apple company – Chandrika Daily

മുംബൈ ആപ്പിള്‍ സ്റ്റോറിന് മുന്നില്‍ ഐഫോണ്‍ 17 വാങ്ങാന്‍ തമ്മിലടിച്ച് ആരാധകര്‍

webdesk17 — Fri, 19 Sep 2025 09:53:18 +0000

മുംബൈ: ഇന്ത്യയില്‍ ഐഫോണ്‍ 17 വില്‍പ്പന ആരംഭിച്ച ആദ്യ ദിനം തന്നെ ആപ്പിള്‍ സ്റ്റോറിന് മുന്നില്‍ ആരാധകര്‍ തിക്കിതിരക്കി. ബികെസി ജിയോ സെന്ററിലെ ആപ്പിള്‍ സ്റ്റോറിന് മുന്നില്‍ പുലര്‍ച്ചെ മുതല്‍ തന്നെ വലിയ ജനക്കൂട്ടം തടിച്ചുകൂടിയതോടെ തിരക്ക് നിയന്ത്രണാതീതമായി. പുതിയ ഐഫോണ്‍ വാങ്ങാന്‍ എത്തിയവരുടെ തമ്മിലടിയാണ് പൊലീസിനെ ഇടപെടലിന് നിര്‍ബന്ധിതരാക്കിയത്.

സംഭവം ഉടന്‍ നിയന്ത്രണവിധേയമാക്കി. ആര്‍ക്കും പരുക്കുകളൊന്നും റിപ്പോര്‍ട്ട് ചെയ്തിട്ടില്ല.

ഐഫോണ്‍ 17 സീരീസിന്റെ വില്‍പ്പന ഇന്ത്യയിലുടനീളം ആരംഭിച്ചതോടെ വിവിധ നഗരങ്ങളിലെ ആപ്പിള്‍ സ്റ്റോറുകളുടെ മുന്നിലും നീണ്ട ക്യൂകളും തിരക്കുകളും അനുഭവപ്പെട്ടു.

ഇന്ത്യയില്‍ ഐഫോണ്‍ 17 ന്റെ വില 82,900 മുതല്‍ ആരംഭിക്കുന്നു. അള്‍ട്രാ-സ്ലിം മോഡലായ ഐഫോണ്‍ എയര്‍ 1,19,900 രൂപയ്ക്കും, ഐഫോണ്‍ 17 പ്രോ 1,34,900 രൂപയ്ക്കും, ഐഫോണ്‍ 17 പ്രോ മാക്സ് 1,49,900 രൂപയ്ക്കുമാണ് ലഭ്യമാകുന്നത്.

ആപ്പിളിന്റെ ഇന്ത്യയിലെ ആദ്യ സ്റ്റോർ മുംബൈയിൽ തുറന്നു; 84 ലെ ബ്ലാക്ക് ആൻഡ് വൈറ്റ് കമ്പ്യൂട്ടറുമായി ആരാധകൻ

webdesk15 — Tue, 18 Apr 2023 06:31:14 +0000

ആരാധകരുടെ ആരവങ്ങൾക്കിടയിൽ ടെക് ഭീമനായ ആപ്പിളിന്റെ ഇന്ത്യയിലെ ആദ്യത്തെ റീട്ടെയിൽ സ്റ്റോർ മുംബൈയിലെ ബാന്ദ്ര കുർള കോംപ്ലക്സിൽ തുറന്ന് പ്രവർത്തനം ആരംഭിച്ചു. ഉത്ഘാടന ചടങ്ങിൽ ഒരു ഉപഭോക്താവ് തന്റെ കയ്യിലുണ്ടായിരുന്ന 1984-ലെ ഒരു വിന്റേജ് ആപ്പിൾ കമ്പ്യൂട്ടർ കൊണ്ടുവന്ന് പ്രദർശിപ്പിച്ചത് ശ്രദ്ദേയമായി.

“ആപ്പിളിന്റെ യാത്ര കാണിക്കാൻ വേണ്ടി മാത്രമാണ് ഞാൻ ഇത് കൊണ്ടുവന്നത്. ഞാൻ ഇത് 1984 ൽ വാങ്ങി, അതിനുശേഷം ആപ്പിൾ ഉൽപ്പന്നങ്ങൾ ഉപയോഗിക്കുന്നു. ഇത് 2 മെഗാബൈറ്റ് ബ്ലാക്ക് ആൻഡ് വൈറ്റ് കമ്പ്യൂട്ടറാണ്, എന്നാൽ ഇപ്പോൾ ആപ്പിൾ 4K, 8K പോലും റെസല്യൂഷൻ ഡിസ്പ്ലേകൾ നിർമ്മിക്കുന്നു, അതിനാൽ ആപ്പിൾ ഒരുപാട് മുന്നോട്ട് പോയി,” അയാൾ പറഞ്ഞു. “ഞാൻ രാവിലെ 6 മണി മുതൽ ഇവിടെ നിൽക്കുകയാണ്,”മുംബൈ ഒരു വലിയ നഗരമാണ്, അവർ മറ്റൊരു സ്റ്റോർ തുറക്കണം.” ഉപഭോക്താവ് കൂട്ടിച്ചേർത്തു. ഇന്ന് രാവിലെ 11 മണിക്കാണ് ആപ്പിൾ മെഗാസ്റ്റോർ തുറന്നത് .ആപ്പിളിന്റെ രണ്ടാമത്തെ സ്റ്റോർ ഏപ്രിൽ 20 ന് ന്യൂഡൽഹിയിൽ ആരംഭിക്കും.

