സ്‌ഫോടനത്തിന് പിന്നിലെ ഗൂഢാലോചനയില്‍ ആര്‍എസ്എസ് നേതാവ് അസിമാനന്ദ് പങ്കാളിയാണെന്ന് നേരത്തെ എന്‍.ഐ.എ കണ്ടെത്തിയിരുന്നു. എന്നാല്‍ അസിമാനന്ദ് ഉള്‍പ്പെടെ ഏഴ് പേരെ സംശയത്തിന്റെ ആനുകൂല്യത്തില്‍ കഴിഞ്ഞ വര്‍ഷം കോടതി വെറുതെ വിട്ടു. ദേവേന്ദ്ര ഗുപ്ത, ഭാവേഷ് പട്ടേല്‍, സുനില്‍ ജോഷി എന്നിവര്‍ക്ക് കോടതി ജീവപര്യന്തം ശിക്ഷ വിധിക്കുകയും ചെയ്തു.

സുരേഷ് ജനിച്ചതും പഠിച്ചതും ഗുജറാത്തിലായിരുന്നു. അജ്മീര്‍ സ്‌ഫോടനത്തെ തുടര്‍ന്ന് നിരീക്ഷണത്തിലായിരുന്ന സുരേഷ് പിന്നീട് മുങ്ങുകയായിരുന്നു. അന്വേഷണ ഉദ്യോഗസ്ഥര്‍ കൊയിലാണ്ടിയില്‍ വന്നിരുന്നു. അന്ന് ഇയാളെ കുറിച്ച് എന്തെങ്കിലും വിവരം നല്‍കുവാന്‍ നാട്ടുകാര്‍ക്കും കഴിഞ്ഞിരുന്നില്ല. ഇവിടെ നിന്നും വലിയൊരു വിഭാഗം ആളുകള്‍ ഗുജറാത്തില്‍ ടയര്‍ മേഖലയില്‍ ജോലി ചെയ്യുന്നുണ്ട്. അത് കൊണ്ട് പോലീസിന് ഇയാളെ കണ്ടെത്താന്‍ ഏറെ പ്രയാസങ്ങള്‍ നേരിട്ടിരുന്നു. സുരേഷിന് ആര്‍.എസ്.എസിന്റെ അഖിലേന്ത്യാ നേതൃത്വവുമായി അടുത്ത ബന്ധമുണ്ടെന്നാണ് പറയപ്പെടുന്നത്. സുരേഷ് ഉള്‍പ്പെടെ മൂന്ന് പേരാണ് ഒളിവില്‍ പോയത്. ഇയാളെ പിടികൂടാനായി വിവരം നല്‍കുന്നവര്‍ക്ക് രണ്ട് ലക്ഷം രൂപ ഇനാം പ്രഖ്യാപിച്ചിരുന്നു.

മൂന്ന് പേരുടെ മരണത്തിനിടയാക്കിയ അജ്മീര്‍ ദര്‍ഗ സ്‌ഫോടനക്കേസില്‍ 2017ലാണ് ഭാവേഷ് പട്ടേലിനേയും ദേവേന്ദ്ര ഗുപ്തയേയും ജയ്പൂര്‍ കോടതി ജീവപര്യന്തം തടവിന് ശിക്ഷിച്ചത്. ഭാവേഷ് പട്ടേലും ദേവേന്ദ്ര ഗുപ്തയും ആര്‍.എസ്.എസ് പ്രവര്‍ത്തകരായിരുന്നു. സാഹചര്യ തെളിവുകളുടെ അടിസ്ഥാനത്തിലാണ് ഇവര്‍ ശിക്ഷിക്കപ്പെട്ടതെന്ന പ്രതിഭാഗത്തിന്റെ വാദം പരിഗണിച്ചാണ് ഇരുവര്‍ക്കും കോടതി ജാമ്യം അനുവദിച്ചത്.

കാഷായ വസ്ത്രമണിഞ്ഞ് സ്വാമി മുക്താനന്ദ് എന്ന് സ്വയം വിളിക്കുന്ന ഭാവേഷിനെ പുഷ്പവൃഷ്ടി നടത്തി പടക്കം പൊട്ടിച്ചാണ് ബി.ജെ.പി നേതാക്കളും അണികളും വരവേറ്റത്. ജയിലിലായിരിക്കുമ്പോഴാണ് ഭാവേഷ് സ്വാമി മുക്താനന്ദയായത്. ബറൂച്ച് മുന്‍സിപ്പാലിറ്റി പ്രസിഡണ്ട് സുര്‍ഭിബെന്‍ തമകുവാല, കൗണ്‍സിലറായ മരുതിസിന്‍ഹ് അതോദാരിയ, വി.എച്ച്.പിയുടെ വിരാല്‍ ദേശായ് തുടങ്ങിയവര്‍ സ്വീകരണ ചടങ്ങില്‍ പങ്കെടുത്തു.