ഉത്തര്‍പ്രദേശില്‍ ബിജെപി സര്‍ക്കാര്‍ അധികാരത്തിലേറിയ ഉടന്‍ പുതിയ മുഖ്യമന്ത്രി യോഗി ആദിത്യനാഥ് പ്രത്യേക താല്പര്യ പ്രകാരം രൂപീകരിച്ച ടീമാണ് ആന്റി-റോമിയോ സ്‌ക്വാഡ്. പെണ്‍കുട്ടികളെ ശല്യം ചെയ്യുന്ന പൂവാലന്മാരെ കണ്ടെത്തി കൈകാര്യം ചെയ്യലായിരുന്നു സ്‌ക്വാഡിന്റെ നിയോഗ ലക്ഷ്യം.

എന്നാല്‍ വെളുക്കാന്‍ തേച്ചത് പാണ്ടായി എന്ന് പറഞ്ഞതു പോലെയായി സ്‌ക്വാഡിന്റെ പ്രവര്‍ത്തനം. കാമുകി-കാമുകന്മാരെ തുരത്തിയോടിച്ച് വില്ലന്‍ പരിവേഷം എടുത്തണിഞ്ഞ സ്‌ക്വാഡ് തലമുടി വടിച്ച് പൂവാലന്മാരെ കൈകാര്യം ചെയ്തതോടെ കളി മാറി. ആന്റി-സ്‌ക്വാഡിനെതിരെ ജനം തിരിഞ്ഞതും ജനരോഷം ഭയന്ന് മുഖ്യമന്ത്രി തന്നെ സ്‌ക്വാഡംഗങ്ങള്‍ സംയമനം പാലിക്കണമെന്ന് ആഹ്വാനം ചെയ്ത് രംഗത്തെത്തി.

അതിന് പിന്നാലെയാണ് ഇപ്പോള്‍ പൊലീസിന് തന്നെ പൂവാലന്മാരെ കൈകാര്യം ചെയ്യേണ്ടതെങ്ങനെ എന്ന് ക്ലാസെടുത്തു കൊടുക്കുന്നത്.

സംഗതി അത്ര എളുപ്പമല്ലെന്ന് തന്നെ തുറന്നു പറയും ഈ പരിശീലകര്‍. സ്‌ക്വാഡിന്റെ പ്രവര്‍ത്തനങ്ങളുമായി മുന്നോട്ട് പോവാന്‍ തന്നെ പറഞ്ഞ മുഖ്യമന്ത്രി പക്ഷേ പ്രണയിനികളെ ബുദ്ധിമുട്ടിലാക്കരുതെന്നാണ് നിര്‍ദേശം നല്‍കിയിരിക്കുന്നത്.

താന്‍ വരുന്നെന്നറിഞ്ഞാല്‍ തന്നെ ആളുകള്‍, പ്രത്യേകിച്ച് കാമുകി-കാമുകന്മാര്‍ പേടിച്ചോടുമെന്ന് പറഞ്ഞ പൊലീസ് ഉദ്യോഗസ്ഥനെ പരീശീലകന്‍ തിരുത്തി. ഈ നിലപാട് ശരിയല്ലെന്നായിരുന്നു പരിശീലകന്റെ മറുപടി.

ആന്റി-റോമിയോ സ്‌ക്വാഡ് പ്രണയിനികളെ ശല്യം ചെയ്യുന്ന വീഡിയോ പ്രദര്‍ശിപ്പിച്ച ശേഷം പരിശീലകന്‍ പറയുന്നു: ” ഒരാണും പെണ്ണും സംസാരിച്ചിരിക്കുകയാണെന്ന് സങ്കല്‍പ്പിക്കുക. അത് ഏതെങ്കിലും തരത്തില്‍ തെറ്റാണോ. അല്ല. എന്നാല്‍, പെണ്‍കുട്ടി തനിക്കിനി സംസാരിക്കാന്‍ താല്‍പര്യമില്ലെന്ന് പറയുകയും ആണ്‍കുട്ടി നിര്‍ബന്ധിക്കുകയും ചെയ്താല്‍ അത് കുറ്റകരമാണ്. അതുകൊണ്ട് തന്നെ ഒരാണും പെണ്ണും അടുത്തത്തടുത്തിരുന്നു എന്നതിന്റെ പേരില്‍ നിങ്ങള്‍ ഇടപെടണമെന്നില്ല. പക്ഷേ, പെണ്‍കുട്ടി ആശങ്കാകുലയായി കാണപ്പെട്ടാല്‍ നമ്മള്‍ പൊലീസുകാര്‍ ഉടനടി ഇടപെടണം.”

