ഭൂട്ടാനില്‍ നിന്ന് നികുതി വെട്ടിച്ച് വാഹനങ്ങള്‍ കേരളത്തിലേക്ക് കടത്തിയതുമായി ബന്ധപ്പെട്ട കസ്റ്റംസ് റെയ്ഡിനിടെയാണ് അമിത്തിന്റെ വാഹനങ്ങളും ഗാരേജിലുള്ള മറ്റ് വാഹനങ്ങളും പിടിച്ചെടുത്തത്. അമിത് ചക്കാലക്കല്‍ ഒന്നിലധികം തവണ കസ്റ്റംസ് മുന്നില്‍ ഹാജരായി രേഖകള്‍ സമര്‍പ്പിച്ചിരുന്നു. ഗാരേജില്‍ നിന്നുള്ള വാഹനങ്ങള്‍ അറ്റകുറ്റപ്പണിക്കെത്തിച്ചതാണെന്ന് അമിത് വ്യക്തമാക്കി. വാഹനങ്ങളുടെ യഥാര്‍ത്ഥ ഉടമകളും നേരത്തെ കസ്റ്റംസ് ഉദ്യോഗസ്ഥരോട് ഹാജരായിരുന്നു. ഭൂട്ടാന്‍, നേപ്പാള്‍ റൂട്ടുകളിലൂടെ ലാന്‍ഡ് ക്രൂയിസര്‍, ഡിഫന്‍ഡര്‍ പോലുള്ള ആഡംബര കാറുകള്‍ വ്യാജ രേഖകളുടെ സഹായത്തോടെ ഇന്ത്യയില്‍ കടത്തുകയും പിന്നീട് താരങ്ങള്‍ക്കുള്‍പ്പെടെ വിലകുറച്ച് വില്‍ക്കുകയും ചെയ്ത ഒരു സിന്‍ഡിക്കേറ്റിന്റെ പ്രവര്‍ത്തനമാണ് അന്വേഷണത്തില്‍ പുറത്തുവന്നത്.

ഇന്ത്യന്‍ ആര്‍മി, യുഎസ് എംബസി, വിദേശകാര്യ മന്ത്രാലയം എന്നിവയുമായി ബന്ധപ്പെട്ടതാണെന്ന് തോന്നിക്കുന്ന വ്യാജ രേഖകളും, വ്യാജ ആര്‍ടിഒ രജിസ്‌ട്രേഷനുകളും ഉപയോഗിച്ചിരുന്നതായി പ്രാഥമിക അന്വേഷണത്തില്‍ കണ്ടെത്തി. ഈ കേസിന്റെ ഭാഗമായി ദുല്‍ഖര്‍ സല്‍മാന്‍, പൃഥ്വിരാജ്, അമിത് ചക്കാലക്കല്‍ തുടങ്ങിയ നടന്മാരുടെ വീടുകള്‍ ഉള്‍പ്പെടെ കേരളത്തിലെ 17 ഇടങ്ങളില്‍ കസ്റ്റംസ് കഴിഞ്ഞ സെപ്റ്റംബറില്‍ റെയ്ഡ് നടത്തിയിരുന്നു. വാഹന ഡീലര്‍മാരുടെ വീടുകളിലും പരിശോധന നടന്നു. വ്യാജ രേഖകള്‍ വഴി ഇറക്കുമതി ചെയ്ത വാഹനങ്ങളുമായി ബന്ധപ്പെട്ട ഇടപാടുകള്‍, സാമ്പത്തിക കള്ളപ്പണം എന്നിവയാണ് എന്‍ഫോഴ്‌സ്‌മെന്റ് ഡയറക്ടറേറ്റിന്റെ നിലവിലെ അന്വേഷണത്തിന്റെ കേന്ദ്രീകരണം. കസ്റ്റംസിനൊപ്പം ഇഡിയും കേസില്‍ അന്വേഷണം തുടരുകയാണ്.

അമിത്തിന്റെ വിദേശയാത്രകളും സാമ്പത്തിക ഇടപാടുകളും സംബന്ധിച്ച പരിശോധന തുടരുകയാണ്. ഭൂട്ടാനില്‍ നിന്ന് വാഹനങ്ങള്‍ എത്തിക്കുന്നതില്‍ ഇടനിലക്കാരനായി അദ്ദേഹം പ്രവര്‍ത്തിച്ചിട്ടുണ്ടോ എന്ന കാര്യത്തില്‍ വ്യക്തത നേടുക എന്നതാണ് അന്വേഷണത്തിന്റെ ലക്ഷ്യം.

അടുത്തിടെ അമിത്തിന്റെ ഗാരേജില്‍ നിന്ന് കസ്റ്റംസ് എട്ട് വാഹനങ്ങള്‍ പിടിച്ചെടുത്തിരുന്നു. ഇതില്‍ ഒന്ന് മാത്രമാണ് തന്റേതെന്ന് അദ്ദേഹം അവകാശപ്പെട്ടു. ബാക്കി വാഹനങ്ങള്‍ മോഡിഫിക്കേഷന്‍ക്കായി കൊണ്ടുവന്നതാണെന്നും ചിലത് മറ്റ് സംസ്ഥാനങ്ങളില്‍ രജിസ്റ്റര്‍ ചെയ്തവയാണെന്നും അമിത് വ്യക്തമാക്കി. എന്നാല്‍ റീ-രജിസ്‌ട്രേഷന്‍ നടപടികളില്‍ കടന്നിട്ടില്ലെന്നതിനാല്‍ ഇടനിലക്കാരുമായുള്ള ബന്ധം ശക്തമാണെന്ന നിഗമനത്തിലാണ് കസ്റ്റംസ്.