മുംബൈയിലെയും ഡൽഹിയിലെയും രണ്ട് സ്റ്റോറുകളും പ്രാദേശിക സംസ്കാരവുമായി പ്രതിധ്വനിക്കുമെന്ന് ആപ്പിൾ പറഞ്ഞു. “ഇന്ത്യയ്ക്ക് വളരെ മനോഹരമായ ഒരു സംസ്‌കാരവും അവിശ്വസനീയമായ ഊർജ്ജവുമുണ്ട്, ഞങ്ങളുടെ ഉപഭോക്താക്കളെ പിന്തുണയ്‌ക്കുക, പ്രാദേശിക കമ്മ്യൂണിറ്റികളിൽ നിക്ഷേപം നടത്തുക, മാനവികതയെ സേവിക്കുന്ന നവീനതകൾക്കൊപ്പം മികച്ച ഭാവി കെട്ടിപ്പടുക്കാൻ ഒരുമിച്ച് പ്രവർത്തിക്കുക, എന്നിവയാണ് ഞങ്ങളുടെ പദ്ധതി ” ആപ്പിൾ സിഇഒ ടിം കുക്ക് പറഞ്ഞു.

വില്‍പ്പന കുറഞ്ഞു, നഷ്ടം 33 ലക്ഷം കോടി രൂപ; ആപ്പിളിന് ഇതെന്തു പറ്റി?

Test User — Tue, 03 Nov 2020 07:03:05 +0000

ന്യൂയോര്‍ക്ക്: പുതിയ ഫോണുകള്‍ക്ക് വേണ്ടത്ര വിപണി കീഴക്കാന്‍ കഴിയാഞ്ഞതോടെ ആപ്പിളിന്റെ വിപണി മൂല്യത്തില്‍ വന്‍ ഇടിവ്. ഒരു മാസത്തിനിടെ കമ്പനിയുടെ ഓഹരിയില്‍ 19 ശതമാനം ഇടിവാണ് രേഖപ്പെടുത്തിയിട്ടുള്ളത്. ബ്ലൂംബര്‍ഗ് റിപ്പോര്‍ട്ട് പ്രകാരം 45,000 കോടി ഡോളറാണ് മൊത്തം വിപണി മൂല്യത്തില്‍ നിന്ന് നഷ്ടപ്പെട്ടത്. ഏകദേശം 33 ലക്ഷം കോടി രൂപയുടെ നിഷ്ടം.

സെപ്തംബര്‍ ഒന്നില്‍ ആപ്പിളിന്റെ വിപണി മൂല്യം 2.295 ട്രില്യണ്‍ ഡോളര്‍ ആയിരുന്നു. ഓഹരി എല്ലാകാലത്തെയും ഉയര്‍ന്ന നിലയായ 134.18 ഡോളറും. എന്നാല്‍ ഒക്ടോബര്‍ 30ന് ക്ലോസ് ചെയ്യുമ്പോള്‍ ആപ്പിളിന്റെ വിപണി മൂലധനം 1.852 ട്രില്യണ്‍ ഡോളറായി കുറഞ്ഞു. ഓഹരി മൂല്യം 108.86 ഡോളറാകുകയും ചെയ്തു.

ഐ ഫോണ്‍ വില്‍പ്പനയിലെ ഇടിവാണ് കമ്പനിക്ക് തിരിച്ചടിയായത്. പുതിയ ഫോണായ ഐഫോണ്‍ 12 വിപണിയില്‍ എത്താന്‍ വൈകിയതും തിരിച്ചടിച്ചു. ചാര്‍ജറിന്റെയും ഇയര്‍ഫോണിന്റെയും അഭാവം ഉപഭോക്താക്കളിലും നിരാശ പടര്‍ത്തി. ആപ്പിള്‍ ഏറ്റവും കൂടുതല്‍ വിറ്റഴിച്ച ചൈനയില്‍ വില്‍പ്പന ഇടിഞ്ഞതും കമ്പനിയെ ബാധിച്ചു. ഇതോടൊപ്പം അവധിക്കാല പാദത്തെ കുറിച്ചുള്ള ഒരു പ്രവചനവും കമ്പനി നടത്തിയിട്ടില്ല.

അതേസമയം, തിരിച്ചടികള്‍ക്കിടയിലും ലോകത്തെ ഏറ്റവും മൂല്യമുള്ള ടെക് കമ്പനിയായി ആപ്പിള്‍ തുടരുകയാണ്. ഓഗസ്റ്റില്‍ രണ്ട് ട്രില്യണ്‍ വിപണി മൂല്യമുള്ള ആദ്യത്തെ യുഎസ് കമ്പനിയായി ആപ്പിള്‍ ചരിത്രം സൃഷ്ടിച്ചിരുന്നു.