അതേസമയം കേന്ദ്ര വിജിലന്‍സ് കമ്മീഷണര്‍ കെ.വി ചൗദരി മദ്ധ്യസ്ഥതക്കായി തന്റെ വസതി സന്ദര്‍ശിച്ചതായി അലോക് കുമാര്‍ വര്‍മ വെളിപ്പെടുത്തി. സി.ബി.ഐ സ്‌പെഷ്യല്‍ ഡയറക്ടര്‍ രാകേഷ് അസ്താനക്ക് മുമ്പ് കേന്ദ്ര വിജിലന്‍സ് കമ്മീഷണര്‍ കെ.വി ചൗദരി ഒരു മദ്ധ്യസ്ഥകന്‍ എന്നോണം ഒക്ടോബര്‍ 6 ന് തന്റെ വസതി സന്ദര്‍ശിച്ചതായാണ് അലോക് കുമാര്‍ വര്‍മ വെളിപ്പെടുത്തിയത്. ഇതിന് ശേഷമാണ് അലോക് കുമാര്‍ വര്‍മക്കെതിരെ പരാമര്‍ശങ്ങളുമായി സിവിസി റിപ്പോര്‍ട്ട് പുറത്തുവരുന്നത്.

അലോക് വര്‍മ്മയെ പുറത്താക്കാന്‍ കേന്ദ്ര വിജിലന്‍സ് കമ്മീഷനെ കേന്ദ്ര സര്‍ക്കാറും പ്രധാനമന്ത്രിയുടെ ഓഫീസും ദുരുപയോഗം ചെയ്തുവെന്ന് വ്യക്തമാക്കുന്നതാണ് പട്‌നായികിന്റെ വെളിപ്പെടുത്തല്‍. ഇത് ശരിവെക്കുന്നതാണ് പുതിയ വെളിപ്പെടുത്തല്‍.
അലോക് വര്‍മ്മക്കെതിരെ സി.വി.സി നടത്തിയ അന്വേഷണങ്ങളെല്ലാം അദ്ദേഹത്തിന്റെ കീഴുദ്യോഗസ്ഥന്‍ രാകേഷ് അസ്താന നല്‍കിയ പരാതിയുടെ അടിസ്ഥാനത്തിലുള്ളതായിരുന്നുവെന്ന് ജസ്റ്റിസ് പട്‌നായിക് പറഞ്ഞു. തനിക്കയച്ച സി.വി.സി അന്വേഷണ റിപ്പോര്‍ട്ടില്‍ രാകേഷ് അസ്താന മൊഴി നല്‍കിയതായി കാണുന്നുണ്ട്. എന്നാല്‍ രാകേഷ് അസ്താനയെ ഒരിക്കല്‍ പോലും സി.വി.സി വിസ്തരിച്ചിട്ടില്ല. റിപ്പോര്‍ട്ടിന്റെ അവസാന ഭാഗത്ത് നിരീക്ഷകന്‍ എന്ന നിലയില്‍ തന്റേതായി ചേര്‍ത്തിരിക്കുന്ന നിഗമനങ്ങള്‍ തന്റെ അറിവോടെയല്ലാതെ എഴുതിച്ചേര്‍ക്കപ്പെട്ടവയാണെന്നും പട്‌നായിക് ആരോപിച്ചു. സി.വി.സി റിപ്പോര്‍ട്ടിലെ ഉപസംഹാര നിഗമനങ്ങള്‍ ജസ്റ്റിസ് പട്‌നായികിന്റേതല്ലെന്ന് പുറത്താക്കപ്പെട്ട സി.ബി.ഐ ഡയരക്ടര്‍ അലോക് വര്‍മ്മ കഴിഞ്ഞ ദിവസം ആരോപിച്ചിരുന്നു. ഇത് ശരിവെക്കുന്നതാണ് പട്‌നായികിന്റെ വെളിപ്പെടുത്തല്‍.