കോയമ്പത്തൂരിനെ കേന്ദ്രീകരിച്ച് പ്രവര്‍ത്തിച്ചിരുന്ന വാഹനക്കടത്ത് സംഘത്തെ കഴിഞ്ഞ വര്‍ഷം കസ്റ്റംസ് പിടികൂടിയിരുന്നു. അതിന്റെ തുടര്‍ച്ചയായാണ് അമിത്തിന്റെ ഗാരേജിലടക്കം പരിശോധനകളും രേഖാ പരിശോധനകളും നടന്നത്. കഴിഞ്ഞ ദിവസത്തെ റെയ്ഡിന് ശേഷവും അമിത്തിനെ കസ്റ്റംസ് ഓഫീസില്‍ വിളിപ്പിച്ച് മൊഴിയെടുത്തിരുന്നു.

അമിത് ചക്കാലക്കല്‍ അന്വേഷണവുമായി സഹകരിക്കുന്നില്ലെന്ന് കസ്റ്റംസ് വൃത്തങ്ങള്‍ അറിയിച്ചു. സമന്‍സ് സ്വീകരിക്കാന്‍ വിസമ്മതിച്ചതിനെ തുടര്‍ന്ന് പൊലീസ് സഹായത്തോടെയാണ് പരിശോധന നടത്തിയത്. വാഹനങ്ങളുടെ രേഖകള്‍ പരിശോധിച്ച ശേഷം നിയമാനുസൃതമാണെന്ന് തെളിഞ്ഞാല്‍ തിരിച്ചുനല്‍കുമെന്നും അധികൃതര്‍ വ്യക്തമാക്കി.

ഇതിനോടകം നടന്‍മാരായ പൃഥ്വിരാജ്, ദുല്‍ഖര്‍ സല്‍മാന്‍, മമ്മൂട്ടി എന്നിവരുടെ വീടുകളിലും പരിശോധന നടന്നിട്ടുണ്ട്. ഭൂട്ടാന്‍ പട്ടാളം ഉപേക്ഷിച്ച വാഹനങ്ങള്‍ ഇറക്കുമതി തീരുവ ഒഴിവാക്കി കൈവശപ്പെടുത്തിയെന്ന പരാതിയെ തുടര്‍ന്നാണ് ‘ഓപ്പറേഷന്‍ നുംഖോര്‍’ നടപ്പിലാക്കുന്നത്.

കൊച്ചി, തിരുവനന്തപുരം എന്നീ സ്ഥലങ്ങളിലായി നടന്ന പരിശോധനയില്‍, മമ്മൂട്ടിയുടെ പനമ്പിള്ളി നഗരത്തിലെ വീടുകളും ഉള്‍പ്പെട്ടു. 2010 ലെ ലാന്‍ഡ് റോവര്‍ ഡിഫെന്‍ഡര്‍ ദുല്‍ഖര്‍ സ്വന്തമാക്കിയതായി കസ്റ്റംസ് കണ്ടെത്തിയിട്ടുണ്ട്. അദ്ദേഹത്തിന്റെ രണ്ട് വാഹനങ്ങള്‍ ഇതിനോടകം കസ്റ്റംസ് പിടിച്ചെടുത്തിട്ടുണ്ട്.

രാജ്യവ്യാപകമായി നടക്കുന്ന ഓപ്പറേഷന്‍ നംഖോര്‍യുടെ ഭാഗമായി കേരളത്തിലെ കൊച്ചി, കോഴിക്കോട്, കോട്ടയം, തിരുവനന്തപുരം, മലപ്പുറം ജില്ലകളിലായി 18 കേന്ദ്രങ്ങളില്‍ പരിശോധന തുടരുന്നു.

പൃഥ്വിരാജിന്റെ ലാന്‍ഡ് റോവറും ദുല്‍ഖര്‍ സല്‍മാന്റെ നിസാന്‍ പട്രോളും കസ്റ്റംസ് കസ്റ്റഡിയിലെടുക്കും. ഭൂട്ടാന്‍ പട്ടാളം അഞ്ച് ലക്ഷം രൂപയ്ക്ക് വിറ്റ വാഹനങ്ങള്‍ ഹിമാചല്‍ പ്രദേശില്‍ രജിസ്റ്റര്‍ ചെയ്ത് 40 ലക്ഷം രൂപ വരെ വിലയ്ക്ക് കേരളത്തില്‍ വിറ്റതായി കണ്ടെത്തി.

കേരളത്തില്‍ അമ്പതിലധികം വാഹന ഇടപാട് ക്രമക്കേട് കണ്ടെത്തിയിട്ടുണ്ടെന്നും, 20ഓളം വാഹനങ്ങള്‍ നികുതി വെട്ടിച്ച് കടത്തിയതായും കസ്റ്റംസ് വ്യക്തമാക്കി.