സജീവ സുന്നീ പ്രവര്‍ത്തകനും യൂത്ത് കോണ്‍ഗ്രസ് നേതാവുമായ ശുഹൈബ് കണ്ണൂരില്‍ കൊല്ലപ്പെട്ട സംഭവത്തില്‍ കാന്തപുരം എ.പി അബൂബക്കര്‍ മുസ്ല്യാരോ മറ്റും സംഘടനാ നേതാക്കളോ പ്രതികരിക്കാത്തതില്‍ അണികള്‍ക്കിടയില്‍ പ്രതിഷേധം മുറുകുന്നു. അതേസമയം കോണ്‍ഗ്രസ്സ് നേതാക്കള്‍ ഷുഹൈബിന് അന്ത്യാഞ്ചലി അര്‍പ്പിച്ചും ശക്തമായ പ്രതികരണം നടത്തിയും രംഗത്തെത്തിയിട്ടുണ്ട്. മുഖ്യമന്ത്രി പിണറായി വിജയനടക്കമുള്ള നേതാക്കളുടെ അറിവോടെയാണ് കൊലപാതകം നടന്നതെന്ന് കെ. സുധാകരന്‍ കണ്ണൂരില്‍ആരോപിച്ചു.
എ.പി സുന്നി വിഭാഗത്തിന്റെ കീഴിലുള്ള എസ്.എസ്.എഫിന്റെ യും എസ്.വൈ.എസിന്റെയും പ്രവര്‍ത്തനങ്ങളിലും ‘സാന്ത്വനം’ ജീവകാരുണ്യ പ്രവര്‍ത്തനങ്ങളിലും സജീവ സാന്നിദ്ധ്യമായിരുന്നു തിങ്കളാഴ്ച രാത്രി എടയന്നൂര്‍ തെരൂരില്‍ കൊല്ലപ്പെട്ട ഷുഹൈബ്. കൊലപാതകത്തില്‍ പാര്‍ട്ടിക്ക് പങ്കില്ലെന്ന് സി.പി.എം കണ്ണൂര്‍ ജില്ലാ സെക്രട്ടറി പി.ജയരാജന്‍ പറഞ്ഞു.
കാരന്തൂര്‍ മര്‍കസ് വാര്‍ഷിക സമ്മേളനത്തില്‍ കോടിയേരി ബാലകൃഷണനടക്കമുള്ള സി.പി.എം നേതാക്കള്‍ പങ്കെടുത്ത് കാന്തപുരം സുന്നി വിഭാഗത്തിന് എല്ലാവിധ സംരക്ഷണവും നല്‍കുമെന്ന് പ്രഖ്യാപിച്ചിരുന്നു. അണികളുടെ ജീവന്‍ ബലി നല്‍കപ്പെട്ടിട്ടും നേതാക്കള്‍ പ്രതികരിക്കാത്തതില്‍ പ്രതിഷേധിച്ച് കൊണ്ട് സാമൂഹ്യമാധ്യമങ്ങളില്‍ പോസ്റ്റുകള്‍ നിറയുന്നുണ്ട്.

കഴിഞ്ഞ ദിവസം ഗെയില്‍ സമരക്കാര്‍ക്കു നേരെ പൊലീസ് നടത്തിയ അതിക്രമത്തില്‍ മര്‍ദനമേറ്റ കേരള മുസ്ലിം ജമാഅത്ത് നേതാവ് ഇസ്മാഈല്‍ വഫയെ യു.ഡി.എഫ് നേതാക്കള്‍ സന്ദര്‍ശിച്ചിരുന്നു. സോഷ്യല്‍ മീഡിയയില്‍ എ.പി സുന്നി വിഭാഗം ഗെയില്‍ സമരത്തിനനുകൂലമായി പ്രചാരണം നടത്തുന്നുണ്ട്.

