യം കണ്ടതെങ്കിലും പിന്നീട് വലിയ തിരിച്ചുവരവാണ് അവര്‍ നടത്തിയത്. രണ്ടാം മിനിറ്റില്‍ ടാമി അബ്രഹാമിന്റെ സെല്‍ഫ് ഗോളില്‍ ചെല്‍സി പിന്നിലായി. എന്നാല്‍ പുലിസിച്ചിനെ വെല്‍റ്റ്മാന്‍ ബോകിസില്‍ വീഴ്ത്തിയതിന് ലഭിച്ച പെനാല്‍റ്റി ലക്ഷ്യത്തിലെത്തിച്ച് നാലാം മിനിറ്റില്‍ ജോര്‍ജിന്യോ ചെല്‍സിയെ ഒപ്പമെത്തിച്ചു.

ക്വിന്‍സി പ്രോമസിന്റെ നേടിയ ഗോളും ചെല്‍സി ഗോള്‍ കീപ്പര്‍ കെപ്പയുടെ സെല്‍ഫ് ഗോളും ആയതോടെ ഒന്നിനെതിരെ മൂന്ന് ഗോളുകള്‍ ചെല്‍സി പിന്നിലായി. രണ്ടാം പകുതിയില്‍ ഡോന്നി വാന്‍ ഡി ബീക്കും അയാക്‌സിനായി സ്‌കോര്‍ ചെയ്തു. ഇതോടെ പൂര്‍ണമായും തകര്‍ന്നെന്ന് കരുതിയ ചെല്‍സി പിന്നീട് ഉയര്‍ത്തെഴുന്നേല്‍ക്കുകയായിരുന്നു.

ക്യാപ്റ്റന്‍ സീസര്‍ ചെല്‍സിയുടെ രണ്ടാം ഗോള്‍ കണ്ടെത്തി. 68, 69 മിനിറ്റുകളില്‍ അയാക്‌സ് ഡിഫന്‍ഡര്‍മാരായ ഡലെയ് ബ്ലൈന്‍ഡും വെല്‍റ്റ്മാനും ചുവപ്പു കാര്‍ഡ് കണ്ട് പുറത്തായതോടെ ചെല്‍സി ആക്രമണത്തിന് മൂര്‍ച്ചകൂട്ടി. ജോര്‍ജിന്യോ , റീസെ ജെയിംസ് എന്നിവരാണ് ചെല്‍സിയുടെ മറ്റ് ഗോള്‍ സ്‌കോറര്‍മാര്‍.

ആംസ്റ്റർഡാം: യുവേഫ ചാമ്പ്യൻസ് ലീഗ് സെമിഫൈനൽ രണ്ടാം പാദത്തിൽ ടോട്ടനം ഹോട്‌സ്പറിനെ നേരിടുമ്പോൾ അയാക്‌സ് താരങ്ങളായ ഹക്കീം സിയെക്കും നുസൈർ മസ്രോയിയും കളിക്കുക റമസാൻ വ്രതമെടുത്തെന്ന് റിപ്പോർട്ട്‌. റമസാൻ പകലിൽ അന്നപാനീയങ്ങൾ കഴിക്കാതിരിക്കാനുള്ള അനുവാദം ടീം മാനേജ്‌മെന്റിൽ നിന്ന് വാങ്ങിയിട്ടുള്ള ഇരുവരും ആംസ്റ്റർഡാം അറീനയിൽ നടക്കുന്ന മത്സരത്തിൽ തുടക്കം മുതലേ കളിച്ചിരുന്നു. ആദ്യപകുതിയിൽ നോമ്പുമുറിക്കാനുള്ള സമയമായപ്പോൾ ഇരുവരും ടച്ച് ലൈനിൽ വന്ന് എനർജി ജെൽ കളിച്ചാണ് വ്രതം അവസാനിപ്പിച്ചത്.

പ്രാദേശിക സമയം 9 മണിക്കാണ് മത്സരം ആരംഭിച്ചത്. നെതർലന്റ്‌സിൽ മഗ്‌രിബ് ബാങ്ക് വിളിക്കുന്നതാകട്ടെ 9.17 നും. മത്സരം 23 മിനുട്ട് പിന്നിട്ടപ്പോൾ പന്ത പുറത്തുപോയ ഉടനെയാണ് ഹക്കീം നുസൈറും ടീം അധികൃതരിൽ നിന്ന് എനർജി ജെൽ വാങ്ങിക്കഴിച്ചത്. 36-ാം മിനുട്ടിൽ ഹക്കീം സിയെക്ക് ഗോൾ നേടുകയും ചെയ്തു. എന്നാൽ രണ്ടാം പകുതിയിൽ ലൂക്കാസ് മോറ നേടിയ ഹാട്രിക്കിന്റെ കരുത്തിൽ 2-3ന് ജയിച്ച് ടോട്ടനം ഹോട്‌സ്പർ ഫൈനലിലേക്ക് മുന്നേറുകയായിരുന്നു.