ഇതിന് പുറമെ എല്ലാ സമയത്തും കാമറ കൂടെ കരുതാനും വിഷയത്തില്‍ ഇടപെടും മുമ്പ് തങ്ങളുടെ പക്കലുള്ള മൊബൈലില്‍ തൊട്ടു മുമ്പ് വരെയുള്ള ദൃശ്യങ്ങള്‍ പകര്‍ത്തണമെന്നുമാണ് നിര്‍ദേശം നല്‍കിയിരിക്കുന്നത്. ആ ദൃശ്യങ്ങള്‍ ഒരളവോളം ആരോപണ-പ്രത്യാരോപണങ്ങളെ ചെറുക്കാന്‍ ഉപകരിക്കുമെന്നും പൊലീസ് മേധാവികള്‍ ഉദ്‌ബോധിപ്പിക്കുന്നു.

50 പേരടങ്ങുന്ന ഓരോ ബാച്ചുകളായാണ് പരിശീലത്തിനെത്തുന്നത്. വനിതാ ഉദ്യോഗസ്ഥര്‍ക്കുള്‍പ്പടെ ആഴ്ചയില്‍ മൂന്ന് പരിശീലന ക്ലാസുകളാണ് സംഘടിപ്പിക്കപ്പെടുന്നതെന്ന് ഉത്തര്‍പ്രദേശ് പൊലീസ് വ്യക്തമാക്കുന്നു. മുതിര്‍ന്ന ഉദ്യോഗസ്ഥര്‍ക്കടക്കം പരിശീലനം ഏതാനും മാസങ്ങള്‍ക്കുള്ളില്‍ നല്‍കുമെന്നും അവര്‍ കൂട്ടിച്ചേര്‍ത്തു.

ദേശീയതലത്തില്‍ വിഷയം ചര്‍ച്ച ചെയ്തതോടെ മോദി സര്‍ക്കാറും പ്രതിരോധത്തിലായിരുന്നു. പാര്‍ക്കിലും മാളുകളിലും കോളജുകളിലുമൊക്കെ കയറിയിറങ്ങി യുവാക്കള്‍ക്കു നേരെ അക്രമം അഴിച്ചുവിടുകയാണ് പൊലീസ് ചെയ്തതെന്ന് അലഹബാദ് കോടതിയുടെ ലഖ്‌നോ ബഞ്ച് വിമര്‍ശിച്ചിരുന്നു. എന്നാല്‍ പേരു മാറിയിട്ടുണ്ടെങ്കിലും ആന്റി റോമിയോ സ്‌ക്വാഡിന്റെ പ്രവര്‍ത്തനം കൂടുതല്‍ ശക്തമാക്കാനാണ് യോഗി സര്‍ക്കാര്‍ തീരുമാനം. സേനയില്‍ ഉള്‍പ്പെട്ട പൊലീസുകാര്‍ക്ക് പ്രത്യേകം പരിശീലനം നല്‍കാന്‍ പൊലീസ് മേധാവി നിര്‍ദേശിച്ചു.

യോഗി ആദിത്യനാഥിന് തന്റെ സ്വയം-നിയമിത സ്‌ക്വാഡിനെ ആന്റി-കൃഷ്ണ സ്‌ക്വാഡ് എന്ന് തിരുത്തി വിളിക്കാന്‍ ധൈര്യമുണ്ടോയെന്ന് സ്വരാജ് അഭിയാന്‍ സ്ഥാപകരിലൊരാള്‍ കൂടിയായ പ്രശാന്ത് ഭൂഷണ്‍ചോദിച്ചു. ” റോമിയോ ഒരാളെ മാത്രമേ പ്രണയിച്ചിരുന്നുള്ളൂ. അങ്ങനെ നോക്കിയാല്‍ ശ്രീകൃഷ്ണനാണ് പൂവാലപ്രഭു. ആദിത്യനാഥിന് തന്റെ ടീമിനെ ആന്റി-കൃഷ്ണന്‍ സ്‌ക്വാഡ് എന്ന് വിളിക്കാന്‍ ധൈര്യമുണ്ടോ?” -പ്രശാന്ത് ഭൂഷണ്‍ ചോദിക്കുന്നു.

ട്വീറ്റിനെതിരെ വ്യാപകമായ പ്രതിഷേധങ്ങളാണ് സോഷ്യല്‍ മീഡിയകളില്‍ നടക്കുന്നത്. അതേസമയം പ്രശാന്ത് ഭൂഷണ്‍ മാപ്പ് പറയണമെന്നും അല്ലാത്തപക്ഷം തങ്ങളുടെ ദേവനെ അപകീര്‍ത്തിപ്പെടുത്തിയതിന്റെ പേരില്‍ കോടതി കയറ്റുമെന്നും ഭീഷണി മുഴക്കി മതവിഭാഗങ്ങള്‍ രംഗത്തെത്തി.

