ഇന്നലെ വൈകിട്ടാണ് തൊടുപുഴ മലങ്കര ഡാമില്‍ അനില്‍ നെടുമങ്ങാട് മുങ്ങി മരിച്ചത്. ഒഴിവു ദിവസമായതിനാല്‍ ഷൂട്ടിങ്ങ് സെറ്റ് കാണാനായിട്ടാണ് അനിലും സുഹൃത്തുക്കളും വൈകിട്ട് മലങ്കര ഡാമില്‍ എത്തിയത്. തുടര്‍ന്ന് കുളിക്കാന്‍ ഇറങ്ങുകയായിരുന്നു. നീന്തല്‍ അറിയാമായിരുന്ന അനില്‍ ആഴക്കയത്തില്‍പ്പെട്ടതാണ് അപകടത്തിനിടയാക്കിയത്.

പോലീസും നാട്ടുകാരും ചേര്‍ന്ന് അനിലിനെ ജീവനോടെ കരക്കെത്തിച്ചെങ്കിലും ആശുപത്രിയിലേക്ക് കൊണ്ടുപോകും വഴി മരണം സംഭവിച്ചു. തിരുവനന്തപുരം നെടുമങ്ങാട്ടെ തോട്ടുമുക്കിലാണ് വീട്. പോസ്റ്റ്മോര്‍ട്ടം നടപടികള്‍ക്കു ശേഷം മൃതദേഹം വീട്ടിലെത്തിക്കും.

അയ്യപ്പനും കോശിയും എന്ന ചിത്രത്തിലെ പൊലീസ് ഓഫീസറുടെ വേഷത്തിലാണ് അനിൽ ഏറെ ശ്രദ്ധിക്കപ്പെട്ടത്. പൊറിഞ്ചുമറിയം ജോസ്, കമ്മട്ടിപ്പാടം, ആഭാസം, പരോൾ, കിസ്മത്ത്, പാവാട തുടങ്ങി ഇരുപതോളം ചിത്രങ്ങളിൽ അഭിനയിച്ചിട്ടുണ്ട്. ടെലിവിഷനിലൂടെയാണ് അനിൽ നെടുമങ്ങാട് അഭിനയ രംഗത്തേക്ക് കടന്നുവന്നത്.

ജോജു ജോർജിനെ നായകനാക്കി സൻഫീർ കെ സംവിധാനം ചെയ്യുന്ന ചിത്രമാണ് പീസ്. ദിവസങ്ങൾക്കു മുമ്പാണ് അനിൽ ലൊക്കേഷനിൽ ജോയിൻ ചെയ്തത്.

ക്രിസ്മസ് പ്രമാണിച്ച് ഷൂട്ടിങ്ങിന് അവധിയായതിനാൽ അനിലും സുഹൃത്തുക്കളും ഡാമിൽ കുളിക്കാനിറങ്ങുകയായിരുന്നു. അപകടസ്ഥലത്തുനിന്ന് മുട്ടം പൊലീസാണ് അനിലിനെ തൊടുപുഴ സെന്റ് മേരീസ് ആസ്പത്രിയിലെത്തിച്ചത്.