മൊറോക്കോ ദേശീയ ടീം താരമായ ഹക്കീം സിയെക്ക് 2016 മുതൽ അയാക്‌സ് ടീമിലെ സ്ഥിരാംഗമാണ്. ചാമ്പ്യൻസ് ലീഗിൽ റയൽ മാഡ്രിഡിനെതിരെ ഇരുപാദങ്ങളിലും ഗോൾ നേടിയ താരം സെമി ആദ്യപാദത്തിൽ ടോട്ടനത്തിനെതിരായ ഗോളിന് വഴിയൊരുക്കുകയും ചെയ്തു. നെതർലാന്റ്‌സിൽ ജനിച്ചുവളർന്ന അദ്ദേഹം ഡച്ച് യൂത്ത് ടീമുകൾക്കു വേണ്ടി കളിച്ചെങ്കിലും പിന്നീട് തന്റെ മാതാപിതാക്കളുടെ നാടായ മൊറോക്കോയുടെ സീനിയർ ടീമിലാണ് അരങ്ങേറിയത്. 21-കാരനായ നുസൈർ മസ്രോയും മൊറോക്കോ ദേശീയ താരം തന്നെ. അയാക്‌സിന്റെ യൂത്ത് അക്കാദമിയിലൂടെ കളി പഠിച്ച താരം റൈറ്റ് ബാക്കായാണ് കളിക്കുന്നത്. അയാക്‌സ് ഡച്ച് കിരീടം നേടിയ മത്സരത്തിൽ ഇരുവരും സ്റ്റാർട്ടിങ് ഇലവനിൽ ഉണ്ടായിരുന്നു.

ഇസ്ലാം മതാചാരങ്ങൾ അനുഷ്ഠിക്കുന്ന ഹക്കീമും നുസൈറും റമസാൻ പകലുകളിൽ ഭക്ഷണ പാനീയങ്ങൾ കഴിക്കില്ലെന്ന് ആഴ്ചകൾക്കു മുമ്പുതന്നെ ക്ലബ്ബിനെ അറിയിച്ചിരുന്നു. ദൈനംദിന പരിശീലനത്തിൽ പങ്കെടുക്കുമെങ്കിലും മഗ്‌രിബിന് ശേഷം മാത്രമേ ഭക്ഷണം കഴിക്കൂ എന്ന് ഇരുവരും വ്യക്തമാക്കി. നെതർലന്റ്‌സിൽ പുലർച്ചെ 5.01 ന് ആരംഭിക്കുന്ന വ്രതം രാത്രി 9.17 നാണ് അവസാനിക്കുന്നത്.

പ്രൊഫഷണൽ ഫുട്‌ബോളർമാർ മത്സരങ്ങൾക്കു വേണ്ടി നോമ്പ് ഉപേക്ഷിക്കുന്നതിൽ തെറ്റില്ലെന്ന് ഈജിപ്ത് ഗ്രാന്റ് മുഫ്തി ഷൗകി അല്ലം 2017-ൽ വ്യക്തമാക്കിയിരുന്നു. 2018 ലോകകപ്പ് മത്സരങ്ങൾക്കിടെ ഈജിപ്ത് താരങ്ങൾക്ക് നോമ്പെടുക്കാതെ കളിക്കാമെന്നും അദ്ദേഹം വ്യക്തമാക്കി.

ചാമ്പ്യന്‍സ് ലീഗ് കലാശപ്പോരില്‍ ലിവര്‍പൂളിന്റെ എതിരാളികള്‍ ടോട്ടനാം ഹോട്‌സ്പര്‍. ഇംഗ്ലീഷ് ക്ലബ്ബായ ടോട്ടനത്തിന്റെ ഗംഭീര തിരിച്ചുവരവ് കണ്ട മത്സരത്തില്‍ അയാക്‌സ് ആംസ്റ്റര്‍ഡാമിനെ 3-2 എന്ന സ്‌കോറിന് തോല്‍പിച്ചാണ് ഫൈനല്‍ ബര്‍ത്ത് നേടിയത്. ഇരു പാദങ്ങളിലുമായി ഇരുടീമും 3-3 തുല്യത പാലിച്ചെങ്കിലും എതിര്‍ തട്ടകത്തിലെ മൂന്ന് ഗോളുകള്‍ ടോട്ടനത്തിന് തുണയായി. ഇതോടെ ഇത്തവണത്തെ ചാമ്പ്യന്‍സ് ലീഗ് കിരീടപ്പോരാട്ടം ഇംഗ്ലീഷ് ക്ലബ്ബുകള്‍ തമ്മിലായിരിക്കും.