ഇതിനിടെ, ഹിന്ദു മതവികാരം വ്രണപ്പെടുത്തി എന്ന് കാണിച്ച് ബി.ജെ.പി നേതാവ് താജീന്ദര്‍ ബഗ്ഗ പ്രശാന്ത് ഭൂഷണെതിരെ പൊലീസിന് പരാതി.

എന്നാല്‍ ഒരു മതത്തിന്റെയും വികാരങ്ങള്‍ വ്രണപ്പെടുത്താന്‍ തനിക്ക് ഉദ്ദേശ്യമില്ല. പുരാണത്തില്‍ ഗോപികമാരെ കളിയാക്കിയും മറ്റും വളര്‍ന്ന കൃഷ്ണന്റെ കഥ കേട്ടാണ് ഞങ്ങള്‍ വളര്‍ന്നത്. റോമിയോ സ്‌ക്വാഡിന്റെ പ്രവര്‍ത്തനങ്ങള്‍ ഇത്തരം കാര്യങ്ങളെ ക്രിമിനല്‍വത്കരിക്കാനാണ് ഉപയോഗിക്കുന്നത് എന്നും പരാതിയെപ്പറ്റി ചൂണ്ടിക്കാട്ടിയപ്പോള്‍ പ്രശാന്ത് ഭൂഷണ്‍ പ്രതികരിച്ചു.

കോളേജ് പരിസരത്തോ ഷോപ്പിംഗ് മോളുകളിലോ മറ്റു പൊതു ഇടങ്ങളിലോ സ്ത്രീകളോട് മോശമായി പെരുമാറുന്ന യുവാക്കളെ പിടികൂടുന്നതായിരുന്നു ആന്റി റോമിയോ സ്‌ക്വാഡിന്റെ പ്രവര്‍ത്തനം. സ്ത്രീകളുടെ സുരക്ഷ പരിഗണിച്ച് നടപ്പിലാക്കുന്ന ഇതില്‍ വ്യാപകമായി യുവാക്കളെ പിടികൂടുന്നതായാണ് പുറത്തുവരുന്ന ആക്ഷേപം. കോളേജ് പരിസരങ്ങിലും മറ്റും സദാചാര പോലീസ് ചമയുന്നതിനും പോലീസ് ആന്റി റോമിയോ നടത്തിപ്പുകാര്‍ തുനിഞ്ഞിറങ്ങുന്നു. ഇന്നലെ വിവിധ നഗരങ്ങളില്‍ നിന്ന് ആയിരത്തോളം യുവാക്കളെ ചോദ്യം ചെയ്തതായി റിപ്പോര്‍ട്ടുണ്ട്. എന്നാല്‍ പൊതുയിടങ്ങളില്‍ സുഹൃത്തുക്കള്‍ക്കൊപ്പം ഇരിക്കുന്ന പെണ്‍കുട്ടികള്‍ക്കും പിടിവീഴുന്നതായി ആക്ഷേപമുയരുന്നുണ്ട്. ഇന്നലെ മാത്രമായി നിരവധി യുവാക്കളെയാണ് സ്‌ക്വാഡ് സദാചാര പോലീസ് ചമഞ്ഞ് പിടികൂടിയിരിക്കുന്നത്.

സ്‌ക്വാഡിന്റെ പ്രവര്‍ത്തനം വിവാദമായ സാചഹര്യത്തില്‍ സംഭവത്തില്‍ വിശദീകരണവുമായി പോലീസ് ചീഫ് ജാവീദ് അഹമ്മദ് രംഗത്തത്തി. പെണ്‍കുട്ടികളുടേയും സ്ത്രീകളുടേയും സുരക്ഷ മുന്‍നിര്‍ത്തി നടപ്പിലാക്കുന്നതാണ് ആന്റി റോമിയോ സ്‌ക്വാഡിന്റെ പ്രവര്‍ത്തനമെന്നും സദാചാര പോലീസ് അല്ലെന്നും അദ്ദേഹം വ്യക്തമാക്കി. ഗോവധവും അറവുശാലയും നിര്‍ത്തലാക്കുമെന്ന യോഗിയുടെ തെരഞ്ഞെടുപ്പ് വാഗ്ദാനവും സംസ്ഥാനത്ത് ഇപ്പോള്‍ നടപ്പിലായിക്കൊണ്ടിരിക്കുകയാണ്. അനധികൃതമായി പ്രവര്‍ത്തിക്കുന്ന അറവുശാലകള്‍ നിരോധിക്കുമെന്ന യോഗിയുടെ ഉത്തരവിന്റെ ഭാഗമായി സംസ്ഥാനത്ത് നിരവധി അറവുശാലകള്‍ അടച്ചുപൂട്ടിച്ചിരുന്നു. കഴിഞ്ഞ ദിവസം മൂന്ന് അറവുശാലകള്‍ ഗോസംരക്ഷകര്‍ തീയിട്ട് നശിപ്പിച്ചിരുന്നു.