കഴിഞ്ഞ നിയമസഭാ തിരഞ്ഞെടുപ്പില്‍ തിരുവമ്പാടി മണ്ഡലത്തില്‍ ഇടതു സ്ഥാനാര്‍ഥി ജോര്‍ജ്ജ് എം തോമസിന്റെ വിജയത്തില്‍ എ.പി സുന്നി വിഭാഗത്തിന്റെ പിന്തുണ നിര്‍ണ്ണായകമായിരുന്നു. പിണറായി സര്‍ക്കാറിന്റെ ഭരണത്തില്‍ പൂര്‍ണ തൃപ്തിയുണ്ടെന്നാണ് അടുത്തിടെ വരെ അവരുടെ പ്രധാന നേതാക്കള്‍ തന്നെ പറഞ്ഞിരുന്നത്.

ഗെയില്‍ പൈപ്പ് ലൈന്‍ പദ്ധതി ബലപ്രയോഗത്തിലൂടെ നടപ്പാക്കുന്നതിനെതിരെ സമരം ചെയ്യുന്ന, സ്വന്തം പാര്‍ട്ടിക്കാരടക്കമുള്ളവരെ മുഴുവന്‍ തീവ്രവാദികളും വികസന വിരോധികളുമാണെന്ന് മുദ്ര കുത്തുന്ന ഇടതു സര്‍ക്കാര്‍ നിലപാട് വ്യാപക പ്രതിഷേധത്തിന് ഇടയാക്കിയിട്ടുണ്ട്. പിണറായി സര്‍ക്കാറിന്റെ ഭരണത്തില്‍ പൂര്‍ണ തൃപ്തിയുണ്ടെന്ന് ഈയിടെ വരെ വ്യക്തമാക്കിയ എ.പി വിഭാഗം ഇപ്പോള്‍ സി.പി.എമ്മിനും സര്‍ക്കാറിനുമെതിരെ തിരിഞ്ഞിരിക്കുന്നത് പ്രതിഷേധത്തിന്റെ, സ്വന്തം പക്ഷത്തു തന്നെയുള്ള അമര്‍ഷം വ്യക്തമാക്കുന്നു. ഗെയില്‍ സമരക്കാര്‍ക്കെതിരെ സി.പി.എം കോഴിക്കോട് ജില്ലാ കമ്മിറ്റി പുറത്തിറക്കിയ പ്രസ്താവനയില്‍, പ്രവാചകന്‍ ജീവിക്കുകയും മതം പ്രചരിപ്പിക്കുകയും ചെയ്ത ഏഴാം നൂറ്റാണ്ടിനെ ‘പ്രാകൃതം’ എന്നു വിശേഷിപ്പിച്ചത് മുമ്പ് പിന്തുണ ഇടതുപക്ഷത്തിന് നല്‍കിയിരുന്ന മുസ്‌ലിം സംഘടനകളെ പോലും അകറ്റാന്‍ കാരണമായിരിക്കുകയാണ്.

ഗെയില്‍ വിരുദ്ധ സമരം കത്തി നില്‍ക്കുന്ന കാരശ്ശേരി പഞ്ചായത്തില്‍ നിയമസഭാ തിരഞ്ഞെടുപ്പിന്റെ തലേന്ന് പോലും ജോര്‍ജ്ജ് എം തോമസ്, പദ്ധതി നടപ്പാക്കില്ലെന്ന് ഉറപ്പ് നല്‍കിയരുന്നതായി അണികള്‍ തന്നെ പറയുന്നു. ഗെയില്‍ സമരത്തിനു പിന്നില്‍ തീവ്രവാദ ഗ്രൂപ്പുകളാണെന്ന സിപിഎം നിലപാട് ഇവിടുത്തെ പാര്‍ട്ടി അണികള്‍ക്കിടയിലും അസ്വസ്ഥത സൃഷ്ടിച്ചിട്ടുണ്ട്. ഇതിനു പിന്നാലെയാണ് ഗെയില്‍ സമരം ഏഴാം നൂറ്റാണ്ടിലെ പ്രാകൃത രൂപത്തിലുളളതാണെന്ന പ്രസ്താവന വന്നത്.