കളി ആരംഭിച്ച് ആദ്യ അഞ്ചു മിനിറ്റിനുള്ളില്‍ തന്നെ ടോട്ടനത്തിന്റെ വലകുലുങ്ങി. കളിയുടെ ഒന്നാം പകുതിയില്‍ എതിരില്ലാത്ത രണ്ടു ഗോളുകള്‍ക്ക് മുന്നിട്ടു നിന്ന അയാക്‌സ് ആദ്യപാദത്തിലെ ഒരു ഗോള്‍ മുന്‍തൂക്കത്തിന്റെ കൂടി അടിസ്ഥാനത്തില്‍ ഏതാണ്ട് വിജയം ഉറപ്പിച്ച മട്ടായിരുന്നു. എന്നാല്‍ രണ്ടാം പകുതിയില്‍ നാലു മിനിറ്റുകളുടെ ഇടവേളയില്‍ കണ്ട ലൂക്കാസിന്റെ രണ്ട് തകര്‍പ്പന്‍ ഗോളുകള്‍ കളിയുടെ വഴിതിരിച്ചു. പിന്നീട് ഇരുടീമും അക്രമണ ഫുട്‌ബോള്‍ കാഴ്ചവെച്ചു. ഒടുക്കം, 95ാം മിനിറ്റില്‍ അയാക്‌സിന്റെ ഹൃദയം കീറി മുറിച്ച് ഒരു ഗോള്‍ കൂടി, ലൂകാസ് മോറയുടെ വക. ലൂകാസിന്റെ ഹാട്രിക്കിന്റെ പിന്‍ബലത്തില്‍ ടോട്ടനം കലാശക്കളിക്ക്. ജൂണ്‍ ഒന്നിനാണ് ഫൈനല്‍ മത്സരം.

റോട്ടർഡാം: ചാമ്പ്യൻസ് ലീഗ് സെമിഫൈനൽ രണ്ടാം പാദത്തിൽ ടോട്ടനം ഹോട്‌സ്പറിനെ നേരിടാനൊരുങ്ങുന്ന ഡച്ച് ക്ലബ്ബ് അയാക്‌സിന് കരുത്തേകി ഡച്ച് കപ്പ് കിരീടം. ഞായറാഴ്ച നടന്ന ഫൈനലിൽ വില്ലം റ്റു ക്ലബ്ബിനെ എതിരില്ലാത്ത നാലു ഗോളിനാണ് എറിക് ടെൻ ഹാഗിന്റെ സംഘം വീഴ്ത്തിയത്. ഡാനി ബ്ലിന്റ്, ക്ലാസ് യാൻ ഹുണ്ടലാർ (രണ്ട്), റാസ്മസ് നിസ്സൻ എന്നിവർ ഗോളുകൾ നേടി.

യുവേഫ ചാമ്പ്യൻസ് ലീഗിലടക്കം മിന്നും പ്രകടനം കാഴ്ചവെക്കുന്ന അയാക്‌സ് 2018-19 സീസണിൽ നേടുന്ന ആദ്യ കിരീടമാണിത്. ഡച്ച് ലീഗിൽ രണ്ട് മത്സരം കൂടി ശേഷിക്കെ പോയിന്റ് ടേബിളിൽ അയാക്‌സും പി.എസ്.വി ഐന്തോവനും ഒപ്പത്തിനൊപ്പമാണ്. ഇരു ക്ലബ്ബുകൾക്കും 80 പോയിന്റ് വീതമുണ്ടെങ്കിലും ഗോൾ വ്യത്യാസത്തിൽ അയാക്‌സ് ആണ് മുന്നിൽ. അയാക്‌സിന് ഉത്രെക്ട്, ഗ്രാഫ്ഷാംപ് ടീമുകളെയും പി.എസ്.വിക്ക് ഹെറാക്ലസ്, എ.ഇസഡ് ടീമുകളെയുമാണ് ഇനി നേരിടാനുള്ളത്.

ചാമ്പ്യൻസ് ലീഗ് സെമി ആദ്യപാദത്തിൽ ടോട്ടനം ഹോട്‌സ്പറിനെ അവരുടെ തട്ടകത്തിൽ ഒരു ഗോളിന് തോൽപ്പിച്ചതിന്റെ ആത്മവിശ്വാസത്തിലാണ് ഡച്ച് സംഘം. രണ്ടാം പാദം ബുധനാഴ്ച രാത്രി നടക്കും.