അദ്ദേഹത്തോടൊപ്പം നിയമസഭയിൽ പ്രവർത്തിക്കുന്ന കാലത്ത് ആ വ്യക്തിത്വത്തെ കൂടുതൽ അടുത്തറിയാൻ സാധിച്ചു. നിറഞ്ഞ പുഞ്ചിരിയോടെ എല്ലാവരോടും ഇടപഴകാനും ജനകീയ പ്രശ്‌നങ്ങളിൽ സജീവമായി ഇടപെടാനും അദ്ദേഹം താൽപര്യം കാണിച്ചിരുന്നു. തൊഴിലാളികളുടെ പ്രശ്‌നങ്ങൾ പഠിച്ച് അവതരിപ്പിക്കുന്നതിൽ പ്രത്യേകമായ മിടുക്ക് തന്നെ അദ്ദേഹത്തിനുണ്ടായിരുന്നു.

ചെറുപ്പം മുതലേ തൊഴിലാളികൾക്കൊപ്പം പ്രവർത്തിച്ചതിന്റെ പരിചയമാണ് അദ്ദേഹത്തിന്റെ പൊതുജീവിതത്തെ സാർത്ഥകമാക്കിയത്.- പി.എം.എ സലാം പറഞ്ഞു. കുടുംബത്തിന്റെയും സഹപ്രവർത്തകരുടെയും ദുഃഖത്തിൽ പങ്കുചേരുന്നതായും അദ്ദേഹം അറിയിച്ചു.

ആറ്റിങ്ങല്‍ മണ്ഡലത്തില്‍ നിന്ന് 3 തവണ എം.എല്‍.എ ആയി തെരഞ്ഞെടുക്കപ്പെട്ടു. 1987ലാണ് ആദ്യ വിജയം. 1991ല്‍ 316 വോട്ടിന് കോണ്‍ഗ്രസ് സ്ഥാനാര്‍ഥി ടി. ശരത്ചന്ദ്രപ്രസാദിനോട് പരാജയപ്പെട്ടു. 96ല്‍ വീണ്ടും നിയമസഭയിലെത്തി. 2006ല്‍ സി. മോഹനചന്ദ്രനെ തോല്‍പിച്ചു. 2006 മുതല്‍ 2011 വരെ ചീഫ് വിപ്പായിരുന്നു.

1956ല്‍ കമ്യൂണിസ്റ്റ് പാര്‍ട്ടി അംഗമായ ആനത്തലവട്ടം, 1964ല്‍ പാര്‍ട്ടി പിളര്‍ന്നപ്പോള്‍ സി.പി.എമ്മിനൊപ്പം നിലയുറപ്പിച്ചു. 1985ല്‍ സി.പി.എം സംസ്ഥാന കമ്മിറ്റിയംഗമായും 2008ല്‍ പാര്‍ട്ടി സംസ്ഥാന സെക്രട്ടേറിയറ്റ് അംഗമായും തെരഞ്ഞെടുക്കപ്പെട്ടു. അടിയന്തരാവസ്ഥക്കാലത്ത് അറസ്റ്റിലായ ആനത്തലവട്ടം അടിയന്തരാവസ്ഥ അവസാനിച്ച ശേഷമാണ് ജയില്‍മോചിതനായത്.

1979 മുതല്‍ 84 വരെ ചിറയന്‍കീഴ് ഗ്രാമപഞ്ചായത്ത് പ്രസിഡന്റ് ആയിരുന്നു. സി.ഐ.ടിയു ദേശീയ വൈസ് പ്രസിഡന്റും അപ്പക്‌സ് ബോഡി ഫോര്‍ കയര്‍ വൈസ് ചെയര്‍മാനുമാണ്. ഭാര്യ: ലൈല. മക്കള്‍: ജീവ ആനന്ദന്‍, മഹേഷ് ആനന്ദന്‍.