പ്രതിപക്ഷ നേതാവിനെ പ്രതിനിധീകരിച്ച് ഉന്നതതല സമിതി യോഗത്തില്‍ പങ്കെടുത്ത കോണ്‍ഗ്രസ് ലോക്‌സഭാ കക്ഷി നേതാവ് മല്ലികാര്‍ജ്ജുന ഖാര്‍ഗെയുടെ ശക്തമായ വിയോജിപ്പോടെയാണ് അലോക് വര്‍മ്മയെ സി.ബി.ഐ ഡയരക്ടര്‍ പദവിയില്‍നിന്ന് നീക്കാന്‍ തീരുമാനിച്ചത്. പ്രതിപക്ഷത്തിന്റെ എതിര്‍പ്പ് ഖാര്‍ഗെ ആറ് പേജ് വരുന്ന വിയോജനക്കുറിപ്പായി എഴുതി നല്‍കുകയും ചെയ്തിരുന്നു. ഈ സാഹചര്യത്തില്‍ അലോകിനെ പുറത്താക്കാന്‍ പ്രധാനമന്ത്രി അധ്യക്ഷനായ ഉന്നതതല സമിതി അനാവശ്യ തിടുക്കം കാട്ടിയെന്ന ആരോപണം വരും ദിവസങ്ങളില്‍ പ്രതിപക്ഷം ആയുധമാക്കിയേക്കും. റഫാല്‍ യുദ്ധ വിമാന ഇടപാടില്‍ സി.ബി.ഐ അന്വേഷണത്തിന് ഒരുങ്ങുന്ന സാഹചര്യത്തിലാണ് തിടുക്കപ്പെട്ട് അലോക് വര്‍മ്മയെ പുറത്താക്കിയതെന്ന് കോണ്‍ഗ്രസ് ഉള്‍പ്പെടെയുള്ള കക്ഷികള്‍ നേരത്തെ ആരോപിച്ചിരുന്നു. ഈ സാഹചര്യത്തില്‍ ജസ്റ്റിസ് പട്‌നായികിന്റെ വെളിപ്പെടുത്തല്‍ വരും ദിവസങ്ങളില്‍ പ്രധാനമന്ത്രിയേയും ബി.ജെ.പിയേയും പ്രതിക്കൂട്ടിലാക്കിയേക്കും.

നേരത്തെ അര്‍ധരാത്രിയില്‍ തിരക്കിട്ട് അലോക് വര്‍മയെ മാറ്റിയ നടപടി സുപ്രീംകോടതി റദ്ദാക്കിയിരുന്നു. ഇതിനെ തുടര്‍ന്ന് കഴിഞ്ഞ ദിവസം അധികാരമേറ്റ അലോക് വര്‍മ സി.ബി.ഐ തലപ്പത്ത് വന്‍ അഴിച്ചുപണിക്ക് തുടക്കമിട്ടിരുന്നു. ഇതാണ് പെട്ടന്ന് തന്നെ നടപടിയെടുക്കാന്‍ മോദി സര്‍ക്കാറിനെ പ്രേരിപ്പിച്ചത്.

റഫാല്‍ ഇടപാടിയെ അഴിമതി അന്വേഷിക്കാന്‍ അലോക് വര്‍മ തയ്യാറായതാണ് അദ്ദേഹത്തെ തിരക്കിട്ട് നീക്കാന്‍ കാരണം. അഴിമതി പുറത്തുവരുമെന്ന ഭയമാണ് മോദി സര്‍ക്കാറിനെന്ന് കോണ്‍ഗ്രസ് നേതൃത്വം ആരോപിച്ചു.

സ്ഥാനമേറ്റ ഉടന്‍ തന്നെ താല്‍ക്കാലിക ഡയരക്ടര്‍ നടത്തിയ എല്ലാ നിയമനങ്ങളും സ്ഥലംമാറ്റങ്ങളും അലോക് വര്‍മ റദ്ദാക്കിയിരുന്നു. ഡെപ്യൂട്ടി എസ്.പി എകെ ബസ്സി, എസ്.എസ് ഗുറം, ഡി.ഐ.ജി എംകെ സിന്‍ഹ, ജോയിന്റ് ഡയരക്ടര്‍ എ.കെ ശര്‍മ എന്നിവര്‍ക്കെതിരായ സ്ഥലംമാറ്റ ഉത്തരവുകളാണ് റദ്ദാക്കിയത്.

അലോക് വര്‍മയുടെ ഭാവി തീരുമാനിക്കാന്‍ പ്രധാനമന്ത്രിയുടെ അധ്യക്ഷതയില്‍ ഉന്നതാധികാര യോഗം ഡല്‍ഹിയില്‍ ചേരുന്നതിനിടെയാണ് നിര്‍ണായക നീക്കവുമായി അലോക് വര്‍മ രംഗത്തെത്തിയിരിക്കുന്നത്. പ്രധാനമന്ത്രിക്ക് പുറമെ സുപ്രീംകോടതി ചീഫ് ജസ്റ്റിസ്, കോണ്‍ഗ്രസ് നേതാവ് മല്ലികാര്‍ജ്ജുന്‍ ഖാര്‍ഗെ എന്നിവരാണ് യോഗത്തില്‍ സംബന്ധിക്കുന്നത്.

പ്രധാനമന്ത്രിയും പ്രതിപക്ഷനേതാവും ചീഫ് ജസ്റ്റിസും അടങ്ങിയ ഉന്നതാധികാര സമിതിയാണ് സിബിഐ ഡയറക്ടറെ നിശ്ചയിക്കുന്നത്. അലോക് വര്‍മയെ സിബിഐ മേധാവി സ്ഥാനത്ത് നിലനിര്‍ത്തുന്നത് സംബന്ധിച്ച കാര്യത്തിലും ഈ സമിതി തന്നെ അന്തിമ തീരുമാനം എടുക്കണമെന്നാണ് സുപ്രീംകോടതിയുടെ നിര്‍ദേശം. ഒരാഴ്ച്ചയ്ക്കുള്ളില്‍ ഇക്കാര്യത്തില്‍ ഉന്നതാധികാര സമിതി തീരുമാനമെടുക്കണമെന്നും സുപ്രീംകോടതി വിധിയില്‍ പറഞ്ഞിട്ടുണ്ട്.

രണ്ട് വര്‍ഷത്തെ കാലാവധി ബാക്കിനില്‍ക്കെ 2018 ഒക്ടോബര്‍ 24 അര്‍ധരാത്രിയില്‍ അപ്രതീക്ഷിത ഉത്തരവിലൂടെയാണ് സി.ബി.ഐ ഡയറക്ടര്‍ സ്ഥാനത്തു നിന്ന് അലോക് വര്‍മ്മയെ കേന്ദ്രസര്‍ക്കാര്‍ മാറ്റിയത്. സിബിഐ ഡയറക്ടറായിരുന്ന അലോക് വര്‍മ്മയും ഉപ ഡയറക്ടറായിരുന്ന രാകേഷ് അസ്താനയും തമ്മിലുള്ള തര്‍ക്കത്തെ തുടര്‍ന്നാണ് ഇരുവരെയും ചുമതലകളില്‍ നിന്ന് നീക്കിയതെന്നായിരുന്നു കേന്ദ്ര സര്‍ക്കാറിന്റെ ന്യായം.

അതേസമയം റഫാല്‍ കേസില്‍ അലോക് വര്‍മ നടപടിയിലേക്ക് നീങ്ങുന്നത്് മോദിയെ ചൊടിപ്പിച്ചെന്ന ആരോപണം നിലനില്‍ക്കെയായിരുന്നു കേന്ദ്രസര്‍ക്കാറിന്റെ അപ്രതീക്ഷിത നീക്കം. എന്നാല്‍ ഈ നടപടി സുപ്രീംകോടതി വിധിയുടെ ലംഘനമാണെന്ന് ചൂണ്ടിക്കാട്ടി അലോക് വര്‍മ്മയുടെ പരമോന്നത കോടതിയെ സമീപിക്കുകയായിരുന്നു. ചീഫ് ജസ്റ്റിസ് രഞ്ജന്‍ ഗൊഗോയി അദ്ധ്യക്ഷനായ മൂന്നംഗ ബെഞ്ചായിരുന്നു കേസ് പരിഗണിച്ചത്. ജസ്റ്റിസുമാരായ സഞ്ജയ് കിഷന്‍ കൗള്‍, കെ.എം ജോസഫ് എന്നിവര്‍ ഉള്‍പ്പെട്ട ബഞ്ചാണ് ഹരജിയില്‍ വിധി പറഞ്ഞത്. ചൊവ്വാഴ്ച്ച ചീഫ് ജസ്റ്റിസ് രഞ്ജന്‍ ഗൊഗോയി അവധി ദിനമാണ്.

സി.ബി.ഐ ഡയറക്ടറെ മാറ്റിയത് റഫാല്‍ ഇടപാടിലെ അന്വേഷണം അട്ടിമറിക്കാനാണെന്ന ആരോപണവുമായി രാഹുല്‍ ഗാന്ധി ഉള്‍പ്പെടെ രംഗത്തെത്തിയതോടെ വിഷയം രാഷ്ട്രീയ പ്രാധാന്യവും നേടി. സുപ്രീംകോടതി വിധിയുടെ പശ്ചാത്തലത്തില്‍ സിബിഐയുടെ മേല്‍നോട്ടം വഹിക്കുന്ന പ്രധാനമന്ത്രിയുടെ ഓഫീസിനെ നേരിട്ട് കടന്നാക്രമിക്കാനുള്ള അവസരമാണ് രാഹുല്‍ ഗാന്ധിക്ക് ലഭിക്കുന്നത്.

സി.ബി.ഐ തലപ്പത്തെ പ്രശ്‌നങ്ങള്‍ ജൂലൈയില്‍ തന്നെ തുടങ്ങിയിരുന്നുവെന്നും തുഷാര്‍ മേത്ത പറഞ്ഞു. രണ്ടുമാസമായി അദ്ദേഹത്തെ നിങ്ങള്‍ സഹിച്ചു കൊണ്ടിരിക്കുകയായിരുന്നു എന്നാണോ ഇതിനര്‍ത്ഥമെന്ന് കോടതി ചോദിച്ചു. എന്തുകൊണ്ട് നടപടിയെടുക്കാന്‍ ഒക്ടോബര്‍ 23ന് അര്‍ധരാത്രിവരെ കാത്തിരിന്നുവെന്നും ചീഫ് ജസ്റ്റിസ് രഞ്ജന്‍ ഗോഗോയി ചോദിച്ചു.
ഉയര്‍ന്ന സ്വഭാവമുള്ള കേസുകള്‍ അന്വേഷിക്കേണ്ട കുറ്റാന്വേഷണ ഏജന്‍സിയായ സി.ബി.ഐയിലെ രണ്ട് ഉന്നത ഉദ്യോഗസ്ഥര്‍ ഇത്തരം ജോലികള്‍ ചെയ്യാതെ പരസ്പരം കേസുകള്‍ രജിസ്റ്റര്‍ ചെയ്യാനും റെയ്ഡ് നടത്താനും മത്സരിക്കുകയായിരുന്നുവെന്നും ഇത്തരമൊരു സാഹചര്യത്തിലാണ് നടപടിയെടുത്തതെന്നും മേത്ത വിശദീകരിച്ചു.

സെലക്ഷന്‍ കമ്മിറ്റിയുമായി കൂടിയാലോചിക്കാതെ സി.ബി.ഐ ഡയരക്ടറുടെ അധികാരം എടുത്തുമാറ്റിയ സി.വി.സി നടപടി ഭരണഘടനാ വിരുദ്ധമാണെന്ന് അലോക് വര്‍മ്മക്കു വേണ്ടി ഹാജരായ അഡ്വ. ഫാലി എസ് നരിമാന്‍ വാദിച്ചു. സി.ബി.ഐ ഡയരക്ടര്‍ എന്നത് ഇപ്പോള്‍ വിസിറ്റിങ് കാര്‍ഡിലെ പദവി മാത്രമാണ്. യാതൊരു അധികാരവുമില്ലെന്നും നരിമാന്‍ ആരോപിച്ചു. പകരം പുതിയ സി.ബി.ഐ ഡയരക്ടറെ നിയമിക്കാമോ എന്ന ചീഫ് ജസ്റ്റിസിന്റെ ചോദ്യത്തിന്, നീണ്ട മൗനത്തിനു ശേഷം ഭരണഘടന നല്‍കുന്ന അധികാരം കോടതിക്ക് യുക്തിസഹമായി വിനിയോഗിക്കാമെന്ന് ഫാലി നരിമാന്‍ മറുപടി നല്‍കി.

ഉദ്യോഗസ്ഥര്‍ക്കെതിരെ നടപടിയെടുക്കാനുള്ള ബാധ്യത സി.വി.സിക്കുണ്ടെന്നും അതില്‍ വീഴ്ച പറ്റിയാല്‍ സുപ്രീംകോടതിയോടും രാഷ്ട്രപതിയോടും മറുപടി പറയേണ്ടി വരുമെന്നും തുഷാര്‍ മേത്ത വാദിച്ചു. ഒരു രാ്ത്രി കൊണ്ടുണ്ടായതല്ല ഉദ്യോഗസ്ഥര്‍ക്കിടയിലെ പ്രശ്‌നമെന്ന് സി.വി.സി തന്നെ വ്യക്തമാക്കിയ പശ്ചാത്തലത്തില്‍ സെലക്ഷന്‍ കമ്മിറ്റിയുമായി ആലോചിച്ചു വേണമായിരുന്നു അധികാരം എടുത്തു കളയാനെന്ന് കോടതി ചൂണ്ടിക്കാട്ടി. തുടര്‍ന്ന് കേസ് കോടതി വിധി പറയാന്‍ മാറ്റിവെച്ചു.